Ерөнхийлөгч ЯАГААД Г.Жамъян, Ц.Уянга нарт Б.Махбалд холбогдох хэргээс үүдэж ГОМДОВ

Ерөнхийлөгч Х.Баттулга өмнө нь сэтгүүлч Г.Жамъян гуайг “Уучлал гуйхгүй бол шүүхэд өгнө” гэсэн утга бүхий мэдэгдлээр “дарамталсан”. Саяхан “Элийрэгч” Ц.Уянгыг Зөрчлийн хуулиар 2 “саядуулав”. Нэг нь сэтгүүлч бөгөөд ёжлолд мэргэшигч. Нөгөө нь жиргээч бөгөөд Ерөнхийлөгчийг гаргууд сайн “доромжлогч”.  Ерөнхийлөгч нэгийг нь айлгах оролдлого хийж, нөгөөг нь жинхэнэ утгаар торгуулж чаджээ.

Хачирхалтай нь, тэдний Ерөнхийлөгчийг “эмзэглүүлсэн” сэдэв нь нэг.

Тодруулбал, сэтгүүлч Г.Жамъян “Зам, тээврийн хөгжлийн яамны ажилтан асан Т.Гомбосүрэнгийн үхэлд Б.Махбал холбоотой. Тэр бол таны баруун гар байсан. Б.Махбалыг та шүүхээс мултлах гэж байгаа” гэх утгаар Ерөнхийлөгч Х.Баттулгад захидал бичсэн. “Элийрэгч” Ц.Уянга ЗТХЯ-ны гадаах  үхлийг Ерөнхийлөгчид хамаатуулж, түүнийхээ сенсаацийг дарахын тулд төмөр замын осол зохион байгуулсан” гэх утгаар жиргэсэн.

Ерөнхийлөгч Х.Баттулгын сэтгүүлч Г.Жамъян гуайд бичсэн захидал, жиргээч Г.Уянгын талаарх ЕТГ-аас гаргасан тайлбарыг харахад ч тэр, “Хүн амины хэрэгт хамааруулж бичсэн” асуудалд ундууцжээ. Өөрөөр хэлбэл, Г.Жамъян, Ц.Уянга нар нэг сэдвээр төрийн  тэргүүнийхээ дургүйг хүргэсэн байгаа юм. Ядаж байхад энэ хоёрын ааш гэж авах юм байхгүй. Шууд л гал цогтойгоо бууж, байр сууриа тас хамгаалдаг улс.

Ерөнхийлөгч төрийн тэргүүн тул бас “дараад” авах бодолтой. Тэд гурван талаасаа нэг сэдвээр ингэж холбогджээ. Цахим  орчинд элдэв доромжлол, гүтгэлэг, ёжлол, цуурхал явж л байдаг. Энэ бүхнийг улс төрчид шүүрч авах тусмаа нялхарч, эмзэгшиж, дархлаа нь сулардаг. Эсрэгээрээ тоохгүй хаячихад хэд гөвүүлээд л тэгсгээд өнгөрдөг. Тогтсон жишиг юм л даа, энэ.

Үүнийг манай Ерөнхийлөгч андахгүй сайн мэднэ. Хэвлэлийн салбарын сайн, мууг тэр хамгийн сайн мэдрэх нэгэн. Ерөнхий имижээрээ ч тэр, сайллаа гэж баярлахгүй, мууллаа гэж гомдоллохгүй явдаг улс төрчдийн тоонд багтдаг.

Гэтэл яагаад талийгч Б.Гомбосүрэнгийн үхэлд Б.Махбалыг холбоход тэгтлээ их эмзэглэдэг билээ. Б.Махбалыг  улс төрийн хүрээнд “Ерөнхийлөгчийн хүн” гэж мэддэг болохоор тэр үү.

Тэглээ гээд Ерөнхийлөгчид ямар хамаатай гэж. Ямар Б.Махбалын үг, үйлдэл бүрийг Ерөнхийлөгч дагаж харж байсан биш. Хоногийн 24 цаг байнга хамт байдаг хүмүүс биш, “Хэрэгт орооцолдлоо доо, дүү минь” гэж бодоод орхиж болох биш үү. Юунд энэ талаар  бичсэн сэтгүүлч, жиргээч нарыг элдэвлэж, дарамталж, сүр үзүүлж яваа юм бол, төрийн тэргүүн маань.

Нэмэлт мөрдөн байцаалтад буцаагдсан Б.Махбалд хамаарах хэрэг эцэстээ хэрхэн шийдэгдэх нь ч тодорхойгүй байна. Талийгаач Т.Гомбосүрэнгийн аав сэтгэлийн их хямралаас үүдэлтэйгээр нас бараад нэлээд хугацаа өнгөрлөө. Сайд, дэд сайд, ТНБД нь уг  үхлээс үүдэж, ажлаа өгсөн ч “Алуурчин хэн байв” гэсэн асуулт өнөө хэр эзэнгүй.

Энэ хооронд олон үйл явдал өрнөж, Тавантолгой-Гашуунсухайт чиглэлийн төмөр зам Зүүнбаян өртөөгөөр хамаарахаар болж, өмнөх хувилбар нь тэс өөрөөр хэрэгжиж эхэлсэн.

Төмөр замын чиглэлийг гэнэт Б.Энх-Амгалан сайдын үед өөрчилсөн нь төрийн тэргүүний ойрын хүмүүсийн бизнест өндөр ашигтай тусна гэх яриа хөшигний ард өрнөсөөр байгаа юм.

Ирэх өдрүүдэд илүү олон зүйлийн учиг тайлагдаж таараа. Ямар ч байсан төрийн тэргүүн маань талийгч Т.Гомбосүрэнгийн үхэлд Б.Махбалаар дамжуулан, өөрийг нь хамааруулахад хачин их эмзэг байгаа аж.

Ж.МЯДАГБАДАМ

Энэ мэдээнд таны өгөх үнэлгээ

Хуваалцах Жиргэх