Хоёр толгойтой АН, хэнхэг залуусаар дүүрсэн МАН

“АН, МАН-ын аль ч ялгаагүй, суурь үзлээрээ ч ялгарахаа байсан. Залуус одоо карьер өгсөлтөд аль ашигтайд нь л элсэж байгаа”. Ирээдүйд УИХ-д өрсөлдөх хүсэлтэй залуу бизнесмений ярианаас иш татав. Энэ бол АН, МАН-ын одоогийн байгаа царай, үнэ цэнийг нь хамгийн энгийн үгээр тайлбарласан бодит кэйс юм. Тэд яг одоо олон нийтэд хэрхэн харагдаж байгаа вэ?

АН ХОЁР ТОЛГОЙТОЙ БОЛЖ, “ДАЙСНЫ ЦЭРГҮҮД СОНСОЦГОО” УРИАНД  ШИЛЖИВ

С.Эрдэнэ өчигдөр /2020.12.28/ мэдээлэл хийж, “Би АН-ын дарга хэвээрээ байгаа. Ц.Туваанд байгаа тамгыг хүчингүй болгож, тамгаа өөр дээрээ авсан. “Шонхор” товерт АН-ын дүрмийн дагуу идэвхтэй үйл ажиллагааг явуулж эхэлнэ” гэж мэдэгдлээ.Ингэснээр хэдхэн хоногийн өмнө Э.Бат-Үүлийн “С.Эрдэнэтэй эвээ олохгүй бол Х.Баттулгын концерт дуусах аюултай” гэж жиргэсний учир тайлагдав. Өөрөөр хэлбэл, хууль шүүхээр явахад С.Эрдэнийн талд бүх шийдвэр гарах нөхцөл байдалд АН байгаа учраас тэр өнөөдөр хүчтэй, бардам яваа аж.

Нөгөө талд Ц.Туваан, П.Нүрзэд, Б.Пүрэвдаваа нарын “бүтэлгүй” нөхдөөр удирдуулсан Ерөнхийлөгч Х.Баттулгын халаасны АН байгаа. Тэд Ерөнхийлөгчид хэдэн сар зөвлөөд, Германы элчинд ажиллахаар явах Л.Болдын “Бодь” товерт байрлаж буй. Саяхан Их хурлаа хийж, МоАХ-ны өндөр хайрцаглалт дор Ерөнхийлөгч Х.Баттулгад ашигтай хэдэн шийдвэр гаргаад өндөрлөсөн. Тэднээс Э.Бат-Үүл, Ц.Оюунгэрэл тэргүүтэй ахмад лидерүүд нь “цээрлэж”, залуус нь тархигүй, зүрхгүй, улбагар дүрээр нэгдсэн нь нууц биш.

Ингэж МҮХАҮТ-ийн Ерөнхийлөгч Т.Амартүвшин АН-ын даргаар очиж, Ерөнхийлөгчид үйлчлэх сценари зурагдаж явсан ч С.Эрдэнэ эсэргүүцлийн тугаа өргөв. Нэгэн цагт О.Баасанхүү, Н.Энхбаяр нар Их хурлаа тус тусдаа хийсэн шиг хөгийн хэмлэлдээнд  АН-ынхан орж, биенээ “дайсны цэргүүд сонсоцгоо” уриагаар намнахаар шийдэцгээжээ.Ийм байдалтай АН-аас суурь үзэл суртал, ардчиллын язгуур амин чанарыг нэхээд ч нэмэргүй. Тэд өнөөдөр Ерөнхийлөгчийн сонгуульд намаасаа хэнийг дэвшүүлэхээ шийдэх тулаанаас өөр юуг ч бодохоо  больжээ.

–АХМАД, ДУНД ҮЕЭ ЖИЙЖ, ХЭНХЭГ ЗАЛУУСААР ДҮҮРСЭН ТУСГААР ТОГТНОЛЫН ОРДОН-

Эрх баригч нам өөрийн гэсэн том оффистой тул хаа очиж, АН шиг түр тэжээж буй хүнийхээ оффис дээр туг далбаагаа намируулж явдаггүй.Хэрэлдэж, муудсан ч Тусгаар тогтнолын ордондоо цуглардаг давуу талтай. Чухамдаа М.Энхболд зэргийн ахуйлаг, алсуур боддог ахмад, идэр үеийн төлөөллүүд эл намд нэгэн үес хүчтэй байсны үр нөлөөгөөр ядаж л эднийх оффистой сууцгааж байна. Гэвч ирэх онд 100 жилийнхээ ойг тэмдэглэх МАН-ын ирээдүй  нэг их холын гэрэлтэй, зам харгуй нь дардан  харагдаад байгаа зүйл үгүй. Парламент дахь ганган чимэг, супер тэрсэгч Ц.Нямдорж, гол ноён нуруу нь болж явсан Д.Лүндээжанцан нарын ахмад үеийнхэн нь намаараа үзэгдэхээ бараг больсон.

Дээрээс нь МАН-ын нэрээр төрийн ажлыг жинхэнэ нугалж явсан Б.Баярсайхан, Ц.Ням-Осор, Д.Мөрөн тэргүүтэй технократууд нь намынхаа өнөөгийн залуусаас болгоомжилж, хол явахыг эрхэмлэх болжээ. Эдүгээ МАН-ын төв байранд нэг их дүрдээ орсон, өөрсдийгөө бага оврын У.Хүрэлсүх гээд ойлгочихсон хэдэн хэнхэг залуус л намынхаа ажлыг хөтлөх болсон нь нууц биш. Тэдний сүртэй, биеэ тоосон, дөвчигнүүр болсныг үгээр илэрхийлэхэд ч хэцүү.

Хоёр ч сонгууль амжилттай удирдсан Д.Амарбаясгаланг эс тооцвол 500 сая төгрөгийн авлига авч байгаад баригдсан гэгддэг “МИАТ” ТӨХК-ийн дэд захирал асан Н.Энхбаатар зэрэгхэн улс хүний нөөцийг нь базах зэргээр сууж буй нь МАН-ын эмгэнэл юм. Яг бичиг цаастай зууралдаж, намын эв эеийг олж, чухал хэлцэл бүр дээр гаргалгаа зурж суусан ахмад, идэр үеийнхэн Н.Энхбаатар мэтийн залуустай ямар хүний нөөцийн бодлого ярих ч билээ дээ, тоож харах ч үгүй гарч одох. Мөнхүү аль хортой,хувийн шунал ихтэй Я.Содбаатар, Ж.Энхбаяр мэт нь намдаа үнэнч үлдсэн нэрээр У.Хүрэлсүхийг бараадаж, ажил хийж чаддаг бүтээгчүүд нь цүнхээ үүрч гудамд гарсан нөхцөл байдалтай.

СЭТГҮҮЛЧИЙН ТЭМДЭГЛЭЛ: Эдүгээ АН хоёр толгойтой болж, МАН баахан хэнхэг залуусаар дүүрсэн нь хоёр том  намын супер “хоосрол” юм. Хүчээр шийдээд, өнөөгийн болж буй төрхөндөө итгээд яваад байж болох ч сууриараа буруудчихсан үзлүүд зөвөөр сэргэхэд асар хэцүү. Гол нь, АН-д ч, МАН-д ч  ахмад, идэр,залуусын супер хүчтэй нэгдэл үгүй болжээ. Дан ганц үеийн төлөөллөөр төгс засаглал бүрдүүлнэ гэж үгүй. Өнөөдөр АН-аас, МАН-аас аль сайн дүрүүд нь зугтаад байгаа нь тэднээс “муу хүн”-ий үнэр тасралтгүй түгэх болсонтой л холбоотой. Нөгөө талд намууд өөрөө улстөрд орж, хувь хүний хүсэл шуналаа биелүүлэх зорилготой хүмүүсийн гишгүүр болсон нь жинхэнэ үзэл суртал, намын амин чанар алдагдахад хүргэсээр байна.

Энэ мэдээнд таны өгөх үнэлгээ

Хуваалцах Жиргэх