АНАЛИЗ: Хоёрхон сарын дотор Ерөнхийлөгч буланд “шахуулж”, МАН Л.Оюун-Эрдэнийг “сансарт хөөргөн”, хүчээ нэгтгэжээ

Өчигдөр буюу Цагаан сарын шинийн 1-ний өдөр төрийн гурван өндөрлөг уламжлалт ёсоор мэндчилгээ дэвшүүллээ. Үүнд Ерөнхий сайд Л.Оюун-Эрдэнэ цоо шинэ дүр болж харагдсанаар иргэдийн анхааралд илүү өртсөн бол Ерөнхийлөгч Х.Баттулга, УИХ-ын дарга Г.Занданшатар нарын мэндчилгээ төдийлөн хэлэлцэгдэлгүй “урсаад” өнгөрсөн гэхэд болно.

2020-2021 онд шилжих шөнө төрийн гурван өндөрлөг мэндчилгээ дэвшүүлж байхад олон нийт Ерөнхийлөгчийг ямар нэг бэлэг барих болов уу хэмээн хүлээж, нөгөө хоёрынх нь мэндчилгээ дарагдаж байв. Тэгвэл энэ үеэс ердөө хоёр сарын дотор улс төрийн нөхцөл байдал хэрхэн эргэснийг өчигдрийн мэндчилгээнүүдээс харж болж байна.

ЕРӨНХИЙЛӨГЧ ЭВ, ЭЕИЙН АГУУЛГА ТҮЛХҮҮ ЯРИВ

Ерөнхийлөгч Х.Баттулга шинэ жилээр нэг тийм өс зангидсан гэмээр үгс шидэж, “Цагаан захтнуудыг шийтгэнэ, бултах газар байхгүй” гэхчлэнгээр эрдэж ярьж байв. Түүнчлэн УИХ-д өргөн бариад удаагүй байсан өрх бүрд нэг сая төгрөг олгох тогтоолын төслөө дахин өргөн барилаа гэж мэдэгдсэн. Нэг үгээр гүргэр, өөртөө итгэлтэй хэв шинж түүнд давамгайлж байв.

Тэгвэл энэ хоёр сарын хугацаанд түүний тогтоолын төслийг УИХ хүлээж аваагүйгээр үл барам, ҮАБЗ-ийн хоёр гишүүн нь хоёулаа “Мөнгө байхгүй, дэмжихгүй” гэдгээ илэрхийлчхээд буй. Мөн он гараад Шүүхийн тухай хуулийн шинэчилсэн найруулгыг баталж, Ерөнхийлөгч хориг тавьсан ч хүлээж аваагүй. Мэдээж У.Хүрэлсүх өөрийн хүсэлтээр огцорч, буухдаа Ерөнхийлөгчийг төв талбайн жагсаалыг санхүүжүүлж, турхирсан хэмээн цоллож орхисон. Нэг үгээр УИХ-аа хэчнээн царайчлаад тавьсан хориг, өргөн барьсан тогтоолын төслийг нь хүлээж авдаггүй, буланд шахуулсан нөхцөлд тэр орсон билээ.

Ингээд тун даруу, элдэв улс төргүй, харин зүгээр л “Эвт шаазгай буга барина” гэдэг агуулга ярьсан нь анхаарал татаж байна.

ЕРӨНХИЙ САЙД ӨНДӨР ИТГЭЛТЭЙГЭЭР ШИНЭ ЗАСГИЙН ГАЗРАА СУРТАЛЧЛАВ

Ерөнхий сайд Л.Оюун-Эрдэнийн хувьд байгуулсан шинэ Засгийн газрынхаа ажлыг ихэвчлэн сурталчилж мэндчилэв. Эдийн засгийн нөхцөл байдлыг хөндөж, хэд гурван тоо хэлээд “Эрүүл мэндээ хамгаалж, эдийн засгаа аврах 10 их наядын хөтөлбөр”-өө ярив. Түүнчлэн хөл хорионы үеэр зохион байгуулж буй “Нэг хаалга-нэг шинжилгээ”-ний талаар ч дурдав. Цаашлаад “Алсын хараа-2050” бодлогын баримт бичгээ ч ярилаа. Эдгээр нь төлөвлөгөөтэй, зорьсон зорилготой улс төрийн агуулга учир авууштай.

Харин 30 хэмийн хүйтэнд 30 мянган монголчууд төв талбайдаа цуглаж, өнгөрсөн 30 жилийн түүхийг цэглэснийг хэзээ ч мартахгүй гэж ярьсан нь дээрхээс илүү анхаарал татаж байна. М.Энхболдыг УИХ-ын даргаас огцруулахаар Л.Оюун-Эрдэнэ нарын хэдэн улс төрчид тэмцсэн, сүүлд жагсаалд оролцогсдод монгол гэр, мөнгө цаас өгөхөөр амласан байсан гэх яриа хөвөрсөн, одоо Ж.Батзандан, Л.Болд нар “сураггүй”, Л.Оюун-Эрдэнэ өөрөө Ерөнхий сайд болчихсон байгаа зэрэг нь агуулгаараа янз бүрээр л харагддаг. Ерөнхийдөө өөртөө төвтэй, өөрт маш их итгэсэн мэндчилгээ дэвшүүлжээ.

УИХ-ЫН ДАРГА ЕРӨНХИЙ САЙДАА НАЛЖ, ТЭТГЭВРИЙН ЗЭЭЛГҮЙ АХМАДУУДАА ДАХИАД Л ЯРИВ

Харин УИХ-ын дарга Г.Занданшатар ерөнхийдөө шинэ жилийн мэндчилгээндээ ярьсан агуулгуудаа давтжээ. Үүнд гурван төрлийн хувьсгал хийх, цахим парламенттай болох, эрх зүйн томоохон шинэтгэлүүдийг хийх зэрэг багтана. Мөн шинэ жилээр хэлж байсан, “Тэтгэврийн зээлгүй байсан ахмадуудад 1 сая төгрөг олгох ажлыг энэ тавдугаар сард хийнэ” гэсэн яриагаа давтлаа.

Бусдаар шинэ Засгийн газар, шинэ Ерөнхий сайдаа налсан: Оюу толгойн гэрээг ашигтай болгох ажлын хэсэг байгуулсан талаар болох “10 их наяын хөтөлбөр”-ийн талаар нэлээд жинтэй дурдсан агуулга ярив.

Тэтгэврийн зээлгүй байсан ахмадуудад 1 сая төгрөг олгох ажил нь иргэдэд бол Ерөнхийлөгчийн санаачилгын үр хөврөл шиг буудаг. Үүнийг ярихад Ерөнхийлөгч бол төдийлөн дургүйцэхгүй. Харин Ерөнхийлөгч хориг тавьсан ч хүлээж аваагүй хуулийн төслүүдийг баталснаа мэндчилгээндээ сайрхан зарлаж, шинэ Засгийн газрыг бараадсан зүйлс ярьсан нь түүнийг нэг тал руу хэлбийж эхэлж гэж дүгнэмээр харагдана. Шинэ жилээр бол тэр яг голч нуруугаа барьж байв.

СЭТГҮҮЛЧИЙН ТЭМДЭГЛЭЛ: Хоёрхон сарын дотор улс төрд ийм өөрчлөлтүүд гарсан нь маш ховор тохиолдол. Ерөнхийлөгч одоо ерөнхийдөө ерөнхийлөгчийнхөө намбагар төрхийг хадгалж, эерэг агуулгаар харагдаж суухыг хүсэх болжээ. Тэр энэ мэндчилгээнд үг шидэж болох л байв. Харин шинэ Ерөнхий сайд Л.Оюун-Эрдэнийн өөртөө итгэх итгэл маш дээгүүр байгааг мэндчилгээ илтгэнэ. Түүнчлэн МАН-ынхан Л.Оюун-Эрдэнэд итгэж, түүнийг гагцхүү урдаа барьсныг харуулна. Ямартай ч улс төрд хүч тэнцүү хуваарилагдахаа нэгэнт байж, Ерөнхийлөгчийн сонгууль хүлээсэн цаг үе улайсан байгааг төрийн гурван өндөрлөгийн мэндчилгээ харууллаа.

Энэ мэдээнд өгөх таны үнэлгээ

Хуваалцаарай Жиргээрэй