Т.Чимгээтэй адил эрүүдэн шүүлгэсэн Б.Содномдаржааг мартчихлаа

Лу.Болд, Ж.Батзандан нарын байгуулсан ШИНЭ нам Т.Чимгээ, Б.Содномдаржаа нарын асуудлаар маш удаан хугацаанд дуугарч, очиж уулзаж, олон нийтэд мэдээлэл хийж, анхаарлын төвд оруулж байлаа. Тухайн үед Манай эрх баригчид, Засгийн газраас ёстой хүний урманд жаахан ч гэсэн анхаараагүй дээ.

Гэтэл гэнэт л ухаан орж, Т.Чимгээ эрүүдэн шүүлгэж байсан байна, өөртэй нь очиж уулзана гээд хорих анги дээр очиж, Т.Чимгээг хүчээр шахам түмний нүд болгосон. Ерөнхий сайд нь очоод уулзъя гэхэд нь шоронгоос гаргачих болов уу, хэргийг минь анхаарах болов уу гэж горьдсон тэр бүсгүй олны өмнө гарч уйлан байж ярьсан. Түүнийг нь дарга нар эгнэж сууж байгаад хөмсөг зангидан сонсов. Гэтэл дараа нь энэ уулзалт түүний үйлдсэн хэрэгтэй огт хамааралгүй. Зүгээр л эрүүдэн шүүсэн асуудлыг нь ярьж байна гэж өөрсдөөсөө холдуулна билээ.

Харамсалтай нь энэ уулзалт болон нүцгэн доромжлуулж буй бичлэгийг нь олон нийтэд цацсан нь зүгээр л нэг хүний эрх зөрчсөн үйлдэл болсон. Үүгээрээ дарга нар л оноо авсан байх. Харин Т.Чимгээ гэх бүсгүй өрөвдүүлэх бус харин эр дагаж буудал орсон эм болж адлуулж үлдсэн.

-НЭГИЙГ НЬ ОРХИОД, НӨГӨӨГ НЬ ОНЦЛООД БАЙГАА НЬ ШУДАРГА УУ-

Энэ асуудал тэр бичлэг задраад дуусгавар болчихсонгүй. Өчигдөр намрын чуулганы нээлтийн үеэр УИХ-ын дарга Т.Чимгээгийн хэрэгт анхаарлаа хандуулж, шалгах ёстой гэв. Мөн УИХ-ын гишүүн Ц.Мөнхцэцэг, Г.Амартүвшин нар Т.Чимгээг эрүүдэн шүүсэн асуудлаар нээлттэй сонсгол зохион байгуулах санал гаргав. Энэ саналыг нь 19 гишүүн дэмжих аваас сонсгол хийх хуулийн заалттай юм билээ.

Мөн өнөөдөр дээрх хоёр гишүүн Т.Чимгээг эрүүдэн шүүсэн асуудлаар нээлттэй сонсгол явуулах талаар ХЭҮК-ын гишүүдтэй уулзахаар цаг товлоод байна.

Энэ бүхнээс харахад анхаарах ёстой нэг зүйл байна. Учир нь С.Зориг агсны амь насыг хөнөөсөн хэргээр Т.Чимгээгээс гадна Б.Содномдаржаа гэж залуу ял авсан. Т.Чимгээгээс гадна Б.Содномдаржаа гэдэг хүн ч эрүүдэн шүүгдсэн. Шоронд дэглүүлсэн. Бичлэг нь зах зухаасаа олон нийтэд ил болсон байдаг. Гэтэл өнөөдөр Б.Содномдаржаа ор тас мартагдчихлаа. Яг адил байдалд орсон, яг адил эрх нь зөрчигдсөн нэг хүнээ бүр хаячхаад нэгийг нь л онцлоод байгаа нь шударга юм уу. Б.Содномдаржаагаар дуусахгүй, цаана нь хэрэг үйлдсэн ч, үйлдээгүй ч шоронд дэглүүлж, эрүүдэн шүүлгэж байгаа мянга мянган шүүгдэгч, хоригдлууд бий. Тэдний асуудлыг хэзээ ярих вэ. Хэзээ өнгөцхөн илж таалахаа больж, хууль хүчний байгууллагын энэ завхралаа системээр нь нураах юм бэ дарга нар аа.

Б.ЦЭЛМЭГ

Энэ мэдээнд өгөх таны үнэлгээ

Хуваалцаарай Жиргээрэй