ТОДРУУЛГА: МҮИС-ийн НИСГЭГЧИЙН АНГИ 3.2 сая төгрөгийн төлбөртэй, 50 оюутан суралцуулна

Монгол Улсын Их Сургууль /МУИС/ -тай нэрний хувьд адил төстэйн учир хөдөө орон нутгаас ирсэн оюутнууд ихээр андуурч суралцдаг Монголын Үндэсний Их Сургууль /МҮИС/ ирж буй хичээлийн жилд онгоцны нисгэгчийн ангиа нээж байна. МҮИС 1998 онд “Чандмань Эрдэнэ” нэртэйгээр байгуулагдаж байсан түүхтэй. Хожим 2002 онд коллеж болж, 2004 онд дээд сургуулийн статус руу шилжсэн байдаг. Харин их сургууль болсон нь 2013 он.

-ШИНЭ САЛБАР СУРГУУЛЬДАА ДӨРВӨН МЭРГЭЖЛЭЭР ЭЛСЭЛТ АВНА-

МҮИС нийт 98 мэргэжилд оюутан элсүүлдэг. Эмч, багш, инженер төдийгүй Брэнд менежэр ч энэ сургуулиас төрөн гарах боломжтой. Ийнхүү олон мэргэжлийн анги нь энэ жил дөрвөөр нэмэгдсэний дотор онгоцны нисгэгчийнх багтжээ.

Чамгүй сайн маркетинг хийдэг МҮИС-ийн тус ангийг нээж буй тухай мэдээлэл нийгмийн сүлжээнд цацагдмагц, хүмүүс нэг талдаа басаж, нэг талдаа бахархаж хүлээн авч байв. Харин бид шинэ нээгдэж буй салбар сургуулийнх нь талаар холбогдох ажилтнаас тодруулсан юм.

Агаарын тээврийн салбар сургууль энэ хичээлийн жилээс элсэлт авч эхэлж буй аж. Үүнд: Нисгэгчийн, Агаарын тээврийн үйлчилгээний, Нисэх механик техникийн, Алсын жолоодлоготой нислэг буюу дронны гэсэн үндсэн дөрвөн мэргэжлийн хөтөлбөр багтаж буй. Иймээс нисгэгчээс гадна онгоцны үйлчлэгч, дрон нисгэгчийг ч  бакалаврын түвшинд бэлтгэдэг болж байгаа нь онцлог харагдлаа.

-ОЮУТНЫ КВОТ 50, НЭГ ХИЧЭЭЛИЙН ЖИЛИЙН ТӨЛБӨР 3.2 САЯ ТӨГРӨГ-

Уг шинэ салбар сургуулийг БНСУ-ын Ёнсэй их сургуульд онгоцны техникч, механикчаар докторын зэрэг хамгаалсан Ким Ён Жин хэмээх хүн удирдана. Түүний орчуулагчтай холбогдож тодруулахад, дээрх үндсэн дөрвөн мэргэжлийг дандаа солонгос багш нар заана гэв. Одоогийн байдлаар монгол багш байхгүй хэмээсэн нь анхаарал татна.

Хөтөлбөрийн онцлог нь 2+2 буюу хоёр жил Монголд суралцаад, үлдсэн хоёр жилээ БСНУ-ын Кёнүн их сургуульд суралцан төгсөх аж. Нэг ангид дээд тал нь 50 хүүхэд элсүүлнэ. Англи болон Монгол хэлний ЭЕШ-ын оноо 410-с дээш байх шаардлагыг тавьж буй. Нэг хичээлийн жилийн төлбөр 3.2 сая төгрөг. Харин Агаарын тээврийн үйлчилгээний ангийн төлбөр ганцаараа 2.7 сая төгрөг гэлээ.

Ким Ён Жин докторын орчуулагч эмэгтэй цааш, “АНУ-ын онгоцны нисгэгч нарыг бэлтгэдэг ICAO гэдэг стандарт бий. Үүнийг Солонгосчууд шууд авч, мөрддөг. Ийм учраас манай сургалтыг мөн дэлхийн жишигт нийцсэн, тэр стандарттай гэж ойлгож болно. Хоёр жил Монголд сураад, хоёр жил Солонгост сурахад хөтөлбөрийн зөрүү гарахгүй. Дөрвөн солонгос багш маань уригдаад ирчихсэн. Оюутнуудыг давхар солонгос хэлний хичээлээр нь сайн шахна. Гадны оронд онгоцны нисгэгчээр суръя гэвэл асар өндөр үнэ төлдөг. Манай сургууль ийм хямд төлбөртэй, том боломжийг оруулж ирээд байна” хэмээсэн юм.

-ICAO СТАНДАРТ БОЛОН НИСГЭГЧ БЭЛДДЭГГҮЙ МАНАЙ ОРОН-

ICAO гэдэг нь International Civil Aviation Organization буюу Олон улсын иргэний нисэхийн холбоо хэмээх НҮБ-ын харьяа байгууллага юм байна. Тус байгууллагаас олон улсын иргэний нисэхийн аюулгүй байдлын мөрдөх хэм хэмжээ, дүрэм журмыг зохицуулж өгдөг аж. Мөн нисгэгчийн бэлтгэл, сургуулилтад тавих стандартыг тогтоодог гэж ойлгож болно. Ийм учраас дэлхийн аль ч оронд онгоцны нисгэгчийн курс, сургалт хичээллүүлэх бол уг байгууллагаас тогтоосон стандартыг баримтлах учиртай гэсэн үг.

Манай орны хувьд мэргэжлийн онгоцны нисгэгч бэлддэггүй байсан. Ийм учраас нисгэгч болох хүсэлтэй залуус ОХУ-ын нисэхийн сургууль болон Украйны агаарын тээврийн сургуулийг зорьдог. Үүнээс гадна БНСУ, БНХАУ-д суралцаж төгссөн нисгэгчид цөөн тоогоор бий.

Дотооддоо огт бэлддэггүй байсан энэ мэргэжлийг МҮИС “гярхай” олж харж, анх удаа сургалтын хөтөлбөртөө оруулж ирсэн нь энэ. Иргэдээс шүүмжлэл, магтаал хоёрыг зэрэг сонсдог Үндэсний их сургуулийн шинэ маркетинг онгоцны нисгэгчийн анги аж.

Х.ЭРХЭС

Энэ мэдээнд өгөх таны үнэлгээ

Хуваалцаарай Жиргээрэй