ЗАМЫН-ҮҮД ЯАСАН БЭ: Ерөнхий сайдын 30 хоног дуусаж, шинэ томилгоонууд “хөгзөрчээ”

Ерөнхий сайд Л.Оюун-Эрдэнэ долдугаар сарын 2-ны өдөр, Замын-Үүд хилийн боомтын нөхцөл байдлыг сайжруулах үүргийг холбогдох албан тушаалтнуудад өгч, “30 хоногийн дотор юу ч өөрчлөгдөхгүй бол хална, солино шүү” гэж мэдэгдсэн байдаг. Энэ нь хэвлэлийн албан мэдээгээр урссан билээ.

Тухайн үед Л.Алтангэрэл, Ц.Жавхланбаатар нарыг уг асуудалд Засгийн газар талын итгэмжлэгдсэн төлөөлөгч болгож томилсон. Харин “30 хоног” гэж ярьснаас хэд хоногийн дараа, Замын-Үүдэд гүйцэтгэх ажиллагаа болсны хойно НМХГ-ын дарга Л.Эрдэнэчулуун, Улаанбаатар хот дахь Гаалийн газрын даргын түр орлон гүйцэтгэгч Б.Отгонсүх нарыг тийш нь явуулсан. Мөн өөр хилийн боомтууд дээрх байцаагч нарыг ээлжээр Замын-Үүдэд солигдож ажиллах хуваарь гаргасан. Томилгооны хувьд ийм.

Харин дараа нь Замын-Үүдэд холбогдох таван даргыг албан тушаалаас нь чөлөөлж, авлигын хэргээр саатуулсан. Гэхдээ ямар нэг хариуцлага хүлээлгэлгүй суллачихсан тухай мэдээлэл түгсэн. Нэг үгээр хэнд ч хариуцлага тооцсон шиг тооцоогүй. Шинээр томилогсод нь ч олигтой ажиллаж гавиагүй. Ийм нэг өдрүүд 30 хоног даваад талийж явна.

30 ХОНОГ ӨНГӨРСӨН, ХЭН ХЭНД ХАРИУЦЛАГА ТООЦОХ ВЭ

Замын-Үүдийн нөхцөл байдалд өөрчлөгдсөн ганц зүйл нь бараг л нөгөөх ариутгалын хаалга. Бусад нь, тэндэх хүнд суртал, ачаа барааны үнэ буураагүй, болиогүй байгааг тэндэх эх сурвалжууд мэдээлж байгаа юм. Түүнчлэн шинээр томилогдож ирсэн дарга нар нь хувьдаа тодорхой “мөнгө хийх” зорилго тээж, очсон ч гэх.

Өөрөөр хэлбэл “30 хоногт юу ч өөрчлөгдөхгүй бол...” хэмээж байсныгаа Ерөнхий сайд Л.Оюун-Эрдэнэ эргэн санах нь зүйтэй болжээ. Энэ хүмүүс тэндээ хэзээг хүртэл, юуг хүлээж ажиллах вэ, амьдрах вэ. Үр дүн гаргахгүй, урд хөршийн талтай олигтой хувилбараар хэлцэл хийж чадахгүй, эндээ л нэг том царайтай суугаад байвал лав асуудал шийдэгдэхгүй гэлтэй.

30 хоног талийж өнгөрсөн тул хэн хэнээс хариуцлага нэхэх ёстой вэ.

Нэг. Засгийн газрын итгэмжлэгдсэн төлөөлөгч Л.Алтангэрэл, Ц.Жавхланбаатар нар ажлаа хийх. Нэгэнт анхнаас Засгийн ажил болж, өндөр авсан энэ үйл ажиллагааг нэр нүүртэй дуусгах идэвх, шахалтыг яагаад хийхгүй байна вэ.

Хоёр. Замын-Үүдэд шинээр томилогдсон хурган дарга нар.

Тэднийг нэрлэвэл:

• Оронд нь Улаанбаатар хот дахь Гаалийн газрын даргын үүргийг түр орлон гүйцэтгэгч Б.Отгонсүх. Тэр Замын-Үүд дэх Гаалийн газрын дарга асан. Д.Зоригоогийн албан тушаалд очсон.  
• В.Намхайнямбуу ажиллана. Тэр хилийн 0108-р ангийн захирагч, хурандаа Б.Нямбатын албан тушаалд очсон.
• Дорноговь аймгийн Авто тээврийн төвийн дарга н.Сүхбаатар ажиллана. Тэр АТҮТ-ийн Замын-Үүд дэх салбарын дарга А.Хатансайханы албан тушаалд очсон.
• Оронд нь НМХГ-ын дарга Л.Эрдэнэчулуун ажиллана. Тэр Замын-Үүд боомт дахь Хилийн мэргэжлийн хяналтын албаны даргын үүргийг түр орлон гүйцэтгэгч С.Цогбадрахын албан тушаалд очсон.

ТӨР ЭНД Л ИРГЭДДЭЭ ХЭРЭГТЭЙ

Хил дээр үүсдэг мафийн шинжтэй үйл ажиллагаа коронавируст цар тахлын үед улам нарийсаж, битүү шинжтэй болсон. Зөвхөн эрх ашигтай, улс төр-бизнесийн томоохон тоглогчдын ачаа бараа хилээр асуудалгүй урсаж, орж ирсээр байсан. Харин нийт ард иргэдийн амьжиргаагаа залгуулах бүх бараа эргэлт зогсож, тээврийн зардал нь хэд дахин өсчихөөд буй.

Энэ байдлыг оройтсон ч сөхөж, мафийн орой дээр суугаа хүмүүст битүү мессеж өгсөн нь харьцангуй залуу Засгийн газрын зориг гэлтэй л байсан. Яг үнэндээ халж сольж, томилсон хурган дарга нараас илүү Төрийн ордонд суугаа зарим эрх, дархтнууд л Замын-Үүд дэх нөхцөл байдлыг атгаж, ёстой л нөгөө “чиглэл” өгч суудаг.

Гэхдээ эхлүүлсэн ажилд үр дүн гарах ёстой. Энэ бол харзнаж, тэгсхийгээд өнгөрөх асуудал биш. Бослого тэмцэл гарахад ч хэзээ мөдгүй дуудаж мэдэх, ард нийтийн тэвчээрийг барсан том гацаа. Хэчнээн чөлөөт эдийн засаг гэж “мөөрдөг” ч яг ийм үед л төр иргэддээ хэрэгтэй болдог. Харин төр асуудлыг иргэддээ зориулан шийдэж өгдөг, чаддаг байх ёстой болохоос хэдэн сандал суудал сольж, “30 хоног” гэж хий сүрдүүлээд өнгөрдөг байж болохгүй билээ.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй