НЭРС: У.Хүрэлсүхийн нөлөөгөөр ТӨРД НААЛДАГСАД ажлаа үл хийх ч, халаас нь түнтийжээ

Өнөөгийн улс төрд У.Хүрэлсүх гэдэг нэр ихээхэн жинтэй. Хүн нь ч өөрөө хүчтэй. Одоо тэр Монгол Улсын Ерөнхийлөгч. Харин энэ хугацаанд түүнтэй найз, нөхрийн харилцаагаа ашиглаж, төрийн өндөр албан тушаалд томилогдсон, том мөнгөн дээр суусан хүмүүс цөөнгүй. Нэрийг нь барьж, энд тэндхийн суудал эзлэгсэд ч багагүй. Мөртлөө тэд ажлаа хийдэггүй. “Би У.Хүрэлсүхийн хүн шүү” гэх ганц хэлэх үг, хамгаалах бамбайтай гэлтэй.

Тэгвэл, улс төрийн хүрээнд ил, далд хэлэлцэгддэг У.Хүрэлсүхийн хамаарал бүхий сайд, дарга нарын талаар өгүүлээд үзье.

НАЙЗ НАР: У.ХҮРЭЛСҮХЭЭР “КРАНДУУЛААД” АЖЛАА ҮЛ ХИЙГСЭД

УУХҮ-ийн сайд Г.Ёндон.

Тэр У.Хүрэлсүхийн дотнын найз гэгдэнэ. “Монголросцветмет” ТӨҮГ-т орлогч захирлаар очиход нь У.Хүрэлсүх шууд нөлөөлсөн гэж яригддаг. Сайд болоод У.Хүрэлсүхийн танхимаас Л.Оюун-Эрдэнийнхэд дамжиж үлдсэн.

Түүнийг УУХҮ-ийн салбарыг хариуцаж байх үес Монгол Улс уул уурхайн түүхийн эдийн экспортоос үлэмж ашиг олох боломжийг алдаж, хилийн боомтуудаа удаа дараа доголдуулсан. Хамгийн сүүлд улсаараа шатахууны нөөцгүй болсон асуудалд ч түүний ажилдаа хойрго, санаачилгагүй хандсан асуудал нөлөөлсөн.

“Монголросцветмет”-ийн Орлогч захирал байхдаа хүүхдийнхээ сургалтын төлбөрийг байгууллагын данснаас төлсөн нь ил болж байв.

ХОМ: Хадгаламж нь гурван жилд гурав дахин өссөн

Тэр 2018 онд анх “Монголросцветмет” ТӨҮГ-д Ерөнхий захирлын үйлдвэрлэл эрхэлсэн орлогчоор томилогдоход:

• Өөрийн орлого нь 152.4 сая төгрөг
• Хадгаламж нь 91.9 сая төгрөг байсан.

Харин жилийн дараа орлого нь 1.3 дахин өсөж, 204 сая төгрөг болсон. Харин гурван жилийн дараа хадгаламж нь гурав дахин өсөж, 277 сая төгрөгт хүрсэн.

ЗТХ-ийн сайд Л.Халтар.

Л.Халтар сайд Зам тээврийн хөгжлийн яаманд мөн 2018 оны үес, У.Хүрэлсүхийн нөлөөгөөр хөл тавьсан. Тэд тодорхой төсөл, хөтөлбөрүүд дээр У.Хүрэлсүхийн чиглэлээр хамтарч ажилласан гэгддэг.

Мөн л Л.Оюун-Эрдэнийн танхимд дамжиж үлдсэн сайд нарын нэг. У.Хүрэлсүх, Л.Халтар нарыг дотнын найзууд гэж улс төрийн хүрээнд ярьцгаана. Ерөнхийдөө энэ суудалд очоод У.Хүрэлсүхийн имиж болох ажлуудыг зүтгүүлж өгсөн үү гэхээс толгой мэдэж салбарын ирээдүйн төлөө ажилласан нь бага гэх.

Зам тээврийн хөгжлийн яаманд хоёр жил дэд сайд, нэг жил сайд хийхэд нь Налайх, Дарханы замын ажил ч гүйцэд гараас гарсангүй. Гол нь, цар тахлын үед тэр салбараа зүгээр л “унтуулав”. Экспорт, импортын урсгал хил, гаалийн шалтгаанаар саатаж байхад тэр тээвэр, ложистик талаас нь юу ч хийсэнгүй.

ХОМ: Хадгаламж тогтвортой, орлого нь буурсан

Тэр 2015 онд “Улаанбаатар төмөр зам” ХНН-ийн Орлогч даргаар томилогдоход:

• Өөрийн орлого нь 75.8 сая төгрөг
• Хадгаламжийн хэмжээ мэдүүлэгдээгүй байв.

Харин 2018-2019 оны хооронд ЗТХ-ийн Дэд сайдаар ажиллахад орлого нь 3.4 дахин өсөж, 264 сая төгрөг болсон. Харин хадгаламж нь 315.6 сая төгрөг гэдэг дүн дээр өдгөөг хүртэл тогтвортой мэдүүлэгджээ.

АМГТГ-ын дарга Х.Хэрлэн.

Х.Хэрлэн Хэнтийнх, У.Хүрэлсүхтэй нэг нутаг. Түүнийг АМГТГ-т Кадастрын хэлтсийн дарга байхдаа ашигт малтмалын тусгай зөвшөөрлүүдийг хууль бусаар, давхардуулан олгосон гэх хэргээр шалгуулж байсан талаар хэвлэлд бичжээ.

“Монгол шуудан”, “Монголын төмөр зам”, “Дарханы төмөрлөгийн үйлдвэр” гэхчлэн төрийн өмчит компаниудад даргын албан тушаал хашиж ирсэн. Харин дахиад л 2017 оны арванхоёрдугаар сард У.Хүрэлсүхийн нөлөөгөөр АМГТГ-ын даргаар томилогджээ.

Очсоноосоо хойш гялтайх ажил ганцыг ч хийсэнгүй. Шатахууны асуудалд түүний хариуцлага ч мөн сөхөгдөх учиртай. Дэд дарга Ц.Эрдэнэбаяр нь бүхний өмнө ил гарч мэдээлэл хийх боловч Х.Хэрлэн үргэлж тайзны ард.

ХОМ: Дөрвөн жилд орлого нь 12.5 дахин өсжээ

2017 онд түүний:

• Өөрийн орлого 115.3 сая төгрөг
• Хадгаламж нь мэдүүлэгдээгүй байв. 2018 онд 151.6 сая төгрөгийн хадгаламжтай гэж мэдүүлжээ.

Харин дөрвөн жилийн дотор түүний орлого бүхэл бүтэн 12.5 дахин нэмэгдэж, 1 тэрбум 401 сая төгрөг болсон байна. Түүнчлэн 1.1 тэрбум төгрөгийн хадгаламжтай болжээ.

ТӨБЗГ-ын дарга Б.Цэнгэл.

Б.Цэнгэл У.Хүрэлсүхийг Ерөнхий сайд байхад зөвлөхөөр нь ажиллаж байсан. Ойрын хүн, дотнын найз гэгдэнэ. Тэр “Монголын төмөр зам” ТӨХК-ийн Гүйцэтгэх захирлаар ажиллаж байсан нь 2017 он.

Харин 2020 онд Ковидын үеийн түр хуулийг ашиглаж, тэр сонгон шалгаруулалтгүйгээр ТӨБЗГ-ын даргаар томилогдсон. Тэгээд эндээ гүрийчихсэн. Дарга нар төрийн өмчит компаниудыг дураар “сааж” байхад тэр үл дуугарна.

Энэ албан тушаалд асар их лоббины огтлолцол дээр л сууж буй агуулга харагдана уу гэхээс өөр гялтайх зүйл үгүй. Хувийнхаа ажлыг л амжуулдаг нэгэн гэж яригддаг.

ХОМ: Орлого нь 4.7 дахин өсжээ

Тэр 2017 онд “Монголын төмөр зам” ХХК-ийн Гүйцэтгэх захирал байхдаа:

• Өөрийн орлого 2.4 сая төгрөг гэж мэдүүлсэн бол
• Хадгаламжаа мэдүүлээгүй байсан. Харин 2018 онд 90.7 сая төгрөгийн хадгаламжтай гэж мэдүүлжээ.

Ийн 2020 онд, ТӨБЗГ-ын дарга болсон хойно өөрийн орлого нь 4.7 дахин өсөж, 11.4 сая төгрөг болжээ. Харин 164.5 сая төгрөгийн хадгаламжтай гэж мэдүүлжээ.

ТЭМДЭГЛЭЛ: Тэдний орлого, хадгаламж У.Хүрэлсүхийн нөлөөгөөр тодорхой албан тушаалд томилогдсоноос нь хойш өссөн зүй тогтол харагдана. Компанийн хувьцаа эзэмшил нь өөрчлөгдөөгүй, нэмж бизнес эрхлээгүй. Мөн томилогдсон огноо нь 2017 оны сүүл, 2018 онд давхцаж байгаа нь ч У.Хүрэлсүхийн нөлөөтэй гэдгийг илтгэнэ.

НЭР БАРИГСАД: “У.ХҮРЭЛСҮХ” ГЭЖ ТАРНИА УНШААД, ТӨРД НААЛДАНА

У.Хүрэлсүхтэй бүр нэг их найз нөхрийн харилцаа байхгүй ч нэрийг нь барьж, төрд “наалдагсад” бол цөөнгүй. Хөшигний ардах нюансаар бичвэл нэрс урсаж өгнө.

Тэднээс товчхон нэрлэвэл:

• Батлан хамгаалахын сайд Г.Сайханбаяр. Мөн У.Хүрэлсүхийн найз гэгдэх бөгөөд, сайдын албандаа тогтвортой үлдсэн шалтгаан нь үүнтэй холбоотой.
• БОАЖ-ын Дэд сайд Ц.Батбаяр. У.Хүрэлсүхийн нэрийг барьж, албан тушаалдаа үлддэг, бамбайлдаг. Нэг их идэж, хөлжсөн нь бага ч Дэд сайдын ажлаа ер хийж гавьдаггүй нэгэн гэгдэнэ.
• ИНЕГ-ын дарга асан Л.Бямбасүрэн. Тэр өчнөөн балбуулавч энэ суудалдаа “У.Хүрэлсүх” гэдэг тарниа уншсаар л төдий хүртэл тэссэн. Асар их авлигын хэргүүдэд холбогдох боловч энэ шугамаар эр зориг нь эрчилж байв.
• ШШГЕГ-ын дарга Д.Загджав. Мөн У.Хүрэлсүхийн нэрийг барьж, төрийн өндөр албан тушаалд дамжин томилогдогч. Муу нэр ихтэй. Гэвч “У.Хүрэлсүх” гэдэг нэр мартуулан баллуурдана.
• Худалдан авах ажиллагааны газрын дарга Х.Улам-Өрнөх. Сайд асан, УИХ-ын гишүүн Д.Сарангэрэлийн хүү. Энэ шугамаар У.Хүрэлсүхийг “найрч”, мөн  төрийн өндөр албан тушаалд томилогдсон гэгдэнэ.
• БНХАУ-д суух Онц бөгөөд бүрэн эрхт элчин сайд Т.Бадрал. Тэр ОБЕГ-ын дарга байсан. Ноднин Элчин сайдаар явахаас нь өмнө түүнийг АТГ-аас шалгаж, нэлээд сандаргасан гэх. Гэвч У.Хүрэлсүхийн нэр, нөлөөгөөр мөн л мултарч, БНХАУ-д Элчингээр томилогдсон.
• ЗГХЭГ-ын Дэд дарга асан Б.Энх-Амгалан. Тэр 2020 онд эл албан тушаалд томилогдохоосоо өмнө У.Хүрэлсүхийн ахлах зөвлөхөөр гурван жил ажилласан. Түүнтэй дотно андлах бөгөөд бүр цэргийн найз нь гэгдэнэ. Албаны, амины олон ажилд хамтарч, ажилласан түүхтэй.
• АШУҮИС-ийн захирал Н.Хүрэлбаатар. Тэр У.Хүрэлсүхийн ойрын хүн бөгөөд Ерөнхий сайд байхад нь ажлын албаны дарга, ахлах зөвлөхөөр нь ажиллаж байв.

СЭТГҮҮЛЧИЙН ТЭМДЭГЛЭЛ: У.Хүрэлсүхээр “крандуулж”, төрийн өндөр албан тушаалд томилогдсон үй олон эрхмүүдийн үрээр түүний халаас түнтгэр явдаг ч байж болох. Тэр бизнес эрхэлсэн түүхгүй боловч 1.7 тэрбум төгрөгийн хадгаламжтай.

Одоо У.Хүрэлсүх магадгүй хаанчилж байна. Гэвч улс төрөөс халаагаа өгөхдөө дагуул олон найз нараа, нэрийг нь барьж төрд наалдагсдаа зэрэг “хуулаад” л буугаасай билээ. Төрийн албаны мерит зарчмаа барих эрүүл тогтолцоог залуу үедээ үлдээгээсэй.

Энэ мэдээнд өгөх таны үнэлгээ

Хуваалцаарай Жиргээрэй