Харийн нутагт амьдран, эх орныхоо нэрийг дэлхийд дуурсгаж яваа монгол залуус цөөнгүй. Тэдний нэг нь БНСУ-ын холимог тулааны “Road FC” холбоонд тоглодог Мөнгөнцоожийн Нандин-Эрдэнэ.
Тэрбээр 2019 онд “Драгон хаус” холбооны аварга Н.Отгонбаатарыг ялж, Монголын холимог тулааны MFC холбооны анхны аварга болсон.
Мэргэжлийн дэвжээнд 2014 оноос хойш хүч сорьж буй М.Нандин-Эрдэнэ уржигдар АНУ-ын дэвжээнд MFC холбооны аварга цолоо хамгааллаа. Эл тулаанд Монголоос түүнтэй хамт Гавьяат тамирчин П.Өнөрбат, “Ангууч” хочит Г.Баттөр, Ө.Тэмүүжин нар Америкийн дэвжээнд өрсөлдөөд бүгд ялсан.
Олимп, ДАШТ-ий мөнгөн медальт Н.Төгсцогт, Армийн дэлхийн аварга Б.Чинзориг тэргүүтэй шилдэг боксчдын анхны багш, Гавьяат дасгалжуулагч А.Гантулгын шавь М.Нандин-Эрдэнэ өмнө нь сонирхогчийн боксоор хичээллэдэг байсан юм.
УАШТ-ий өсвөр үеийнхэд дөрөв, залуучуудынхад гурван жил завсаргүй түрүүлсэн, насанд хүрэгчдийнхээс хоёр алтан медальтай тэрбээр Азийн дэд аварга.
2018 онд нэг сая ам.долларын төлөө 32 тамирчинтай өрсөлдөхдөө шилдэг наймд шалгарсан М.Нандин-Эрдэнэ 2017 онд “Road FC”-ийн хүнд цохилтын эзэн шагнал хүртсэн.
Тэрбээр 2019 онд “Korean all boxing counsulin” (KABC) холбооны БНСУ-ын аварга, өнгөрсөн жил WAKO холбооны Солонгосын аварга болсон юм.
Үүний сацуу М.Нандин-Эрдэнэ 2019 онд боксын УАШТ-д өрсөлдөөд хүрэл медаль хүртсэн нь олны сонирхлыг ихэд татсан. Учир нь тэрбээр боксын улсын аваргад 11 жилийн дараа хүч сориод тийм амжилт гаргасан юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.