FACT CHECK: Д.Загджав A-Cool-д өгсөн цолоо ХУУЛЬД БАЙХГҮЙ заалтаар худал тайлбарлажээ

Лхагва гарагийн Хууль зүйн байнгын хорооны хуралдаанд ШШГЕГ-ын дарга Д.Загджав УИХ-ын гишүүдийн асуултад хариулсан. Энэ үеэр Б.Энхбаяр гишүүн түүнээс дуучин A-Cool буюу Б.Анхбаярт холбогдох асуудлыг тодруулсан юм.

Ингэхдээ “Танай салбар яаж цолоо олгодог вэ. Дуучин A-Cool-д хошууч цол олгосон байсан. Миний мэдэхийн их л өндөр цол. Тэр хэдэн төгрөгийн тэтгэвэрт гарах вэ. Өндөр тэтгэвэрт гарах гэсэн дурын хүнд нь цол олгоод байвал татвар төлөгчдийн мөнгө байхгүй болно шүү дээ” хэмээсэн.

Харин ШШГЕГ-ын дарга Д.Загджав хариулахдаа “Цэргийн албаны тухай хуулийн дагуу цолыг олгодог. Шаардлагатай тохиолдолд тусгай мэргэжилтэнд, амжилтанд нь үндэслэн, хугацаанаас нь өмнө цэргийн цол өгөх боломжтой байдаг. Үүний дагуу  Цэргийн дуу бүжгийн эрдмийн чуулгын даргаар томилогдсон тул дуучин Б.Анхбаярт хошууч цол олгосон. ШШГЕГ-ын дарга дэд хурандаа хүртэл цол олгодог. Б.Анхбаяр албан хаасан хугацаанаас хамаарч тэтгэвэр авна, иймд одоо хэдэн төгрөгийн тэтгэвэр авахыг хэлэх боломжгүй” гэсэн юм.

Түүний хариултад Fact Check хийх буюу баримтыг нягтлан шалгаж үзлээ.

Цэргийн албаны тухай хуулиар Б.Анхбаярт хошууч цол олгох боломжгүй

ШШГЕГ-ын дарга Д.Загджавын дурдсан Цэргийн албаны тухай хуульд “Цэргийн цол” гэсэн бүлэг бий. Үүний 26-р зүйлд “Цэргийн цол олгох албан тушаалтан” гэж нарийвчилсан байна. Энэ хэсэгт, дунд офицерийн цол буюу хошуучийг цэргийн дээд байгууллагын удирдлага олгоно гэж заагаагүй. Харин дэслэгч, хурандааг олгоно гэж заажээ.

Мөн тус хуулийн 26.7-д “Офицер, ахлагчид цэргийн цолыг анхны цолноос эхлэн дэс дараалан олгоно” гэж заасан байна. Үүгээр дуучин Б.Анхбаярт цэргийн цол өгвөл дэслэгчээс эхлүүлэх ёстой байсан логик харагдаж байна.

Нөгөөтээгүүр, Монгол Улсын Ерөнхийлөгчийн зарлигаар батлагдсан Цэргийн цол олгох журам бий. Энэ журмыг аливаа цэргийн байгууллагын алба хаагчид цол олгох асуудалд голчлон үндэс болгодог байна.

Тэгвэл энэ журмын:

2.10-т, “...цэргийн цол олгохдоо албан тушаалын цолны зэрэглэл, боловсрол, мэргэжилдээ дадлагажсан байдал, ажлын үзүүлэлт, хоёр цолны зэрэглэлийн дараагийн цолыг олгох бол тухайн албан тушаалд тэнцэж буй эсэх, офицерийн ёс зүй зэрэг шалгуурыг багтаасан тодорхойлолтыг үндэслэл болгоно” гэж

20.12-т “...Офицер, ахлагчид цэргийн цол олгох асуудлыг цэргийн нэгтгэл, анги, байгууллагын захирагч, дарга нар шийдвэрлэх буюу цол олгох үндэслэл, тодорхойлолт, саналаа удирдах дээд байгууллагад уламжилна” гэж тус тус заажээ.

Хошууч нь дунд офицерийн цол юм.

Дуучин Б.Анхбаяр Цэргийн тэтгэвэр, тэтгэмжийн тухай хуулиар тэтгэвэр авах боломжгүй

Түүнчлэн ШШГЕГ-ын дарга Д.Загджав нь дуучин Б.Анхбаярыг ажилласан жилээс хамааран тэтгэвэр авна гэж хариулсан. Тэгвэл, Цэргийн тэтгэвэр, тэтгэмжийн тухай хуулиар: “25-аас доошгүй жил цэргийн албанд алба хаасан эрэгтэйд тэтгэвэр тогтоолгох эрх үүснэ” гэж заасан байна. Өөрөөр хэлбэл хошууч цолонд ноогдох цэргийн албаны тэтгэврийг Б.Анхбаяр 25 жилийн дараа авах боломжтой болох нь.

Харин ажилласан жилээ НДШ төлсөнд оруулан тооцуулж болох заалт 22-р зүйлд тусжээ. Тодруулбал, 22.1-т “Генерал, офицер, ахлагч, түрүүч, байлдагчаар 10-аас доош жил алба хаасан бол уг хугацааг тухайн иргэний нийгмийн даатгалын шимтгэл төлсөн хугацаанд оруулан тооцно” гэж заасан байна.

Иймд ШШГЕГ-ын дарга Д.Загджав нь Б.Анхбаярт хошууч цол олгосон үндэслэлээ хуулийн дагуу тайлбарлаж чадаагүй байна.

Энэ мэдээнд өгөх таны үнэлгээ

Хуваалцаарай Жиргээрэй