ХЭРГИЙН МӨРӨӨР: Хятадуудаас 854 саяыг авсан гэх Гашуунсухайтын байцаагчийг хоёр шатны шүүхээс цагаатгажээ

"Хилийн боомтуудад авлига, албан тушаалаа урвуулан ашигладаг хэргүүд маш их гардаг. Тэндэхийн байцаагчид даам гарсан. Иргэдийг аргагүй байдалд оруулж, хясан боогдуулах замаар авлига авдаг" гэх мэдээллүүдийг олон ч иргэд хэлж, гомдоллодог. Тэгвэл дээрх мэт асуудлуудыг хууль хяналтын байгууллагынхан ил болгож, хэргийг нь шийдэж байгаа нь сайшаалтай.

Энэ удаагийн "Хэргийн мөрөөр" нийтлэлдээ Иргэний харьяалал шилжилт хөдөлгөөний газрын Өмнөговь аймгийн Гашуун сухайт боомтын мэргэжилтэн, улсын байцаагчаар ажиллаж байсан Г.Батзоригийн хууль бусаар хөрөнгөжсөн гэх хэргийг сөхөх гэж байна. Энэ хэрэг аль 2012 оноос эхлэлтэй бөгөөд тэр үеэр Г.Батзоригийн өөрийн болон хамаарал бүхий этгээдүүдийн дансаар БНХАУ-аас юанийн гүйлгээ хийгдэж эхэлсэн байдаг аж. Гэвч хэрэг нь арван жилийн дараа ч шийдэгдээгүй байгаа нь хачирхалтай.

-ӨӨРИЙН БОЛОН БУСДЫН ДАНСААР НИЙТ 854 САЯ ТӨГРӨГ ШИЛЖҮҮЛЖ, ХУУЛЬ БУСААР ХӨРӨНГӨЖСӨН ХЭРЭГТ ХОЛБОГДЖЭЭ-

Тэрбээр өөрийн болон бусдын дансаар нийт 182 удаагийн гүйлгээгээр 3,584,264.67 юань буюу 854,141,219.58 төгрөгийг орлогыг өөрийн хууль бус орлогоосоо гадна олж хууль бусаар хөрөнгөжсөн нь гэмт хэрэгт холбогдсон байх юм.

-Г.Батзоригийн эцэг Н.Гансүхийн ХААН банкны ... тоот дансаар 2012 оны 05 дугаар сарын 01-ний өдрөөс 2014 оны 12 дугаар сарын 31-ны өдрийн хооронд 47 удаагийн гүйлгээгээр 1,453,574.29 юань буюу 323,703,943.43 төгрөг,

-Голомт банкны ... тоот дансаар 2012 оны 12 дугаар сарын 07-ны өдрөөс 2014 оны 07-р сарын 11-ны өдрийн хооронд 7 удаагийн гүйлгээгээр 163,056.56 юань буюу 36,650,020.52 төгрөг,

-Н.Гансүх болон төрсөн дүү Г.Золбоо нарын хамтарсан Хаан банкны ... дугаартай юанийн дансаар 2012 оны 05 дугаар сарын 01-ний өдрөөс 2014 оны 12 дугаар сарын 31-ний өдрийг дуусталх хугацаанд 45 удаагийн гүйлгээгээр 926,841.27 юань буюу 260,262,865.27 төгрөг,

-Өөрийн төрсөн ах Г.Зоригтбаярын Хаан банкны ...дугаарын дансаар 2012 оны 05 дугаар сарын 01-ний өдрөөс 2013 оны 03 дугаар сарын 26-ны өдрийг дуусталх хугацаанд 16 удаагийн гүйлгээгээр 565,303.87 юань буюу 119,554,501.46 төгрөг,

-Өөрийн эхнэр Б.Сарангоогийн Хаан банкны ... дугаартай дансаар 2012 оны 05 дугаар сарын 01-ний өдрөөс 2014 оны 12 дугаар сарын 31-ний өдрийг дуусталх хугацаанд 62 удаагийн гүйлгээгээр 466,383.93 юань буюу 111,731,243.25 төгрөг,

-Өөрийн салсан эхнэр О.Нандинцэцэгийн Хаан банкны ... дугаартай дансаар 2012 оны 05 дугаар сарын 01-ний өдрөөс 2014 оны 04 дүгээр сарын 29-ний өдрийг дуусталх хугацаанд 6 удаагийн гүйлгээгээр 4,102.94 юань буюу 971,695.10 төгрөг,

-Г.Батзоригийн өөрийн Хаан банкны ... дугаартай юанийн дансаар 2014 оны 12 дугаар сарын 31-ний өдрийг дуусталх хугацаанд 6 удаагийн гүйлгээ хийгдэж 5,002 юань буюу 1,266,950.64 төгрөг шилжжээ.

-ӨМӨЗО-НЫ ИРГЭД Г.БАТЗОРИГИЙГ ТОРГУУЛЬ ТАВИАД, ДАНС РУУ МӨНГӨ ХИЙЛГЭДЭГ БАЙСАН" ХЭМЭЭН МЭДҮҮЛЖЭЭ-

Г.Батзоригийн хувьд эл хэргээ хүлээдэггүй бөгөөд түүний хамаарал бүхий этгээдүүд нь ч дансаар мөнгө орж гарсан асуудлыг өөр өөрөөр мэдүүлдэг аж.

Харин түүний данс руу мөнгө шилжүүлдэг байсан гэх Бүгд Найрамдах Хятад Ард Улсын Өвөрмонголын Өөртөө Засах орны иргэд болох нүүрсний наймаа эрхэлдэг Чимгээ, XURENOIMUGE буюу Д.Шүрэнчимэг, Б.Батцагаан, Э.Эрдэнэгэрэл, Ш.Зоригту нар "Г.Батзориг нь гаргасан зөрчилд торгууль тавьж, дансны дугаар өгч, энэ данс руу тэдэн юанийг торгуульд хийж, баримтыг авч ир гэж хэлээд өгсөн дансандаа мөнгө хийлгүүлдэг байсан” гэсэн мэдүүлгийг өгчээ. Түүнээс гадна бусад гэрчүүд болон албан татварын тайлан гэх мэт бичгийн нотлох баримтуудаар Г.Батзориг дээрх хэргийг үйлдэж, хууль бусаар хөрөнгөжсөн нь нотлогдсон гэж прокурор яллах дүгнэлт үйлдсэн байх юм.

Хачирхалтай нь эл хэргийг Өмнөговь аймгийн Ханбогд сум дахь сум дундын шүүхээс 2021 оны 11 дүгээр сарын 10-ны өдрийн 126 дугаар тогтоолоороо хэрэгсэхгүй болгож, Г.Батзоригийг цагаатгах шийдвэр гаргасан байна. Түүнчлэн Давж заалдах шатны шүүх нь ч анхан шатны шүүхийн шийдвэрийг хэвээр үлдээж, Г.Батзоригийг хууль бусаар хөрөнгөжөөгүй, гэмгүй нэгэн хэмээн цагаатгасан байна.

Харин прокуророос үүнийг эсэргүүцсэнээр Дээд шүүх эл хэргийг 2022 оны тавдугаар сарын 18-ны өдөр авч хэлэлцсэн байна. Улмаар анхан болон давж заалдах шатны шүүхийн гаргасан цагаатгах тогтоолыг хүчингүй болгож, хэргийг дахин хэлэлцүүлэхээр анхан шатны шүүхэд буцааж шийдвэрлээд байна. Тэгэхээр арван жил сунжирсан дээрх авлига, хууль бусаар хөрөнгөжсөн гэх хэргийг анхан шатны шүүх дахиад эхнээс нь хэлэлцэх нь. Шүүхийнхэн ч энэ хэрэгт оролцоотой байж болзошгүйг анхан болон давж заалдах шатны шүүхийн шийдвэрээс харж болохоор байна. Эл хэргийг хэрхэн шийдэхийг бид эргэн мэдээлэх болно.

Б.ЦЭЛМЭГ

Энэ мэдээнд өгөх таны үнэлгээ

Хуваалцаарай Жиргээрэй