ЭРТ ИЛРҮҮЛЭГ: Хүүхдүүдэд шүд, нүдний өвчлөл, томчуудад хоол боловсруулах тогтолцооны эмгэг өндөр байна

Засгийн газрын хуралдааны шийдвэрийн талаар сайд нар мэдээлэл хийлээ. Энэ үеэр Эрүүл мэндийн сайд С.Энхболд 2022 оны тавдугаар сарын 1-нээс эхэлсэн эрт илрүүлэгт хэчнээн хүн хамрагдаад буй, ямар өвчлөлүүд бүртгэгдэж буйг танилцууллаа.

Тэрбээр "2022.08.24-ний байдлаар урьдчилан сэргийлэх үзлэг оношилгоонд 272,434 иргэн хамрагдаад байна. Үүний 55.3 нь эмэгтэйчүүд, 44.6 хувь эрэгтэйчүүд.

Нийт хамрагдсан иргэдийн 170 мянга орчим нь хүүхэд. Хүүхдэд хамгийн их бүртгэгдсэн нь амны хөндийн өвчлөл. Ялангуяа шүд цооролт, шүдний гаж хөгжлүүд, нүдний харааны өөрчлөлтүүд илэрсэн.

Эрт илрүүлэгт хамрагдсан иргэдийн:

• 51.4 хувь нь Улаанбаатар хотынх
• 48.5 хувь нь орон нутгийнх.

Дараах дүүргийн иргэд урьдчилсан сэргийлэх үзлэгт идэвхтэй хамрагдаж байна.

• Баянзүрх
• Баянгол
• Сонгинохайрхан.

Дараах аймагт урьдчилсан сэргийлэх үзлэгийн идэвх өндөр байна.

• Төв
• Хөвсгөл
• Дархан-Уул аймаг.

Эрт илрүүлэгт хамрагдаад буй 272,434 иргэнээс давхардсан тоогоор 136141 өвчлөлт бүртгэгдсэн. Энэ нь нийт хамрагдсан тохиолдлын 57.2 хувь гэсэн үг.

Давхардсан тоогоор бүртгэгдсэн өвчлөлийн дийлэнх буюу 66.4 нь хоол боловсруулах тогтолцооны эмгэгтэй байна. Харин дотоод шүүрэл, шээс, бэлгийн зам, амьсгал зэрэг удаах байруудыг эзэлж байна.

Урьдчилсан сэргийлэх үзлэгээр хортой болон хоргүй хавдрын сэжигтэй 844 тохиолдол бүртгэгдсэн. Үүний 201 нь хортой байх магадлалтай гэдэг нь эхний шинжилгээгээр тогтоогдсон. Уг иргэд дараагийн шатлалын эмнэлгүүд дээрээ очиж, өндөр өртөгтэй шинжилгээ өгч, оношоо баталгаажуулдаг.

Мөн урьдчилсан сэргийлэх үзлэгээр бэлгийн замын өвчлөлүүд нэлээн илэрч байна. Хариу, тандалтын арга хэмжээг мэргэжлийн байгууллагууд зохион байгуулж байгаа.

Урьдчилсан сэргийлэх үзлэгийг зургаан насны багцаар зохион байгуулж буй. Төлбөрийг Эрүүл мэндийн даатгалын сангаас хариуцаж байгаа. Хамгийн дээд талын багц 150 мянгынх. Эмнэлгүүдийн хүчин чадал, боловсон хүчинд тулгуурлаж эмнэлгүүдийг сонгон шалгаруулж явсан. Төр болон хувийн хэвшлийн 118 эмнэлэг дээр улсын хэмжээнд урьдчилсан сэргийлэх үзлэгийг зохион байгуулж буй. Хүний нөөцтэй нь уялдуулж, өдөрт 40-60 хүнийг үзлэгт хамруулахаар төлөвлөсөн. Орон нутгийн иргэд аймгийнхаа нэгдсэн эмнэлэгт очоод урьдчилсан сэргийлэх үзлэгт хамрагдах боломжтой. 0-17 насны хүүхдүүд анхан буюу өрхийн эмнэлэг, сумын эрүүл мэндийн төв дээрээ хамрагдана. Урьдчилсан сэргийлэх үзлэг эхнээсээ үр дүнгээ өгч буй тул үзлэгтээ идэвхтэй хамрагдахыг уриалж байна" гэсэн юм.

Энэ мэдээнд өгөх таны үнэлгээ

Хуваалцаарай Жиргээрэй