ХӨШИГНИЙ АРД: "Давхар дээл"-тэй дөрвөө авч үлдэн, О.Цогтгэрэл, Н.Ганибал нарыг урих хувилбар

Л.Оюун-Эрдэнэ Засгийн газраа 100 хувь намаасаа, "давхар дээл"-тэй сайдаар бүрдүүлэхээр тооцож байсан. Гэвч баасан гарагт гэнэт АН, ХҮН-ыг нэмэх саналаа намын удирдлагууд болон төрийн өндөрлөгүүдэд танилцуулсан. Гэхдээ хамтрах эсэхээ энэ өнгөрөгч амралтын өдрүүдэд "бясалгана" гэдгээ ч хэлсэн байдаг.

АН-аас О.Цогтгэрэл, Н.Ганибал нарт сайдын суудал санал болгох уу

Хамгийн хошин нь түүнийг "бясалгаж" байх зуур АН-аас сайдад яригдсан С.Одонтуяа, О.Цогтгэрэл тэргүүтнээ С.Эрдэнийн талынхан намаасаа хөөж буйгаа мэдэгдэв. ХҮН-аас Д.Доржханд сайдын суудал авахгүй гэдгээ өмнө нь илэрхийлчихсэн байв.

Ийм нөхцөлд Л.Оюун-Эрдэнэ бусад намдаас ганц нэг хүн нэрлэж, намынхаа Удирдах зөвлөлөөр оруулах сонголт үлдэв.

Мэдээж "АН ба ХҮН-д сайдын санал тавина" гэх мэдээ МАН-ын 62-ын бүлэгт таалагдаагүй. Гишүүд үүнд ихээхэн дургүй байгаа хэдий ч Л.Оюун-Эрдэнэ, Д.Амарбаясгалан нар энэ амралтын өдрүүдэд сайд болох мөрөөдөлтэй намынхаа гишүүдийг огт дуудаж уулзаагүй байна. Тэд дэмий л бачимдсаар өнгөрөөсөн гэх.

Өнөөх хоёрын хувьд хамтарсан гэхээс илүүтэй зарим сайн толгойг сөрөг хүчнээс засагт оруулж ирэх, Эрдэнэбүрэнгийн УЦС ба барууныханд "хөөрхөн" харагдах, 2024 оны сонгуулийн цаадах өдөр зэргийг бодолцож буй. Тэд,

1. О.Цогтгэрэл
2. Н.Ганибал нарт санал тавих агуулга хүчтэй яригджээ.

Тэдний хувьд ч сайдын суудлын амбицаа хөшигний ард тодорхой илэрхийлсэн гэгдэж буй.

Нам дотроосоо Удирдах зөвлөл рүү орох хамгийн өндөр магадлалтай гишүүд

Бид өмнөх прогноздоо УИХ-д хоёроос дээш удаа сонгогдсон, Байнгын хороо ахалсан гишүүдээс "давхар дээл"-тэй сайд сонгох талаар бичиж байна. Энэ товьёог ерөнхийдөө өөрчлөгдөөгүй. Гэхдээ эдгээр нь ЖДҮХС, Хөгжлийн банкны зээлд нэр холбогдоогүй байх шаардлага тавигдах аж.

1. Н.Учрал
2. Ж.Мөнхбат
3. Ч.Хүрэлбаатар
4. Б.Чойжилсүрэн
5. Ж.Ганбаатар
6. Х.Болорчулуун
7. Б.Саранчимэг
8. Д.Тогтохсүрэн.

Эдгээр нэр өнөөдрийн Удирдах зөвлөлийн хурлаар орох хамгийн өндөр магадлалтай байна.

Дөрвөн "давхар дээл"-тэй сайдаа үлдээх шийдэлд "хүрчээ"

1. Х.Нямбаатар
2. Б.Жавхлан
3. С.Амарсайхан
4. Л.Энх-Амгалан.

Учир нь, Шинэ Засгийн газрын анхны зурагт Х.Нямбаатар, Б.Жавхлан нар багтаж байсан. Үүн дээр МАН-ын генсек Д.Амарбаясгалангийн зүгээс өөрийнх нь өмнөх сайд нараас ганцхан С.Амарсайханыг үлдээх гуйлт тавьсан.

Л.Энх-Амгалан бизнес хүнийхээ хувиар яг ажлаа өгдгийн даваан дээр салбарынхаа реформыг утгаар нь хийсэн учраас олон нийтийн хандлагаа бодсон ч үлдээсэн нь зөв гэх шийдэлд хүрсэн гэж харагдаж байна.

Ерөнхийлөгч У.Хүрэлсүхийн санал

1. Батлан хамгаалахын сайд Г.Сайханбаяр
2. Гадаад харилцааны сайд Б.Батцэцэг нар үлдэх тохироо үндсэндээ хийгдсэн гэж ойлгогдов.

Үүн дээр нэмээд "дан дээл"-тэй хоёр сайд үлдэнэ гэх мэдээлэл байна.

Нэмэгдэх магадлалтай сайд нарын нэршил:

1. Боомтын асуудал хариуцсан сайд
2. Хотын асуудал хариуцсан сайд
3. Тэргүүн дэд Шадар сайд

Тайлбарламж: Нийслэлийн засаг дарга Д.Сумъяабазарыг хотын асуудлаар сайдын статустай болгоно гэгдэж буй. Боомт дээр жинхэнэ хоёр хөрштэй координат үүсгэж чадах хүн тооцож байгаа аж.

Ж.МЯДАГБАДАМ

Энэ мэдээнд өгөх таны үнэлгээ

Хуваалцаарай Жиргээрэй