Нягталъя: "Ковид"-оос хойш Бээжин рүү огт нисээгүй, тийз нь 10 саяд хүрээгүй

Улаанбаатар-Бээжин чиглэлийн нислэгийн тийз 10 сая төгрөгт хүрсэн гэх зураг бүхий мэдээлэл цахим орчинд түгээд буй. Бид уг мэдээллийг эш үндэстэй, үнэн бодит эсэхийг нягталлаа.

"Нягталсан нь", нэг: Nisleg.mn сайт руу орж, есдүгээр сарын 7-ны өдөр Бээжин рүү нислэг товлогдсон эсэх, үнэхээр ийм үнэтэй байгаа эсэхийг харлаа. Ингэхэд тухайн өдөр ямар ч нислэг товлогдоогүй байв.

"Нягталсан нь", хоёр: Nisleg.mn сайтын лавлах дугаар руу залгаж, сошиалаар яваад буй зураг эвлүүлэг үү, эсвэл үнэхээр нислэг товлогдоод дүүрсэн үү гэдгийг тодруулав.

Ингэхэд "БНХАУ-ын хил хаагдсанаас хойш өнөөдрийг хүртэл Бээжин рүү нэг ч нислэг хийгдээгүй. Сошиалд түгээд буй тэр зураг бол худлаа үнэ. Сайт шинэчлэл хийх үед ийм алдаатай үнэ, нислэгийн мэдээлэл гарч ирсэн байх. Түүнээс Бээжин рүү нэг ч нислэг товлогдоогүй, огт хийгдэхгүй байгаа" гэдэг мэдээллийг өглөө.

Үүний дараа БНХАУ руу явж сурах оюутнууд чухам хэзээний нислэгээр явах боломжтой буйг тодрууллаа. Ингэхэд:

• МИАТ есдүгээр сарын 8, 11, 17, 18, 22, 25, 29-ний өдрүүдэд Гуанжоу хот руу нислэг үйлдэх аж. Гэхдээ визтэй хүмүүс л явах боломжтой байх нь. Тус компани БНХАУ-ын хил хааснаас хойш тийш нэг ч нислэг үйлдээгүй. Энэ оны долоо, наймдугаар сард Гуанжоу руу тус, тус нэг нислэг үйлджээ. Нэг талын тийз 2.2 сая төгрөгийн ханштай байна.

• "Аэро Монголиа" есдүгээр сарын 23-нд Хөх хот руу ганцхан удаа нислэг үйлдэх аж. Мөн визтэй хүмүүс л явах боломжтой ба нэг талын нислэгийн тийз 3.2 сая төгрөг байна.

Энэ мэдээнд өгөх таны үнэлгээ

Хуваалцаарай Жиргээрэй