Хэргийн мөрөөр: Макс Жонсон Засгийн газрыг Арбитрт өгч, 50 сая ам.долларын хохирол нэхэмжилжээ

Борис Жонсоны дүү Макс Жонсон Засгийн газрыг Арбитрын шүүхэд өгөх мэдэгдэл илгээснийхээ дараа Монголд ирж, ХЗДХ-ийн сайд Х.Нямбаатартай уулзаад буцжээ.

Уг уулзалтын талаар Х.Нямбаатар сайд “Борис Жонсоны дүү сэтгэл хангалуун буцсан” гэж ярьсан. Харин Макс Жонсоны хувьд ойрын хугацаанд Монголын хууль, шүүхийн байгууллага хохирлыг нь барагдуулах чиглэлд дорвитой ажиллагаа явуулахгүй бол Арбитрын процессоо үргэлжлүүлнэ гэсэн байр суурь илэрхийлжээ.

Х.НЯМБААТАР САЙД МАКС ЖОНСОНЫГ НПГ, МӨРДӨХ БАЙЦААХ АЛБАНЫНХАНТАЙ УУЛЗУУЛЖЭЭ

Анх Макс Жонсон  2016 онд Хонгконгийн “GRF” хөрөнгө оруулалтын сангаар дамжуулан Дорноговь аймгийн  “Засаг Чандмань Майнз” компанийн уул уурхайн төсөлд 19 сая ам.долларын хөрөнгө оруулалт хийсэн байдаг. Гэвч “Засаг Чандмань Майнз”-ын захирал Д.Буянтогтох нэр бүхий иргэдтэй үгсэн хуйвалдах замаар 19 сая ам.долларыг хувьдаа ашигласан гэх үндэслэлээр Макс Жонсон Монголын шүүхэд нэхэмжлэл гаргах шаардлага үүссэн.

Улмаар Б.Буянтогтох хилийн хоригоо шүүхээр цуцлуулах замаар 2020 онд Монгол Улсын хилээр нэвтэрч, хэргийн явц удааширсаар өнөөг хүрсэн юм. Макс Жонсон уг асуудлаар Монголд хэд хэдэн удаа ирж, элчин сайдын яамныхаа тусламжтайгаар холбогдох уулзалтууд хийсээр ирсэн ч хэрэг нь шийдэгдэхгүй удааширсан байдаг.

Тиймээс АНУ-ын Вашингтон хот дахь хөрөнгө оруулалтын маргаан таслах арбитрын байгууллагад Монгол Улсын Засгийн газраас 50 сая ам.доллар нэхэмжлэх мэдэгдлээ хүргүүлсэн талаар гадаадын хэвлэлүүд мэдээлж байв.

Вашингтоны арбитраас Монгол Улсын Засгийн газар буюу манай ХЗДХЯ-нд өнгөрөгч сард мэдэгдэл хүргүүлсэн. Зохицуулалтаараа мэдэгдэл хүргүүлснээс хойших гурван сарын хугацаанд уг маргаан шийдэгдэхгүй бол шүүхийн процессыг эхлүүлдэг аж.

Засгийн газраас гадны хөрөнгө оруулагчдын эрх ашгийг хамгаална гэдгээ удаа дараа онцлон зарлаж буй. Энэ хүрээндээ Х.Нямбаатар сайд Макс Жонсонтой уулзаж, улмаар түүнийг НПГ, Улсын мөрдөн байцаах албадынхантай уулзуулсан аж. Тэдний зүгээс “Хохирлыг төлүүлэхэд анхаарсан” учраас хэрэг удааширсан гэх агуулгаар тайлбараа хийсэн аж.

Д.БУЯНТОГТОХ ОРОГНОЛ ХҮССЭН ТУЛ АНУ-ЫН ТАЛААС ӨГӨХӨӨС ТАТГАЛЗЖЭЭ

Уг хэргийн хариуцагч болох Д.Буянтогтох нь 2020 оны долдугаар сард хилээр гарч, эдүгээ АНУ-ын Чикаго хотноо байгаа аж. Түүнийг манай хуулийн байгууллагынхан олон улсын интерполын сүлжээнд хайх агуулгаар оруулаад нэлээд удаж буй. Харин Д.Буянтогтох АНУ-аас “Улс төрийн зорилгоор намайг яллах гээд байна” гэх үндэслэлээр орогнол хүссэн тул тус улсаас “хүчээр” авчрахыг зөвшөөрөхгүй байгаа аж.

Д.Буянтогтох нь манай редакцын өмнөх баримтат нийтлэлдээ бичиж байсанчлан УИХ-ын гишүүн Ж.Мөнхбатын эхнэрийн ТӨРСӨН АХ. Д.Буянтогтохын эхнэр П.Инж-Улбаа нь ТЕГ-ын дарга асан Б.Хурцын ойрын хамаатан юм. Д.Буянтогтох Хөгжлийн банк, бусад арилжааны банкуудаас зээл авах, хууль шүүхийн байгууллагатай холбоотой зарим асуудлаараа дээрх эрхмүүдээс нөлөөллийн дэмжлэг авч байсан гэгддэг.

Хэргийг мөрдөн шалгах явц удааширч гацсан гол шалтгааны нэгээр Д.Буянтогтохын зориудаар шүүхэд “нөлөөлөх” замаар хилийн хоригоо цуцлуулж, улмаар эх орондоо ирэхгүй “зугатаж” буй шалтгаан ордог.

ЯМАР ҮНДЭСЛЭЛЭЭР МАКС ЖОНСОН ЗАСГИЙН ГАЗРЫГ ХАРИУЦАГЧААР ТАТАХ НЭХЭМЖЛЭЛ АРБИТРТ ӨГСӨН БЭ

Макс Жонсон анхнаасаа Засгийн газарт хөрөнгө оруулаагүй. Монгол Улсын хувийн ААН-д өөрийн саналаар хөрөнгө оруулсан. Тэгэхээр эдүгээ яагаад Засгийн газрыг хариуцагчаар арбитрт дуудав гэдэг асуулт эндээс үүсч буй. Үүнийхээ үндэслэлийг:

Нэгдүгээрт,

Хэргийн үндсэн хариуцагч Д.Буянтогтох хилээр гараад удсан ч түүнийг эх оронд нь авчрах асуудлаар хуулийн байгууллагууд дорвитой алхам хийхгүй байсаар ч түүнийг орогнол хүсэхэд хүргэсэн. Мөн анхнаасаа хилийн хоригийг шүүхэд нөлөөлөх замаар цуцалсан гэх үндэслэл.

Хоёрдугаарт,

Өнгөрөгч хоёрдугаар сард Д.Буянтогтох нарыг яллагдагчаар татах тогтоолыг прокуророос гаргасан ч шүүх рүү шилжүүлэхгүй дарж байснаа хэрэгсэхгүй болгосон. Яллах тогтоолыг прокурорын шатанд буцаах тохиолдол харьцангуй цөөн гардаг. Үүнд улс төрийн нөлөөлөл орсон байж болох.

Эдгээр үндэслэлүүдээр эш татаж, Макс Жонсоны зүгээс Монгол Улсын Засгийн газар нь баталсан хуулийн тогтоомжийн хэрэгжилтийг ханган ажиллах Үндсэн хуулиар хүлээсэн үүргээ биелүүлэхгүй байна гэж үзэн, хариуцагчаар татах хүсэлт арбитрт өгчээ.

Өөрөөр хэлбэл, Макс Жонсон “Хууль хэрэгжүүлэгчид нь хуулийн биелэлтийг завхруулж байхад Засгийн газар нь үүнийг тоосонгүй” гэж үзсэн агуулга эндээс харагдана.

Д.Буянтогтох нарыг Эрүүгийн хуулийн,

Залилах зүйлчлэлээр,

17.3.2.2: Бусдад ноцтой, эсхүл их хэмжээний хохирол учруулж үйлдсэн бол арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ.

Мөнгө угаах зүйлчлэлээр,

18.6.2.2: Байнга тогтвортой үйлдсэн гэх үндэслэлээр яллагдагчаар татан татан шалгаж буй юм.

Ж.МЯДАГБАДАМ

Энэ агуулгаарх өмнөх контент:

БАРИМТ: Ж.Мөнхбатын ХҮРГЭН АХ Д.Буянтогтохын хөрөнгө оруулагчдыг 70 сая ам.доллараар хохироосон түүх контентыг ЭНД ДАРЖ уншина уу.

Энэ мэдээнд өгөх таны үнэлгээ

Хуваалцаарай Жиргээрэй