Сүүлийн саналыг эс хүлээж авбал "Рио Тинто" групп "TRQ"-ийг худалдан авах бодлоо орхино гэлээ

"Туркоиз Хилл Ресурсес" компанийн жижиг хувьцаа эзэмшигч "Pentwater Funds" нь "Рио Тинто" группийн саналыг доогуур үнэлээд байсан.

Тодруулбал "Бидэнд санал болгосон дүн нь ирэх 10 жилд бий болгохоор тооцсон мөнгөн урсгалын багахан л хэсэг. "Pentwater Funds" 2030 он хүртэл 10.5 тэрбум ам.доллараас илүүг энэ төслөөс босгож чадна гэж үзэж байгаа" гэж мэдэгдсэн байна.

Гэвч саналыг "Туркоиз Хилл Ресурсес" тал саналыг нэгэнтээ хүлээн аваад байгаа билээ. Одоо төлбөр шилжсэнээр гэрээ хүчин төгөлдөр болох үйл явц үлдээд буй талаар "Ройтерс" агентлаг мэдээлж байсан.

Гэвчиг үүнээс хойш жижиг хувьцаа эзэмшигчид үнэлгээнд сэтгэл дундуур байгаагаа дахин илэрхийлсэн дээрх үйл явдал нь анхаарал татаад байгаа юм. Үүнд "Рио Тинто" группийн Гүйцэтгэх захирал Якоб Стаусхолм өчигдөр буюу мягмар гарагт хэвлэлд өгсөн ярилцлагадаа байр суурь илэрхийлжээ. Тэрбээр “Жижиг хувьцаа эзэмшигчид саналаас татгалзвал дахин санал тавихгүй. Хувьцаа эзэмшигчид яг юу хүсэж байгааг ойлгохгүй байна. Энэ бол байж болох хамгийн өндөр дүн" гэсэн байна.

Эргэн сануулбал, "Рио Тинто" групп "Туркоиз Хилл Ресурсес" компанийн өөрсдийн эзэмшдэггүй 49 орчим хувийг 3.3 тэрбум ам.доллараах худалдан авах санал дээр тохиролцсон юм. Ингэснээр "Туркоиз Хилл Ресурсес" 100 хувь "Рио Тинто"-гийнх болж буй.

Нэг үгээр "Оюу толгой" төсөлд Монголын Засгийн газар ба "Рио Тинто" групп гэсэн хоёр хэрэгжүүлэгч тал үлдэж байгаа юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй