Б.Лхагвасүрэн: Монголд салбараа нээе гэж гадаадын ганц ч банк хандаагүй

УИХ-ын чуулган үргэлжилж байна. Өнөөдөр /2022.10.06/-ийн чуулганаар "Төрөөс мөнгөний бодлогын талаар 2023 онд баримтлах үндсэн чиглэл батлах тухай” тогтоолын төслийг хэлэлцэж байгаа юм.

Энэ үеэр УИХ-ын гишүүн Х.Баделхан "Бусад улс орнуудтай харьцуулахад манай улсын арилжааны банкнуудын зээлийн хүү маш өндөр байна. Өндөр хүүтэй зээл авч, аж ахуй явуулаад орлого олно гэдэг хэцүү. Ер нь гаднын банк оруулж ирж болохгүй юм уу. Бид 1990 оноос зах зээлийн нээлттэй эдийн засгийн харилцаанд шилжсэн. Зах зээлийн нээлттэй харилцаанд шилжсэн бусад орнууд гаднаас хүү багатай банк оруулж ирээд зээл олгож байгаа. Нэг биш олон банк оруулж ирж байна. Энэ тал дээр Монголбанк ямар бодлого барьж байгаа вэ?" гэлээ.

Түүний асуултад Монголбанкны Ерөнхийлөгч Б.Лхагвасүрэн "УИХ-аас зээлийн хүү бууруулах стратегийг баталсан. Энэ хүрээнд зээлийн хүүг бууруулах, ялангуяа эх үүсвэрийн хүүг огцом бууруулсан. Үр дүнгээр зээлийн хүү жилийн 14 хувь хүртлээ багассан.

Өнөөдрийн үйлчилж байгаа банкны тухай хуулиар бол хувийн өмчтэй, гаднын арилжааны банк Монголд бие даасан салбар байгуулах боломжтой. Хуулийн дагуу эхлээд төлөөлөгчийнхөө газрыг нээж, тодорхой хугацаа болсны дараа салбараа нээдэг. Монгол Улсад өнөөдрийг хүртэл зургаан банкны төлөөлөгчийн газар байсан боловч гурав нь гараад явчихлаа. БНХАУ-ын хоёр банкны төлөөлөгчийн газар, Японы нэг банкны төлөөлөгчийн газар байна. Гэхдээ хувийн секторын банк гэдэг үүднээсээ Японы банканд салбар нээж ажиллуулах боломж нь нээлттэй байгаа. Гэхдээ өнөөдрийг хүртэл Монголд салбараа нээе гэж гадаадын ганц ч банк хандаж ирээгүй. Бидний хувьд хууль, зохицуулалтынх нь дагуу шалгаад, зөвшөөрөл өгөхөд бэлэн байгаа.

Хэрэв төрийн өмчтэй банк байх юм бол тусгай хуулийн зохицуулалттай. Эхлээд Засгийн газраас зөвшөөрлөө аваад орж ирэх зохицуулалт байдаг" хэмээн хариулав.

Энэ мэдээнд өгөх таны үнэлгээ

Хуваалцаарай Жиргээрэй