УИХ-ын намрын чуулган аравдугаар сарын 3-нд нээлтээ хийсэн. Намрын чуулганаар 2023 оны төсвийн тухай хуулийн төслийг хэлэлцэж буй. Төсөв хэлэлцэж буйтай холбогдуулан D.parliament.mn сайтаар иргэдээс нээлттэй санал авч байгаа юм. Тодруулан хэлбэл, аравдугаар сарын 07-17-ны өдрүүдэд иргэдээс санал авч байна.
Гэхдээ иргэдээс авсан саналаа төсөвт хэрхэн тусгах вэ гэдэг нь анхаарал татна.
Учир нь 2023 оны төсвийн тухай хуулийн төсөлд: 2023 онд хөрөнгө оруулалтыг нэмэхгүй, өмнө эхлүүлсэн төслүүдээ дуусгана гэж тусгаад буй. Харин иргэд "Манай хороонд, суманд, аймагт тийм сургууль, цэцэрлэг хэрэгтэй байна. Тэр гудамж камергүй. Тийм л юм хийгээд өг" гэх мэтээр саналаа хэлэх нь мэдээж. Гэтэл хөрөнгө оруулалтад мөнгө төсөвлөхгүйгээ зарлачхаад иргэдээсээ санал авч байгаа нь зөрчилдөх боложтой. Өөрөөр хэлбэл, хэлбэрийн хэмжээний оролцоог л хангаж буй гэлтэй.
Бид УИХ-ын тамгын газраас иргэдээс ирсэн саналыг төсөвт хэрхэн тусгахаар төлөвлөж буйг тодрууллаа.
Ингэхэд "Энэ сарын 19-нд олон нийтийн нээлттэй хэлэлцүүлэг Төрийн ордонд болно. Үүнээс гарсан дүгнэлт, саналыг Төсвийн байнгын хороонд хүргүүлнэ. Төсвийн байнгын хороо шаардлагатай гэж үзсэн саналуудыг төсвийн тухай хуулийн төсөлд тусгана" хэмээв.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.