Сурвалжилга: Хуучин гутлаа засуулж өмсөх үү, шинийг худалдаж авах уу

ВИДЕО:

Өвөл айсуй. Айсуй энэ улиралд бэлтгэн улаанбаатарчууд өвлийн куртик, гутал, малгай, ороолт хайгаад тунчиг завгүй.

Өнгөрөгч мягмар гарагт манай сайтын сурвалжлах баг "Нарантуул" олон улсын худалдааны төв болон Улаанбаатар их дэлгүүрээр ороход өвлийн хувцас сонирхож яваа хүмүүс үнийг нь асуух ч наймаа хийлгүй эргэж буцсан дүр зурагтай байсан юм. Тэдэн дунд "Болохгүй бол гэрийнхээ зарим хэдийг хуучныг нь нааж оёод ч хамаагүй зүтгүүлнэ дээ" гэсэн нь ч байв.

Танилууд, найз нөхөд ч ялгаагүй "Өнгөрсөн жил өмссөн гутлаа энэ өвөл дахиад өмсчихнө дөө" гэх. Хүнсний үнийн өсөлт, инфляцын өсөлт иргэдийн амьдралыг туйлдуулж, үнэхээр өвлийн гутал авч чадахгүйд хүрсэн үү. Шинэ гутал авах мөнгөгүй тул хуучныгаа засварчин руу бариад гүйж буй нь үнэхээр бодит байдал уу гэдгийг бид энэ удаа сурвалжиллаа.

Эхлээд "Master shoes" нэртэй гутлын салоноор зочлов. Үйлчлүүлэгчгүй байлаа.

Тус салоны засварчин эмэгтэй "Шинэ гутал авах нь байтугай, гутлаа бүтэн засуулж чадахгүй, "Энэ жилдээ энийг нь янзлуулчихья, энэ нь яах уу" гэсэн хүмүүс байна. Ер нь бол гутлаа засуулдаг хүмүүс цөөрсөн шүү дээ. Тэгээд ч гутлын материал үнэтэй ирж байгаа юм, цаанаасаа. Тэгэхээр бид бас үнээ тодорхой хэмжээнд нэмнэ. Өдөрт дунджаар 10-15 хүн гутлаа засуулахаар өгч байна. Яг одоо бол манай дээр таван гутал засуулах гээд өгчихсөн байна. Үүний гурав нь өвлийнх. Хүмүүс өвлийн гутландаа өсгий, резин наалгуулж, цахилгаан хийлгүүлж байна. Бас түрүүг нь сунгуулж, цэвэрлэгээ хийлгүүлж байх жишээний. Гутал засварын үйлчилгээний ханш 5000-аас л дээш байна даа" хэмээв.

Эл гутлын салонаас гараад МУИС-ийн хажууд байдаг гутал засвар руу орлоо.

Гутал засварчин эрэгтэй "Шинэ гутал үнэтэй байна" гээд хуучнаа янзлуулж байна. Тэгтлээ хүйтрээгүй болохоор өвлийн гутал нэг их орж ирээгүй байна. Цас орсны дараах 3-4 хоногт өвлийн гутал нэлээд орж ирсэн. Дунджаар өдөртөө 3-4 гутал янзлуулахаар өгч байна. Хийлгэж буй засварын тухайд, "Халтираад байна" гээд резин наалгуулж байна. Бас цахилгааныг нь солиулж, улыг нь оёулж байна. Манайх үнэ ханш ер нь боломжийн.Зарим үйлчилгээ нь 8000. Зарим нь 12000 мянга гээд л. Анзаараад байх нь ээ, өвлийн гутландаа засвар, үйлчилгээ авч буй хүмүүсийн дийлэнх нь оюутнууд байна. Зарим хүмүүс "Мянган төгрөг, хоёр мянган төгрөг дутаад байна яах вэ" гэдэг л юм. Би байгаа мөнгөнд нь гутлыг нь засаад өгчихнө өө, хааяа" хэмээв.

Түүний хувьд, энэ жил шинээр гутал авахгүй. "Өнгөрсөн жил өмсөж байсан гутлаа өмсөнө" гэж байлаа.

Хүний хөдөлгөөн төвлөрсөн автобусны буудалтай ойр газар тул бид хэд, хэдэн хүнээс энэ жил өвлийн гутал шинээр авахаар төлөвлөж буйг нь тодруулаа. Ингэхэд:

Э.Намсрайдорж: Шинэ гутал авна даа. Гадуур гарч, үнэ ханшийг нь судлаагүй л байна. Уг нь бидэнд цаанаас гутал тавьж өгдөг ч аймар халтирдаг. Ер нь бол жил бүр өөрөө нэг гутал аваад, сэлгэж өмсдөг юм. Гэхдээ бид нарын гутал тэсдэггүй. Цаснаар зам дээр цацсан давсанд түлэгдээд, нэг жил л өмсөгддөг.

Д.Эрдэнэбулган: Шинээр авахаар төлөвлөж байна. Гэхдээ юмны өртөг жаахан өндөр байна. Цалин маань бас хаана ч хүрэлцэхгүй. Ийм л байна.

О.Батсуурь: Өнгөрсөн жил өмссөн гутлаа өмсөх боломжгүй. Багадчихдаг. Тэгэхээр энэ жил шинэ гутал авна даа.

Оюутан залуу: Үнэ ханшийг нь мэдэхгүй байна. Гэхдээ гутал шинээр авна даа.

С.Нямбаатар: Шинээр авахаар төлөвлөж байгаа. Гэхдээ энэ жил бусад жилүүдийнхээс үнэ ханш нь нэмэгдсэн байна лээ. Миний авах гэж буй гутал 500-600 орчим мянган төгрөг болсон байх жишээний.

Иргэн: Өө, өнгөрсөн жилийнхийгээ л өмсөнө ш тээ.

О.Мөнхжаргал: Ноднингийн гутал байгаа. Тэрийгээ л өмсөх байх даа.

Г.Дашзэвэг: Шинээр гутал авна даа дахиад. Өвлийн гутал 250 мянгатай л байна лээ.

Ийнхүү хуучин гутлаа өмсөж өвөлжинө гэх хүмүүс цөөн, дийлэнх нь шинэ гутал авна гэж байлаа. Гэхдээ шинэ гутал авна гэсэн иргэдийн ихэнх нь оюутнууд байсныг энд дурдах нь зүйтэй болов уу.

Энэ мэдээнд өгөх таны үнэлгээ

Хуваалцаарай Жиргээрэй