Д.Бауыржаныг Засаг даргаас чөлөөлжээ

Баян-Өлгий аймгийн Засаг дарга Д.Бауыржан 2022 оны арваннэгдүгээр сарын 30-нд албан тушаалаасаа чөлөөлөгдөх хүсэлтээ Ерөнхий сайдад өгсөн. Тэрбээр эрүүл мэндийн шалтгаанаар гадаадад эмчлүүлэх шаардлага үүссэн гэж байсан ч хүсэлтээ өгснөөс хэдхэн өдрийн дараа "Эрүүл мэндийн шалтгаан байгаа ч шахалт хавчлагын улмаас ийм шийдвэр гаргасан" тухайгаа ярьсан байдаг.

Чөлөөлөгдөх хүсэлтийг хүлээн авснаас хойш 14 хоногийн дотор Ерөнхий сайд шийдвэр гаргах үүрэгтэй. Эл хугацаа өнгөрч, Д.Бауыржаныг Засаг даргаас чөлөөлөх захирамжийг Ерөнхий сайд Л.Оюун-Эрдэнэ өчигдөр /2022.12.13/ гаргасан байна.

Ийнхүү түүнийг чөлөөлсөн тул хуульд заасан ёсоор: Орны хүнийг нь шинээр томилох хүртэл түүний бүрэн эрхийг Засаг даргын орлогч хэрэгжүүлэх нь ээ.

Д.Бауыржаны тухайд 2020 оны аравдугаар сарын 29-ний өдөр Ардчилсан намаас нэр дэвшигч Ш.Жандостой өрсөлдөж, аймгийн ИТХ-ын төлөөлөгчдийн 100 хувийн саналаар Баян-Өлгий аймгийн Засаг дарга болж байсан билээ.

Өмнө нь МАН-аас 2016-2020 оны хооронд аймгийн ИТХ-ын даргаар, МАН-ын хорооны даргаар ажиллаж байсан юм.

Хуульд зааснаар бол аймгийн Засаг даргад нэр дэвшигч:

• Дээд боловсролтой
• Төрийн албанд гурваас доошгүй жил ажилласан
• Шүүхийн шийдвэрээр тогтоогдсон зээл, батлан даалтын болон бусад гэрээгээр хүлээсэн хугацаа хэтэрсэн өргүй байх
• Шүүхийн шийдвэрээр тогтоогдсон татварын өр төлбөргүй байх
• Ялгүй байх ёстой.

Тус аймгийн ИТХ-ын төлөөлөгч, иргэдийн Нийтийн Хуралд оролцогч Засаг даргад дээрх шаардлагыг хангасан хүнийг нэр дэвшүүлнэ. Үүний дараа санал хураалт явуулж, олонхын санал авсан хүний нэрийг Ерөнхий сайд руу явуулах юм. Харин Ерөнхий сайд тухайн хүнийг томилж болно бас томилохоос татгалзаж болно.

Одоогоор Засаг даргын суудалд дөрвөн хүн санаархаж буй. Үүнийг бид өчигдөр та бүхэнд мэдээлсэн. Энд дарж унших боломжтой.

Энэ мэдээнд өгөх таны үнэлгээ

Хуваалцаарай Жиргээрэй