Хэргийн мөрөөр: Талийгаач охины дотор эрхтэн байгаагүй нь худал, дагзны гэмтэл үхэлд хүргэжээ

Баян-Өлгий аймгийн Өлгий суманд 2023 оны нэгдүгээр сарын 18-ны орой "рашаан авна" гэж гэрээсээ гараад сураггүй алга болсон Д.М охиныг энэ сарын 18-нд амиа алдсан байдалтай олсон билээ.

Охиныг аймгийн төвөөс 20 гаруй километрийн зайд шуудайд хийж хаясан байв. Эл онц ноцтой хэргийг Ардабек гэх 38 настай залуу үйлдсэн болох нь тогтоогдож, өдгөө цагдан хоригдоод байгаа юм.

Охин чухам яагаад харамсалтайгаар амиа алдах болов гэдэг нь анхаарал татаж байгаа хэргийн мөрөөр хүргэж байна.

Юун түрүүнд эл хэрэг дээр Баян-Өлгий аймгийн цагдаа нараас гадна Улаанбаатараас Эрүүгийн цагдаагийн албаныхан болон Эрүүгийн цагдаагийн Онц хүнд гэмт хэрэгтэй тэмцэх тасгийнхан очиж ажиллаж байгаа аж.

-Охины "дотор эрхтэн байхгүй байсан" гэдэг ХУДАЛ, дагзандаа авсан гэмтэл нь амиа алдах шалтгаан болжээ-

Охиныг олдохоос өмнө буюу сар шинийн баярын үеэр "Улаанбайшинт гэх газраас олдсон. Ингэхдээ дотор эрхтэнийг нь авчихсан байсан" гэх мэдээлэл нутаг оронд нь тархсан байна.

Тэгвэл энэхүү мэдээлэл ор үндэсгүй худал бөгөөд охин гаднын нөлөөтэй нас барсан аж.

Тодруулбал, дагзан тус газраа гэмтэл авсанаас амиа алдсан болох нь урьдчилсан байдлаар тогтоогдсон байна.

Уржигдар /2023.03.19/ задлан шинжилгээ хийхэд ийм дүгнэлт гарч. Одоо шинжилгээг Улаанбаатар луу явуулах бөгөөд албан ёсны хариу 21-30 хоногийн дараа гарах юм. Үүгээр хэзээ амиа алдсан зэрэг нарийн мэдээллүүд гарах билээ.

Харин охины амийг хөнөөсөн этгээд "Автомашинаас үсэрч унаад нас барсан" гэж мэдүүлээд байгаа аж.

Гэхдээ автомашинаас унасан гэх шарх сорви байгаагүй гэх мэдээлэл байна.

-Охиныг хөнөөсөн Ардабек Казакстан-Баян-Өлгий чиглэлд такси үйлчилгээнд явдаг-

Охины амь насанд хүрсэн этгээд Ардабек нь 38 настай болох нь олон нийтэд ил болсон.

Харин тэрбээр Казакстан-Баян-Өлгий чиглэлд такси үйлчилгээнд явдаг нэгэн аж. Эхнэрээсээ салсан, гэр бүлгүй гэх мэдээлэл бидэнд олдлоо.

Хэргийн холбогдогч тэрбээр охиныг алга болдог өдөр буюу нэгдүгээр сарын 18-нд өдөр хуримаас согтуу гарч яваад талийгаачтай танилцаж, машиндаа суулгаж явсан гэх мэдээлэл цахим орчинд тархаад байгааг олон нийт мэдэх билээ.

-Цэнгэл сумын цагдаа П.Баярсайхан, багийн дарга н.Баясгалан, үйлчлэгч н.Одмаа нарт ар гэр нь гомдолтой байна-

Тэгэхээр хэргийн ээдрээ энэхүү хуримнаас согтуу гарсан гэдгээс эхлэх учиртай юм. Согтуу залуугаас өмнө охиныг хуурай эгч нь болох н.Одмаа нь дуудаж явсан тухай ээж нь батлан ярьж байв. Одмаа нь ерөнхий боловсролын II сургуулийн үйлчлэгчээр ажилладаг нэгэн юм.

Бүр тодруулбал, рашаан авахаар гарсан охин хоёр найзтайгаа таарсан ч, "н.Одмаа эгч дуудаж байна" гэх шалтгаанаар салаад явсан байдаг. Охиныг дуудаад н.Одмаа хэсэг хамт сууж байгаад Цэнгэл сумын цагдаа П.Баярсайхан, Багийн дарга н.Баясгалан нарт өгч явуулсан гэдэг. Тэд шөнийн 2:00 цагт охиныг аймгийн төвд байрлах "Сансар" хүүхдийн дэлгүүрийн үүдэнд буулгаад явсны дараа өөр нэгэн машин ирж авч явж буй камерын бичлэгт үлдсэн.

Тэгэхээр энэ хэргийн гол сэжигтэн, бас мултарч үлдэж болзошгүй, шалгагдах учиртай хүмүүс бол П.Баярсайхан, н.Баясгалан, н.Одмаа нар юм.

Тэд охиныг алга болоод удаагүй байхад уулзсан гэх шалтгаанаар байцаагдаад, салаад явсан гэдэг үндэслэлээр холбогдогч биш болон мултарсан.

Харин ар гэрийнхнийх нь хувьд "тэднийг заавал шалгах учиртай байсан, эрт шалгааж байцаасан бол охиноо олох байсан. Хэрэгт холбоотой" гэх гомдол цөхрөл байгаа аж. Энэ дагуу прокурорын байгууллагад ч ханджээ.

-Цагдаагийн байгууллагын хүнд суртал-

Охиныг эрэн хайх ажиллагаанд Баян-Өлгийн цагдаагийн байгууллага хойрго хандсанд ар гэрийнхэн нь гомдолтой байгаагаа илэрхийлжээ.

Анх эрэн сурвалжлаад удаагүй байхад "Хүнтэй суугаад явчихсан юм биш үү" гэхчлэн гэрийнхнийг нь загнан буцааж, баривчилна гэдэг байсан тухай ээж нь ам нээв.

Мөн гуравдугаар сарын 18-нд охины цогцсыг олсон ч ар гэрийнхэнд нь мэдэгдээгүй хэрнээ, олон нийтийн сүлжээгээр цацсан гэв. Олон нийтийн сүлжээ, хэвлэл мэдээллийн хэрэгслээр охиныхоо тухай сонссон эхийг гүйгээд очиход харуулахгүй "прокурорын зөвшөөрөл аваад ир" хэмээн тавлаж, явдал чирэгдэл болжээ.

Түүнчлэн 60 хоног олон нийтийн анхаарал байсан эл хэргийн талаар одоо хүртэл мэдээлэл хийгээгүй байгаа юм. Очсон хэвлэл мэдээллийн хэрэгслийг хөөж тууж, "прокурорын зөвшөөрөлтэй мэдээлэл өгнө" гэх үгсээр ам тагласаар байгаа дүр зурагтай.

Энэ мэдээнд өгөх таны үнэлгээ

Хуваалцаарай Жиргээрэй