Сүүлийн барилдаануудад зодоглоогүй, допингд хардагдаж буй бөхчүүд

Туулай жилийн сар шинийн баярт зориулсан бөхийн барилдаанд шөвгөрсөн 16 бөхийг допингийн шинжилгээнд хамруулсан. Энэ жилийн шөвгийн 16 бөхийн шинжилгээний хариу гарч, нэг бөхөөс допинг илэрснийг зарласан. Монголын үндэсний бөхийн холбооны тэргүүн Ц.Магалжав хэвлэлд “Бөхчүүдийн хариу ирсэн. Нэг бөхийн шинжилгээний хариу эерэг гарсан нь үнэн. Журмаараа тухайн бөхөд бид хариуг танилцуулсан” хэмээсэн билээ.

Тухайн бөх Б сорьцын шинжилгээ өгөөгүй бөгөөд энэ нь А сорьцын хариугаа хүлээн зөвшөөрсөн хэрэг гэгддэг.

Олон нийтийн сүлжээ болон зарим нэр бүхий хэвлэл мэдээллийн хэрэгслээр тухайн бөхийг улсын арслан Э.Оюунболдыг хэмээн нэрлээд байв.

Devjee.mn сайтаас шалгаж үзэхэд тэрбээр гуравдугаар сарын 12-ноос хойших барилдаануудад зодоглоогүй байгаа юм.

-Допингийн шинжилгээ өгчхөөд сүүлийн барилдаануудад зодоглоогүй таван бөх-

Түүний дараа сар шинийн барилдаанд оролцсон бөхчүүдээс түүврийн аргаар буюу нэр цохож шинжилгээ авснаас ХОЁР бөхөөс илэрсэн байдаг.

Энэ тухай Ц.Магалжав “Одоо допингийн асуудалтай гурван бөхийг өршөөхгүй” гэдэг байдлаар илэрхийлсэн.

Сүүлийн хоёр бөх хэн бэ гэдэг асуулт, таамаг бөх сонирхогч, үндэсний спортод элэгтнүүд төдийгүй бөхчүүдийн дунд үүсээд байгаа билээ.

Ингэхдээ шинжилгээ өгчхөөд сүүлийн үеийн барилдаануудад зодоглоогүй бөхчүүдийг хардаж эхэлжээ.

Эл хардлагын дагуу барилдааны мэдээ мэдээлэлүүдийг Devjee.mn сайтаас шүүж үзлээ. Ингэхэд шинжилгээ өгсөн бөхчүүдээс дараах таван бөх сүүлийн үеийн барилдаануудад барилдаагүй байгаа аж.

Үүнд:

• Улсын Начин Д.Амарсайхан 2023.04.13
• Аймгийн Заан Көптилек 2023.04.29
• Аймгийн Арслан Б.Өсөхбаяр 2023.04.29
• Улсын Начин Э.Батмагнай 2023.04.30
• Улсын харцага Ц.Мөнхбаяр 2023.05.06

Эдгээр бөхчүүд тус огнооноос хойш Бөхийн өргөөнд болсон барилдаануудад ЗОДОГЛООГҮЙ.

Тэдний хоёроос нь допингийн төрлийн бодис илэрсэн гэсэн үг болж байгаа юм.

-Сар шинийн барилдааны нэгийн даваанд өвдөг шороодсон Ц.Мөнхбаяр допинг хэрэглэсэн үү-

Харин “Өдрийн сонин”-нд “Допинг хэрэглэсэн бөхчүүдийн нэг нь улсын харцага Ц.Мөнхбаяр байж болзошгүй” талаарх мэдээлэл нийтлэгдсэн байгаа юм.

Түүний хувьд сар шинийн барилдаанд зодоглохдоо нэгийн даваанд өвдөг шороодсон. Гэсэн хэдий ч МҮБХ-ноос түүнийг допинг хэрэглэсэн байх магадлалтай хэмээн үзэж, сүүлд дуудаж шинжилгээ авчээ. МҮБХ-ны удирдлагууд түүний асуудлыг тодруулж буй аж.

Харин бөхчүүдийн дунд түүнийг “хэн нэгний өмнөөс допинг хэрэглэгч болж байж болзошгүй” тухай шуум хөвөрч эхэлжээ.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй