Тина Тернерийн нэг сарын өмнөх ярилцлага: Би шударга, ярдаг, зугаатай хүн
Рок, сөүл хөгжмийн ертөнцөд 1960-аад оноос хойш хагас зууны турш дуулсан, “Рок-н-Роллын хатан хаан” Тина Тернер өчигдөр таалал төгслөө.
Түүний “The Guardian” сэтгүүлийн асуулт, хариултын буланд нас барахаасаа нэг сарын өмнө өгсөн товч ярилцлагыг орчуулан хүргэж байна.
-Таны хамгийн том айдас юу вэ?
-Өнгөрсөн рүү л буцмааргүй байна. Би амьдралаас тээж явах учиртай мах их зүйл хураасан.
-Таны санадаг хамгийн эрт цагийн дурсамж юу вэ?
-Модонд авирч тоглодог байсан үе. Эршүүд, сахилгагүй охин учраас үргэлж хувцсаа хайчилж, үсээ тайрдаг байлаа.
-Өөртөө харамсдаг зан чанар бий юү?
-Би өөрийнхөө юунд ч харамсдаггүй, гэхдээ би перфекционист (төгс байдлыг эрэлхийлэгч) хүн.
-Харин бусдад харамсдаг зан чанар?
-Миний амьдралыг шийдэх гэж оролдсон, шийдэж байсан тохиолдол дэндүү олон. Тэдний зөв гэж бодсон нь л миний алдаа.
-Өөрийгөө гурван үгээр тодорхойлооч?
-Шударга, ярдаг, зугаатай.
-Таныг супер чадвартай гэвэл тэр нь юу байх бол?
-Магадгүй 6 инчийн өсгийт дээр хийсэн тэр бүх тоглолтууд маань.
-Юу таныг гуниглуулдаг вэ?
-Би дотнын хүмүүсээ дэндүү эрт алдсан.
-Гадаад төрхөөсөө таалдаггүй юм бий юү?
-Байхгүй. Эмэгтэйчүүд гадаад төрхөө асар их анхаарах, шүүмжлэлтэй хандах шаардлагатай болдог. Эрчүүдэд тийм юм үгүй.
-Амьдралаас тань сэдэвлэсэн кино хийвэл хэнийг тоглуулах вэ?
-Анжела Бассет тоглосон шүү дээ. Бас мюзикл жүжгүүдэд маань тоглодог “Миний Тина”-нууд бий.
-Ямар зуршилдаа дургүй вэ?
-Аймшгийн кино ар араас нь үзэх.
-Нас нэмэхийн юу нь аймаар вэ?
-Юу нь ч биш. Амьдралын, өдөр бүрийн адал явдлыг би өөртөө зүгээр л хүлээн авдаг.
-Оддоос хэнийг харж явдаг вэ?
-Мик Жаггерт үргэлж крашилдаг байсан. “Rolling Stones”-тэй аялан тоглолтоор явах сайхан байсан.
-Алдар нэрийг сонгох уу, эсвэл нэрээ бичиж үлдээхээс татгалзах уу?
-Би алдар хүнд хүссэн, түүнийгээ авсан. Харин одоо, тэтгэвэрт гарчхаад даруухан амьдрах таатай байна.
-Хайр яаж мэдрэгддэг вэ?
-Гэдэс дотор угаалгын машин хувцас сэгсэрч байгаад унтрах шиг.
-“Хайртай” гэдэг үгийг үнэн сэтгэлээсээ хэлээгүй тохиолдол байдаг уу?
-Өөрийнхөө ч юм уу хүүхдүүдийнхээ амьдралаас айгаагүй л бол, үгүй.
-Өөрөөсөө татгалзъя гэвэл хэн болох вэ?
-Опра.
-Хамгийн сүүлд хэзээ ямар нэг чухал зүйлийн талаарх бодлоо өөрчилсөн бэ?
-Миний амьдралаар мюзикл хийнэ гэхэд нь продюсеруудад дургүй байгаагаа хэлсэн. Тэгээд бодлоо өөрчилсөн, тэр гарцаагүй зөв шийдэл болсон.
-Секс, мөнгө, алдар нэр гурвын алийг илүү хүсэх вэ?
-Миний насны хүнд өөр сонголт байхгүй юу?
-Та хэрхэн дурсагдмаар байна вэ?
-“Рок-н-Роллын хатан хаан” гэж. Өөрийнхөө зохиосон дүрмээр амжилтад хүрч болно гэдгийг бусад эмэгтэйчүүдэд батлан харуулснаараа.
-Бидэнд нэг нууцаа дэлгээч?
-Би “МакДональдс” идэх дуртай. Лондонд мюзиклээ анх үзчихээд, зочид буудал руу буцахдаа Эрвинийг “МакДональдс” явуулсан.
Г.САНСАРМАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.