ЗГ-таа тэрслэгч Ц.Даваасүрэнг ҮХӨ баталсны дараа сайдаас нь буулгах уу

Үндсэн хуульд өөрчлөлт оруулснаар,

• Парламентын гишүүдийн тоог 126 болгож нэмэгдүүлж
• Тэдний 76-г уламжлалт тойргоос, 50-ийг намын жагсаалтаас сонгодог болох юм.

Гишүүд иргэдэд концепцоо танилцуулах, санал авах зорилгоор хоёр удаа тойрог, тойрогтоо ажиллалаа. Өнөөдөр УИХ дахь намын бүлгүүд хуралдсанаар дээр дурдсан сүүлийн хувилбарт санал нэгдсэнээ зарласан юм. Маргааш Засгийн газар хуралдаж, ҮХӨ-ийг хэлэлцэнэ.

Баасан гарагийн чуулганы хуралдаанаар ҮХӨ-ийн эцсийн хэлэлцүүлгийг хийнэ гэж төлөвлөснөөс нь харахад, эрх баригчид энэ долоо хоногт Үндсэн хуулийг өөрчлөх чигтэй.

Ингэж өөрчлөх нь эрх баригч нам МАН-ын амбиц байсаар ирсэн. Гэхдээ залуу үе буюу өнөөгийн намын дарга, Ерөнхий сайд Л.Оюун-Эрдэнийн тэргүүлж буй бодлого хэмээн тодотгох нь зүйтэй.

Тэд өнгөрсөн 30 жил дэх алдааг засна, тогтолцооны гажуудлыг залруулна хэмээх амбиц зангидаад Үндсэн хуулиа өргөн утгаар нь өөрчлөх тухай мэдэгдсээр ирсэн байдаг. Ингэхдээ Үндсэн хуулийн цэцийг улс төрөөс хараат бус болгох, улс төрийн намын босгыг намсгах, Улаанбаатар хотын статусыг Үндсэн хуулиар баталгаажуулах, Ерөнхийлөгчийг парламентаас сонгодог болох, тэр бүү хэл хоёр танхимтай парламент байгуулах хэмжээнд ч ярьж, хэлэлцэж ирсэн.

Гэвчиг яв явсаар хоёрхон заалттай төсөл барьж үлдсэн нь шүүмжлүүштэй ч бага ч болов өөрчлөлт рүү тэмүүлж, хийж буйгаараа шинэ үзэгдэл юм.

Харин ЗГ-ын бодлого нэгдмэл байх учиртай. Нөгөө талаас УИХ-ын гишүүд ЗГ-ын бодлогыг эс дэмжвэл ажил урагшлахгүй. МАН дотроос ЗГ-ын бодлогыг шүүмжлэх өндөр магадлалтай, сонирхолтой хүмүүсийн нэг бол УИХ-ын гишүүн, БХБ-ын сайд Ц.Даваасүрэн юм.

Тэр гишүүн байхдаа ч "Оюу толгой"-н хэлэлцээ, "давхар дээл"-ийн асуудал зэрэг ЗГ-ын шийдвэрүүд дээр сөрөг дуугарч ирсэн. Харин түүнд сайдын суудал өгснөөр Үндсэн хуулийн өөрчлөлтөө дэмжүүлэх гэсэн логик гэж улс төрийн хүрээндээ уншигддаг. Ц.Даваасүрэн одоо ч Үндсэн хууль өөрчлөхийг төдийлөн дэмжихгүй, эсрэг байр сууриа олон нийтэд илэрхийлсээр байгаа юм.

БШУ-ы сайд асан Ц.Цогзолмаа ЗГ-ын бодлогод нэгдмэл ажиллаж чадахгүй гэдгээ илэрхийлснээр өөрийн хүсэлтээр ажлаа өгч байсан удаатай. Тэгвэл, өдгөө Үндсэн хуулийг өөрчилж авсны дараа Ц.Даваасүрэнг танхимаас явуулах, эсвэл өөрийн хүсэлтээр ажлаа өгөх нөхцөл байдлыг үүсгэх магадлалтай хэмээн яригдаж байна. Нөгөө талаар, УИХ-ын ээлжит сонгуулийн өмнө Ц.Даваасүрэнг “суллах” нь эргээд сөрөг пи-арын эхлэлийг тавьж болох тул улс төрийн өнцгөө хэрхэн харах нь тодорхойгүй юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй