Хэргийн мөрөөр: Хүргэн, хүү, охиноороо хуулийн хаалга татагч С.Эрдэнийн гэр бүл

УИХ-ын гишүүн асан С.Эрдэнийг шүүхээс хилээр гарахыг хориглож таслан сэргийлэх арга хэмжээ авсан асуудал анхаарал татав. Үүнийг сонгууль дөхсөнтэй холбоотой гэж үзэж ч буй.

Ингэхэд тэр гэр бүлээсээ хуулийн байгууллагад ганцаараа шалгуулагч биш. Хүргэн, хүү, охин нь тус тусын асуудлаар хуулийн байгууллагад шалгуулж байсан болон шалгуулж буй хэргүүдийг хүргэж байна.

-Капитал банканд сангийн 230 тэрбумыг байршуулаад алдсан хэргийг сэргээжээ-

С.Эрдэнэ: Уржигдар /2023.06.08/ шүүхээс түүнд хилийн хориг тавьсан нь улстөрийн хүрээнд шинэ мэдээлэл байлаа. "Капитал" банкны гэх хэргийг нь сэргээн шалгагдаж, яллагдагчаар татагдсан нь энэ байв.

Нийгмийн даатгалын сангийн хөрөнгийг буцаан төвлөрүүлээгүй, бусдад давуу байдал олгож, их хэмжээний хохирол учруулсан гэх хэрэгт яллагдагчаар татан шалгах хүсэлтээ АТГ 2019 онд гаргаж байв.

Түүнийг Хүн амын хөгжил, нийгмийн хамгааллын сайд, Нийгмийн даатгалын үндэсний зөвлөлийн даргаар ажиллаж байх хугацаанд НДЕГ-ын даргаар ажиллаж байсан Ц.Уртнасан болон НДЕГ-ын Санхүү, бүртгэлийн газрын дарга асан Ч.Чулуунчимэг нарыг Капитал банканд давуу байдал олгож тус сангийн 230 орчим тэрбум төгрөгийг шамшигдуулсан гэх хэрэгт холбогдуулан шалгаж байгаа юм. Гэвч удалгүй хэрэг хаагдсан. Прокурорын шатанд гэсэн үг.

АТГ-аас УЕПГ-т 2021 оны гуравдугаар сарын үес дахин хүсэлт гаргаж, хэргийг сэргээн шалгахаар болоод байжээ. Хэрэг ингэж сэргэж яллагдагчаар татан хилийн хориг тавиад байгаа нь энэ аж.

-Хүргэн Г.Энхболд өнгөрөгч тавдугаар сард бусдыг зодсон хэргээр шалгуулж эхэлжээ-

Хүргэн Г.Энхболд: Нийслэлийн Баянгол дүүргийн Иргэдийн төлөөлөгчдийн хурлын дарга асан.

Г.Энхболд нь бусдыг зодож, эрүүл мэндийг нь хохироосон хэрэгт тун саяхан холбогджээ. Тодруулбал, Өвөрхангай аймгийн Хархорин суманд явахдаа тавдугаар сарын сүүлээр АН-ын гишүүн Т.Хаянхярвааг зодож, эрүүл мэндэд хохирол учруулсан байж болзошгүй хэрэгт холбогдон цагдаагийн байгууллагад шалгуулж буй аж.

Т.Хаянхярваагийн гомдлын дагуу өдгөө хэргийг Хархорин сумын цагдаагийн байгууллага шалгаж байгаа аж.

-No war, Double standart хөдөлгөөнөөрөө ямагт хууль, шүүхийн хаалга татагч-

Хүү Э.Одбаяр: Тэрбээр No war, Double standart хөдөлгөөнөөрөө ямагт хууль, шүүхийн хаалга татдаг нэгэн.

Сүүлдээ энэ нь тоогоо алдсан. Аавын хаалга татчихгүйхэн шиг явсаар өдий хүрэв. Амьдарч буй дүүргээсээ гарахыг хориглуулах хүртэл арга хэмжээ авч байсан. Түүнд экс Ерөнхийлөгч Х.Баттулгаас эхлээд одоогийн Ерөнхий сайд Л.Оюун-Эрдэнэ хүртэл гомдол гаргасан.

2022 оны хоёрдугаар сард Дорнод аймгийн Чойбалсан суманд иргэн С-ийг автомашинаар дайрч байгаа бичлэг нийгмийн сүлжээнд тавигдсан бөгөөд Ерөнхий сайд Л.Оюун-Эрдэнийн хамаарал бүхий этгээд нь хохирогчийг автомашинаар санаатай мөргөөд, амь насанд нь аюултай нөхцөл байдалд тусламж үзүүлэлгүй орхиж зугтаасан байна гэдэг мэдээлэл тарсан.

Цаад үр дагавар нь урхагтай үйлдэл буюу “хүнийг санаатай дайраад тусламж үзүүлэлгүй зугтсан хэргийг Л.Оюун-Эрдэнийн хамаарал бүхий этгээд үйлдсэн байна” гэх мэдээллийг Э.Одбаяр олон нийтийн сүлжээнд цацсаныг шалгуулах нь зүйтэй гэж үзээд МАН-ын хуулийн хэлтсээс гомдол гаргасан байдаг.

Нөгөөх нь 2022 оны дөрөвдүгээр сард ШШГЕГ-ын харьяа 461 дүгээр хорих ангид цагдан хорих шийдвэрээр хоригдох гэж байсан иргэн Д.Монголхүүг Э.Одбаяр нарын таван хүн цагдан хорих байрны журам зөрчиж, ажилтных нь эрх чөлөөнд халдаж авч гарсан үйлдлээрээ цагдаагийн байгууллагад шалгагдсан.

Энэ хоёр хэрэг нэгтгэгдэж, мөрдөн шалгах ажиллагаа явуулсны эцэст 2022 оны долдугаар сарын 8-ны өдөр хэрэг нь шүүхэд шилжсэн. Шүүхээс Э.Одбаяр нарын таван хүнийг хууль сахиулагч нарыг эсэргүүцсэн үйлдэл дээр нь шүүхээс өөрсдийн оршин суугаа дүүргээсээ нэг жилийн хугацаанд гарахгүй байх, зорчих эрхийг хязгаарлах ял оноосон.

-Хуучин элеватор улсад өндөр үнээр шахсан хэргээр аавынхаа хамт байцаагдагч-

Охин Э.Содгэрэл: С.Эрдэнэ болон охин Содгэрэл нар эвдэрхий элеватор шахсан хэргийн автор.

2019 оны аравдугаар сарын үес АТГ-аас ХХААХҮЯ-н дээр ажиллагаа явуулж, тус яамны ахлах мэргэжилтэн Н.Ариунболд, "Дархан гурил тэжээл” компанийн Санхүү эрхлэсэн захирал С.Намсрайжав нарыг саатуулан шалгасан.

Эл компанийн 550527 хувьцааны 152131 ширхэгийг С.Эрдэнийн охин Содгэрэл эзэмшдэг. Хуучин элеваторыг Хөгжлийн банкны 3.5 тэрбум төгрөгөөр засчихаад, улсад 16 тэрбум төгрөгөөр үнэлж шахсан хэрэгт Э.Содгэрэл мэдүүлэг, тайлбар өгч байсан удаатай.

Охин нь гэнэт ийм их хувьцааны эзэмшигч болсон нь С.Эрдэнийг ч буруутгах үндэслэл болсон. Цаашлаад сайдаар ажиллаж байхдаа уг компанид давуу байдал бий болгосон гэж АТГ үзэж хэргийг нь 2020 оны нэгдүгээр сард НПГ-т хүргүүлсэн ч хэрэгсэхгүй болгож байжээ.

Үүн дээр нэмэгдэх хэрэг ч бас бий:

Дархан гурил тэжээл компанийн балаг үүгээр дууссангүй. Саяхан “шилэн” ажиллагаагаар Хөдөө аж ахуйг дэмжих сангаас 5,455,833,360 төгрөг зээлсэн нь ил болов.12 жилийн хугацаанд зээлийнхээ хоёр тэрбумыг л төлжээ. Зээлтэй холбоотой асуудал шүүхийн шатанд шилжиж, улмаар 2,4 тэрбумыг нь гаргуулах шийдвэр гарсан гэх мэдээлэл байгаа юм. 

Энэ мэдээнд өгөх таны үнэлгээ

Хуваалцаарай Жиргээрэй