Б.Лакшми: Нүүрсний үнэ өсөх төлөвтэй байгаа нь гадаад валютын нөөцөд эергээр нөлөөлөхөөр байна
Монгол Улсын Засгийн газраас энэ оны эхэнд олон улсын зах зээл дээр 650 сая
ам.долларын бонд гаргаж, санхүүжилт татсан. Ингэснээр энэ онд болох ирэх онд төлөх өрийн дарамтыг бууруулсан гэж үзэж буй. Түүнчлэн энэ онд урд хөрш “Тэг ковид” бодлогоо цуцалж, хилээ нээсэнтэй холбоотойгоор нүүрсний экспорт ч сэргэх хүлээлттэй байгааг шинжээчид онцолж байгаа юм. Тэгвэл дээрх асуудлаар Эдийн засгийн бодлого, өрсөлдөх чадварын судалгааны төвийн захирал, эдийн засагч Б.Лакшми байр сууриа илэрхийлэв.
Тэрбээр “Засгийн газраас 650 сая ам.долларыг 5 жилийн хугацаатай 8.65 хувийн хүүтэй авсан юм билээ. Зориулалт нь өмнө нь авсан “Гэрэгэ”, “Хуралдай” бондуудын тодорхой хувийг эргэн төлөх санхүүжилтийн эх үүсвэр бүрэлдсэн гэж ойлгосон. Энэ удаагийн бонд өмнө нь авч байсан бондуудыг бодвол илүү өндөр хүүтэй ч өнөөдрийн зах зээлийн хувьд харьцангуй боломжийн гэж дүгнэж болохоор. Монголд бодлогын хүү 13 хувьтай байхад 8.65 хувь гэдэг боломжийн хүү гэж бодож байна. Хугацаа бол 5 жил нь хамгийн бага хугацаа. Нөгөөтэйгүүр, нүүрсний үнэ өсөх хандлагатай байгаа нь цаашдаа гадаад валютын албан нөөцөд сайнаар нөлөөлнө.
БНХАУ-д ковидын цар тахал эрчимтэй байгаа хэдий ч сүүлийн өдрүүдэд тогтворжих хандлагатай байна. Монгол Улс, БНХАУ-ын зорчигч тээврийн үйлчилгээ нээгдэж байгаатай холбогдуулан экспорт ч сэргэх хандлагатай байна. Улмаар хоёр орны худалдаа сэргэж, валют тогтворжих болов уу гэж харж байна. Нөгөө талаас гадаад валютын нөөц сайн бүрдээд эхэлбэл, төгрөгийн ханш дээр ч эергээр нөлөөлж, тогтворжуулах болов уу гэсэн хүлээлттэй байна” гэсэн юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.