Хэргийн мөрөөр: Ээжтэйгээ амьдардаг малчныг мөргөж, цогцсыг замаас зайлуулсан жолооч 20 жилийн туршлагатай

Улаанбаатар-Увс аймгийн чиглэлд зорчигч тээврийн үйлчилгээ үзүүлдэг  “Ач буян трэйвел” ХХК-ийн автобусны жолооч зургадугаар сарын 22-нд Архангай аймгийн Өндөр-Улаан сумын нутаг дэвсгэр, Бэлх гэх газар явган зорчигчийг дайрч, амь насыг нь хохироосон байдаг.

Улмаар автобусны жолооч амь хохирогчийн цогцсыг нь ээлжийн жолоочтойгоо хамт өргөж, жалганд нуугаад хэргийн газраас явсан гэх мэдээлэл гарсан.

-Үйлдлийг харсан зорчигч Тариат суман дээрээс цагдаад мэдэгдсэн-

Бидэнд олдсон мэдээллээр бол осол шөнийн 01.00 цагийн үед гарсан байна. Автобусны хоёр жолооч ослыг нуугаад цааш хөдөлсөн. Гэвч тухайн автобусаар явсан зорчигч тэдний үйлдлийг харсан учир цааш хөдлөөд Тариат сум дээр очоод цагдаагийн байгууллагад мэдэгдсэн юм байна. Харин нас барсан иргэнийг хүн олж, сумынхаа холбогдох байгууллагуудад мэдээлэл өгсөн. Түргэн тусламжийн баг ирэхэд иргэн замаас нэлээд зайдуу, амьсгал хураасан байжээ. Чухам яг мөргүүлсэн даруйдаа амь насаа алдсан уу, эсвэл замаас гаргаж тавьсны дараа амьсгал хураасан уу гэдгийг холбогдох албаны хүмүүс хэлж мэдэхгүй байлаа.  Ингээд өглөө болоход талийгаачийн ар гэр лүү сумын цагдаа холбогдож, ослын талаар мэдээлэл өгсөн гэв.

-Тэрбээр өглөө гэрээсээ сумын төв орно гээд гарсан-

Талийгаач Өндөр-Улаан сумын харьяат, 38 настай малчин хүн бөгөөд айлын бага хүүхэд, ээжтэйгээ хоёулаа амьдардаг байж. Цагдаа түүний төрсөн ахыг Улаанбаатар хотод ирчихсэн байх үеэр нь залгаж дүүг нь осолд орсныг дуулгажээ. Талийгаач тэр өглөө сумын төв орно гээд мотоцикл унаад гэрээсээ гарсан.  Тэднийх сумын төвөөс зайдуу зам дагуу зусаж байсан аж. Тухайн өдөр хаагуур явж байгаад шөнө зам дээр гарч ирснийг бас л мэдэх хүн олдсонгүй. Юутай ч шүүх шинжилгээгээр архи согтууруулах ундааны зүйл хэрэглээгүй байсан гэх дүгнэлт гарчээ. Мотоцикл нь зам дээр байсан гэв. Түүнчлэн хэрэг үйлдсэн жолооч ирж, ар гэрийнхэнтэй нь уулзсан. Хохирогчид “Санаандгүй дайрсан гэдгийг бид ойлгож байгаа, яагаад тусламж үзүүлэхгүй замаас зайлуулж тавьсан юм бэ” гэхэд огт үг дуугараагүй гэнэ. Талийгаачийн ээж уг нь бие тэнхлүүн хүн байдаг ч хүүгээ ослоор өөд болсноос хойш сэтгэл санааны хямралтай, мунгинуу болсон гэж ойр дотныхон нь хэлсэн юм.

Жолооч Ц:  Ажлаас чөлөөлсөн, амьдрал ахуй хүнд л байна

Уг хэргийг одоо харьяаллын дагуу Архангай аймгийн цагдаагийн газар шалгаж буй. Хэрэгт холбогдсон жолоочийг цагдан хориогүй байгаа.

Бид “Ач буян трэйвел” компанийн Увс аймгийн чиглэл хариуцсан ажилтантай холбогдлоо.  Тэрбээр “Бид жолоочийг ажлаас нь чөлөөлсөн.  Би Увсад ажилладаг болохоор бусад асуудлыг сайн мэдэхгүй байна. Уг нь манай компанийг анх байгуулагдсан цагаас хойш 20 жил ажиллаж байгаа туршлагатай жолооч доо” гэв. Харин хэрэг үйлдсэн гэх Ц гэдэг жолооч ингэж ярилаа.

 -Таныг 20 жил ажилласан туршлагатай жолооч гэж сонссон. Ажлаас нь чөлөөлсөн юм билээ?

-Тийм ээ. Амьдрал ахуй хүнд л байна.

-Тэр өдөр юу болсон юм бэ?

-Хамаагүй ярьж болох юм болов уу даа.

-Хэрэг ямар шатандаа яваа бол, таныг дуудаж мэдүүлэг авсан уу?

-Шийдэгдээгүй байна. Шинжээчийн дүгнэлт гарахыг хүлээж байгаа гэсэн. Би мэдүүлгээ өгсөн.

-Таныг цогсыг зайлуулж, жалганд хаясан гэж байна. Үнэн үү?

-Тийм юм болоогүй ээ.

-Хэдэн цагийн үед, ямар нөхцөл байдалд болсон үйл явдал юм бэ?

- ... (Утсаа салгав.)

Осол болсон тухайн газар ямар нэг бартаа саадгүй шулуун зам гэдгийг нутгийн хүмүүс хэллээ. Тухайн жолооч 20 жил ажиллаж буй "Ач буян трэйвел" ХХК-ийн 20 жилийн ой энэ жил тохиож буй. Улаанбаатар-Увс-Ховд чиглэлд автобус явуулдаг. 20 жилийн ойгоо тохиолдуулж автобус бүрээсээ азтан тодруулж, 200 иргэн үнэгүй зорчих азтан болсон. Мөн ойгоо тохиолдуулан дөрвөн хүүхэдтэй айлд гэр бэлэглэжээ.

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй