Эхлээд шүүгдэх 11: Т.Аюурсайхан, Б.Ганхуяг хоёр ба эхнэр, дүү, найз, туслах

Нүүрсний гэх тодотголтой эрүүгийн хэрэгт холбогдуулан 11 хүнд яллах дүгнэлтийг нийслэлийн Прокурорын газраас ирүүлсэн билээ. Улмаар 11 хүнд холбогдох хэргийн урьдчилсан хэлэлцүүлэг /2023.08.30/ болсон ч, есдүгээр сарын 12-ныг хойшилсон. 

Т.Аюурсайхан, Б.Ганхуяг нарын ойрын хамаарал бүхий 1-2 хүнийг худал мэдүүлэг өгсөн, гэрчид нөлөөлөхийг оролдсон хэмээн буруутгаад байгаа юм. Ингээд Т.Аюурсайхан, Б.Ганхуяг нартай ямар есөн хүн эхлээд шүүгдэх вэ гэдгийг хүргэе.

-Т.Аюурсайханы дүү болоод туслах, найзуудын хамаарал-

Т.Аюурсайхан нарыг, “Улс төрд нөлөө бүхий этгээд нь үндэслэлгүйгээр хөрөнгөжсөн, зохион байгуулалттай гэмт бүлэг байгуулсан” гэх хэргээр шалгаж байгаа юм.

Т.Түвшинбаатар, Т.Аюурсайханы дүү нь.

Түүний тухай тодорхой мэдээлэл байхгүй ч, өмнө нь ах нь бизнесмен хэмээн тодотгож байсан удаатай. Өнгөрөгч сарын 30-нд болсон урьдчилсан хэлэлцүүлэг түүний өмгөөлөгчийн хүсэлтээр хойшилсон.

И.Даваадорж: Зургаан жил шадарласан туслах, найз.

УИХ-ын гишүүн асан Т.Аюурсайханы найз. Тэрбээр, 2016 онд УИХ-ын Тамгын газар, УИХ-ын гишүүний бие төлөөлөгч, 2019 онд УИХ -ын гишүүний зөвлөх, 2020 онд Орон нутгийн сонгуулиар нэр дэвшиж, Чингэлтэй дүүргийн ИТХ-ын төлөөлөгч, дүүргийн МАН-ын хорооны дэд даргаар ажилласан. Түүнийг Хөдөлмөр, нийгмийн хамгааллын сайдаар ажиллах богино хугацаанд туслахаар нь ажилласан. Улмаар Хөдөлмөр, нийгмийн хамгааллын яамны харьяа Хөгжлийн бэрхшээлтэй хүний хөгжлийн ерөнхий газрын даргаар томилогдон ажиллаж байв. “Мон версус” ХХК-ийнхаа нэр дээр Богдхан уулын Арцатын аманд 1.5 га газар авчээ. Тэр газар дээрээ 39 хаус бүхий тансаг зэрэглэлийн хотхон барихаар бэлтгэл ажлаа хангаад байхдаа илчлэгдсэн. Мөн И.Даваадоржийн эхнэр, эгчийнх нь хамаарал бүхий компаниар Ар гүнтийн аманд 69 хаус бүхий тансаг зэрэглэлийн хотхон барьж худалдсан гэдэг.

Г.Гантөмөр, "Лаки лайф" ХХК-ийн удирдах албан тушаалтан:

“Лаки лайф” ХХК-ийг Г.Гантөмөр гэх эмэгтэй эзэмшиж, удирддаг. Дээрд дурдсан И.Даваадорж, Г.Гантөмөр нар "Лаки лайф" ХХК-иар хоорондоо хамааралтай гэгддэг. Мөн И.Даваадорж “Асгат ресорс”, “Мон версус” компаниудтай. Г.Гантөмөр нь И.Даваадоржийн эхнэр Долоонжингийн Дэлгэрмаатай “Мон версус” ХХК-ийг, төрсөн эгч Ишравжаагийн Чанцалдуламтай “Асгат ресорс” ХХК-ийг тус тус хамтран эзэмшдэг.

Б.Отгонжаргал: "Эрдэнэс Тавантолгой" ХК-ийн Худалдан авалтын албаны дарга бөгөөд ерөнхий аудитор

Нүүрсний хэрэг дэгдэхтэй зэрэгцээд ЭТТ ХК-д ажиллаж байсан Б.Отгонжаргал, Х.Нурлат нар АТГ-т ажлаасаа дуулиантайгаар халагдсан. АТГ-т үндэслэлгүй хөрөнгөжсөн, мөнгө угаасан, зохион байгуулалттай гэмт бүлэгт элссэн хэмээн буруутгагдаж эхэлсэн нь тэр байв. Б.Отгонжаргал, Т.Аюурсайханы туслах байсан бөгөөд дарга нь түүнийг "Эрдэнэс Тавантолгой" ХК-ийн Худалдан авалтын албаны дарга бөгөөд ерөнхий аудитор болтол нь шидсэн хэрэг. Тэрбээр 500 сая төгрөгөөр “Mercedez Benz G-500” автомашин худалдаж авсан, төрсөн аав Я.Баатарынхаа гэрт 235 сая төгрөг, 30 мянган ам.доллар нуусан гэгддэг.

Нүүрсний жагсаалыг ЭТТ ХК, Монголын оюутны холбоо тэргүүтэй байгууллагаас санхүүжсэн хүмүүс санаатайгаар турхирсан, зохион байгуулсан гэдэг асуудал хуулийн байгууллагад шалгагдаж байгаа. Т.Аюурсайханы хувьд уг жагсаалын үеэр Сингапур луу очсон гэх баримт байдаг.

-Б.Ганхуягийн эхнэр болоод бусад хамаарлууд-

Б.Ганхуягийг, “Эрдэнэс тавантолгой” ХК-ийн гүйцэтгэх захирлаар ажиллаж байсан этгээд нь ажиллах хугацаандаа бусдаас их хэмжээний хахууль авсан, хахуулийн мөнгөөрөө барилга бариулж мөнгө угаасан, үндэслэлгүйгээр хөрөнгөжсөн” хэргээр шалгаж буй.

П.Бадамханд Б.Ганхуягийн эхнэр

Пүрэвдоржийн Бадамханд. "Пеарл пропертиз ХХК"-ийн захирал. Тэрбээр хэд хэдэн үл хөдлөх хөрөнгөтэй холбогдсон нь анхаарал татдаг. Тэр тусмаа нөхрийнхөө хамаарал бүхий хүмүүсийн хамтаар. Б.Ганхуягийн зөвлөх байсан С.Энхтөр, “Хишиг арвин индустриал” ХХК-ийн эзэн Б.Хишигдорж нар ХУД-т "Regis palace" нэртэй орон сууц, оффис бүхий 20 давхар барилга барьсныг П.Бадамханд борлуулж байв.

Х.Батхишиг: "Эрдэнэс Тавантолгой"-н гүйцэтгэх захирал асантай хамааралтай үйлдэлд “Хишиг арвин индустриал” ХХК-ийг үүсгэн байгуулагч Б.Хишигдоржийн хүү

Нүүрсний дуулиан эхлүүт Б.Ганхуягтай хамт саатуулагдсан хүн бол “Хишиг арвин индустриал” ХХК-ийн захирал Б.Хишигдорж. Түүнийг хүү, бэрийнх нь хамт хорьсон. “Эрдэнэс тавантолгой” ХК-иас хөрс хуулалт, нүүрс олборлолтоор 796 тэрбум, Бор тээгийн уурхайн хөрс хуулалт, өрөмдлөг тэсэлгээ, нүүрс олборлолт, нүүрс баяжуулалтаар 715 тэрбум буюу хоёрхон гэрээгээр 1.5 их наядыг халаасласан байдаг. Одоогоор "Хишиг арвин индустриал" ХХК-ийн Ерөнхий захирал Б.Хишигдоржоор дамжуулан "Regis Palace" барилгаар мөнгө угаасан байж болзошгүй асуудал анхаарал татаад буй. Гэвч АТГ-ын шалгалтын шатанд Б.Хишигдорж сугарч, компанийнх нь хууль ёсны төлөөлөгч бую Гүйцэтгэх захирал гэдэг утгаараа түүний хүү Б.Батхишиг шүүгдэх гэж байгаа нь энэ.

О.Дагвадорж, "МД трейвэл" ХХК-ийн хувьцаа эзэмшигч

“МД трейвэл” ХХК-ийн Барилга хариуцсан менежер, Отгоны Дагвадорж. О.Дагвадорж эл компаниа “Хишиг арвин индустриал” ХХК-ийн эзэн Б.Хишигдоржийн бэр Б.Мандчирмаа, Доржийн Баярмаа нартай хамтран эзэмшдэг. Эл компани нь Нүхтийн аманд тансаг зэрэглэлийн “Nieder land” нэртэй хотхон барьж буй билээ.

Б.Эрдэнэбаяр: "Эрдэнэс Тавантолгой"-н Санхүүгийн албаны дарга асан

О.Угтахбаяр, иргэн

Одоохондоо Б.Эрдэнэбаяр, О.Унтахбаяр нарын талаар тодорхой мэдээлэл алга.

Харин эгч болон хүргэн ахынх нь хэрэг хаачив. Тодруулбал, Жаргалантын аманд “Жаргалант вилла” гэх 22 хаус бүхий хотхон барьж, 17 тэрбум төгрөгөөр худалдсан Б.Ганхуягийн төрсөн эгч Б.Нарантуяа, хүргэн Д.Пүрэвдорж нар юм.

Энэ мэдээнд өгөх таны үнэлгээ

Хуваалцаарай Жиргээрэй