Урьдчилсан хориход 9 сар саатуулагдаж буй Б.Ганхуягийн үсээ засуулсан байдлаас ямар мессеж харж болох вэ

Засгийн газраас үлээсэн гэх тодотголтой "Нүүрсний хулгай" хэргийн хамгийн гол тоглогч, бүх зангилааны эзэн нь Б.Ганхуяг. ШШГЕГ-ын Урьдчилан хорих ангид ес дэх сардаа хоригдож буй Б.Ганхуяг саях шүүхийн урьдчилсан хэлэлцүүлэг дээрээ үсээ цэмцийтэл засуулсан төрхтэй гарч ирлээ.

Хэн хүний төдийлөн анзааралгүй өнгөрсөн энэ дүр төрхөд хэрхэн дүгнэлт хийж болох вэ. Монгол Улс дахь хорих ангиудад үсчин тухайлан ажилладаг ч хэрэг нь шүүгдэхээр хүлээгдэж буй Урьдчилсан хорих ангид бол үсчин байхгүй. Угаас тэд түр байршигчид учраас төрөөс ийм үйлчилгээнд тухайлсан ажлын байр үүсгэдэггүй гэсэн үг. Тэгвэл Б.Ганхуяг ямар боломжийг ашиглан үсээ засуулсан байдлаар орж ирэв.

Өмнө нь нүүрсний хамаарлаар шалгагдаж байсан "Цэвэр агаар" сангийн С.Гансүх, хүргэн С.Дэнзэн нарын шүүх хурлын үеийн зургуудтай Б.Ганхуягийн өнөөгийн дүр төрхийг харьцуулаад үзэхэд ямар зураглал гарах вэ. Сонирхоцгооё.

Кэйс 1. Хорихын эмнэлэгт хөлийн хуруугаа тайруулсан Л.Гансүх

Ерөнхий сайд асан Н.Алтанхуягийн ахлах зөвлөх Л.Гансүхийг "Цэвэр агаар" сангийн асуудлаар 2014.07.29-нд хорьж, 2015.09.16-22-ны хооронд шүүх хурал нь өрнөж байв. Уг шүүх хуралд Л.Гансүх сахлаа аваагүй байдалтай, үс нь ургасан хоригдогч шүүхийн танхим руу орж буй зураг цахим орчинд үлдсэн нь бий. /Google платформоос хайж, харах боломжтой/ Хоригдох хугацаандаа тэрбээр гуравдугаар шатлалын эмнэлгүүдэд хэвтэх хүсэлт тавьсаар байсан боловч зөвшөөрөл авч чадалгүй, хуруугаа хорихын ангид тайруулсан байдаг.

Кэйс 2. Өлсгөлөн зарлаж, хорихын эмнэлэгт хэвтсэн ч үс нь ихээр ургасан С.Дэнзэн

Ерөнхий сайд асан Н.Алтанхуягийн хүргэн С.Дэнзэнг мөн нүүрстэй хамаарах хэргээр 2015.05.21-2015.08.21 хүртэл 90 хоногоор саатуулж, дахин саатуулахдаа 2016.09.28-2017.04.03-нд анхны шүүх хурал хүртэл нь хорьж байв. Тэрбээр хоригдох хугацаандаа өлсгөлөн зарлаж, хорихын ангид хэвтэн эмчлүүлсэн түүхтэй. Шүүх хурлын үеэрх үс нь их ургасан түүний зураг цахим орчинд үлджээ. /Google платформоос хайж, харах боломжтой/

Кэйс 3. "Интермед"-д хэвтэн эмчлүүлдэг, үсээ засуулсан Б.Ганхуягийн дүр төрх

"Нүүрсний хулгай" хэргээр урьдчилан хорих ангид саатуулагдаж буй Б.Ганхуяг өнгөрсөн зун "Интермед" хувийн эмнэлэгт хэвтэн эмчлүүлсэн байдаг. Түүнийг нэг өдрөөр батлан даалтад гаргаад, эргүүлэн хорьсон ч үс зүсээ засуулсан, ер нь өнгө гундаагүй байдалтай шүүх хуралдаа ирж оролцов. Түүний өмгөөлөгч ба ар гэрийнхнийх нь уулзалт дээр хориг тавигдаагүй байна.

-Ажиглах өнцөг ба улс төрийн хүрээллийнхний яриа-

Улс төрийн хүрээндээ "Б.Ганхуягийг ЭТТ-н мөнгийг хуваарилдаг байхад түүнтэй сүжирсэн бүхэн хоригдох хугацаанд нь анхаарч, халамжилж байгаа. Хэд хэдэн удаа "MCS"-ийн харьяа эмнэлэгт хэвтсэн, хорих ангидаа тусгай хангамжтай. Хоригдсон шинжгүй байгаа" гэгдэж буй.

ШШГЕГ-ын чиглэл дэх эх сурвалжууд "Эмнэлэгт хэвтсэн нь үнэн. Урьдчилан хорих ангид үсчин байхгүй ч ахуйн хүрээндээ нэгнээ гуйх маягаар зөвшөөрөл авч, үсээ засдаг" гэсэн мэдээлэл өгч байна.

Энэ нь хувь хүний үсээ засуулсан өнгөц утга яриад байгаа мэт боловч "Нүүрсний хулгай" хэргийн хамгийн том сүлжээг үүсгэгч, гол учгийн зангилаа болсон Б.Ганхуяг хоригдож байгаа нэртэй ч томчууд нь эрхлүүлээд сууж байгаа юу гэх асуултыг үүсгэж байгаа юм. Хэрвээ Б.Ганхуягийг нүүрсний хулгайн хэргээр шударгуу байдлаар шүүж чадахгүй, ил далд ингэж бөөцийлвөл эрх баригчдын хулгайтайгаа тэмцэх акц жинхэнэ жүжиг байсныг харж болно.

Цаашлаад,

• ХЗДХЯ-ны шууд харьяа ШШГЕГ-ын Урьдчилан хорих ангид есөн сар саатуулагдаж байгаа "цэмцгэр" Б.Ганхуяг халамжлах эрхийг хэн өгч байгаа вэ?

• ХЗДХ-ийн сайд Х.Нямбаатар нүүрсний сонсголыг ахалж байгаа мессеж Б.Ганхуягийн энэ байдалтай холбогдож болох уу?

• "Нүүрсний хулгай" хэргээ боож чадахгүй бол МАН 2024 оны УИХ-ын сонгуульд оролцох нэр нүүр хэцүүхэн болно. Ийм нөхцөлд түүнээс их хэмжээний мөнгө, лоббин хишиг хүртсээр ирсэн МАН-ынхан Б.Ганхуягийн хэргийг дотооддоо хэрхэн зохицуулах вэ зэрэг эгзэгтэй асуултууд үүсэж байна.

Энд дүгнэлтийг танд үлдээв.

Энэ мэдээнд өгөх таны үнэлгээ

Хуваалцаарай Жиргээрэй