Ерөнхийлөгч залилан хийсэн хоёр, бусдыг хутгалсан нэг хүнийг өршөөжээ

Хэд хоногийн өмнө зургаан жилийн ял сонссон Ц.Мянганбаяр суллагдсан тухай бид мэдээлж байв. Тэгвэл тэрбээр Ерөнхийлөгчийн өршөөлөөр тийн суллагдсан байна. Ерөнхийлөгч энэ жил гурван хүнийг өршөөсний нэг нь тэр аж. Тодруулбал, Ерөнхийлөгч залилангийн гэмтэй хоёр, бусдын эрүүл мэндэд санаатайгаар гэмтэл учруулсан нэг хүнийг өршөөлд хамруулан, үлдсэн ялаас нь хэлтрүүлсэн байна.

МУ-ын Ерөнхийлөгчийн 118, 119, 120-р зарлигаар хугацаанаасаа өмнө суллагдагсад хэн бэ.

-Залилангийн хэргээр зургаан жилийн ял сонссон Ц.Мянганбаяр-

417-р ангиас Цэвээнжавын Мянганбаярыг Эрүүгийн хуулийн 17.3-2.2-оор оногдуулсан 6 жилээс эдлээгүй үлдсэн 2 жил 10 сар 23 хоногийн ялаас чөлөөлсөн.

Нийслэлийн прокурорын газрын хяналтын прокуророос “Монгол газар корпорейшн” ХХК-ны захирал ажилтай, шүүгдэгч Ц.Мянганбаяр, шүүгдэгч Х.Даржаа нарт  холбогдуулан Эрүүгийн хуулийн тусгай ангийн 17.3 дугаар зүйлийн 3 дахь хэсгийн  3.1 дэх заалтад  зааснаар /Залилах/ гэмт хэрэгт яллах  дүгнэлт үйлдсэн байдаг.

Улмаар /2021.03.19/-нд Баянгол дүүргийн эрүүгийн хэргийн анхан шатны шүүх тэднийг “залилах“ гэмт хэргийг гэрээгээр халхавчлан хуурч, зохиомол байдлыг зориудаар бий болгон бодит байдлыг нуух замаар бусдыг төөрөгдөлд оруулж үргэлжилсэн үйлдлээр хуурч залилах гэмт хэргийг байнга үйлдэж, амьдралын  эх үүсвэрээ болгох гэмт хэргийг үйлдсэн гэм буруутайд тооцож, Ц.Мянганбаярт 6 жил, Х.Даржаад 5.6 жилийн хорих ял оноож, нээлттэй хорих ангид эдлүүлэхээр шийдвэрлэсэн.

Ц.Мянганбаярын өмгөөлөгч Д.Батсүх, Л.Түвшинцэнгэл, Г.Батбаяр, Х.Даржаагийн өмгөөлөгч Г.Должинсүрэн нарын гаргасан гомдлыг үндэслэн тус шүүх 2021 оны зургаадугаар сард хэлэлцээд анхан шатны шүүхээс оноосон ялыг нь хэвээр үлдээж байв.

-Бааранд бусдыг хутгалсан хэргээр 3.4 жилийн ял сонссон Төрийн тусгай хамгаалалтын ажилтан-

433-р ангиас Мөнхтуулын Батбаярыг Эрүүгийн хуулийн 11.1-2.4-өөр оногдуулсан 3 жил 4 сарын ялаас эдлээгүй үлдсэн 2 жил 7 сар 16 хоногийн ялаас чөлөөлсөн.

Дээд боловсролтой, Төрийн тусгай хамгаалалтын газарт хамгаалалтын ажилтнаар ажиллаж байсан залуу.

Тэрбээр согтууруулах ундааны зүйл хэрэглэсэн үедээ 2022 оны аравдугаар сарын 27-ноос 28-нд шилжих шөнө Баянгол дүүрэг дэх “Sea” нэртэй бааранд бусадтай үл ялих шалтгаанаар маргалдаж, улмаар хохирогч Н.Х-ын хэвлийд хутгаар нэг удаа хатган нарийн гэдэс гэмтээсэн, хатгагдаж зүсэгдсэн шарх, хэвлийн хөндийн цус хуралдалт бүхий “хүний эрүүл мэндэд хүнд хохирол санаатай учруулах” гэмт хэрэгт холбогджээ.

2022 оны аравдугаар сард төрсөн өдрийн баяр тэмдэглэж байх үедээ бусдын биед санамсаргүйгээр гэмтэл учруулсан гэдгээ хүлээн зөвшөөрч, мэдүүлж байжээ.  

Анхан шатны шүүхээс Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.4 дэх заалтад зааснаар гурван жил дөрвөн сарын хорих ял оногдуулсан байна.

Давж заалдах шатны шүүх анхан шатны шүүхээс оноосон ялын хэмжээ нийцсэн байх бөгөөд өөр хэлбэрээр ялыг доош татаж хөнгөрүүлэх боломжгүй гэж үзжээ.

-Залилангийн хэргээр 4 жилийн ял сонссон Б.Батбилэг-

441-р ангиас Баяраагийн Батбилэг, Эрүүгийн хуулийн 17.3-2.4-өөр оногдуулсан 4 жилийн ялаас эдлээгүй үлдсэн 2 жил 6 сар 4 хоногийн ялаас чөлөөлсөн.

Ц.Мянганбаяртай ижил /Залилах-Эрүүгийн хуулийн 17.3 дугаар зүйл/ заалтаар яллагдсан иргэн суллагджээ.

17.3.Энэ хуулийн тусгай ангид нэг сарын хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, хоёр зуун тавин нэгээс таван зуун цаг хүртэл хугацаагаар албадан ажил хийлгэх, гурваас дээш зургаан сар хүртэл хугацаагаар баривчлах, эсхүл таван жил хүртэл хугацаагаар хорих ял шийтгэхээр заасан гэмт хэргийг хүндэвтэр гэмт хэрэг гэж үздэг.

Төрт ёстой улс атлаа үе үе илтэд асуудалтай хүмүүсээ шуудхан Ерөнхийлөгч нь өршөөчихдөг. Үе үеийн төрийн тэргүүнүүд суудлаасаа буухын өмнө чухалчлан рекетүүдийг ялаас нь чөлөөлж, өршөөсөн кейсүүд бий. Тухайлбал, “Ар халхын атаман" хэмээгдэж байсан "Цагаан шонхор"-ын Ч.Энхтайваныг Н.Багабанди Төрийн тэргүүний суудлаас буухаасаа өмнөхөн өршөөсөн байдаг. Хүний санаанд ормооргүй байдлаар аймшигтай рекет хийдэг байсан гэгддэг Ч.Энхтайваны үеийн түүхүүд эдүгээ МАН-ын бүлгийн хурал дээр яригдаж, орчин үеийн рекет нараа дарахаар ажиллагаа хүртэл явуулсан гэх. Энэ талаар Х.Нямбаатар сайд ил тод ярьж, рекетчингүүдийн зарим бичлэгүүд ч цацагдсан билээ.

Дараа нь Х.Баттулга Ерөнхийлөгчийн суудлаас буухынхаа өмнөхөн Б.Хурцад өршөөл үзүүлж байв. Өөрийнх нь хэлснээр У.Хүрэлсүх /Ерөнхий сайд байхдаа/ түүнийг БНСУ-д элчингээр суунгаа тархиа амраах санал тавьсан байдаг. Мөн хүчингийн хэрэгт нэр холбогдсон Д.Муратыг ч өршөөчихсөн.

Энэ мэтчлэн чухам ямар тохироо, толхилцоонтойгоор рекетүүд, элдэв хэрэгтнүүдийг үе үе Ерөнхийлөгчид нь өршөөж ирсэн нь асар битүү, хачирхалтай.

Өөрийн сэтгэгдлээ илэрхийл

Share Tweet