Хэргийн мөрөөр: Шарлалтын аппаратад ороод амиа алдсан 4 хоногтой нярайг уушги үрэвсэлтэй гэж дүгнэжээ

Манай сайтад нэгэн гэр бүл хандсан юм. Учир нь энэ гэр бүлийн залуу хос хоёр дахь хүүхдээ II төрөх эмнэлэгт хэвтэж төрүүлсэн бөгөөд дөрөв хоногийн дараа хүүхдээ алджээ. Уг харамсалтай явдлыг ар гэрийнхэн нь эмнэлгийн хариуцлагагүй байдлаас болсон гэж дүгнэж, гомдолтой байгаа учраас хэвлэл мэдээлэлд хандсан.

Улмаар холбогдох хүмүүсийн анхааралд хүргэх, бусад аав, ээжүүдэд сэрэмжлүүлэг болгох зорилготой гэсэн юм.

2023 оны есдүгээр сарын 22-нд нийслэлийн хоёрдугаар амаржих  газар хориод насны залуу гэр бүл хоёр дахь хүүхдээ төрүүлж, 2950 гр охинтой болжээ. Мөн нөхөр нь сахиураар орж төлбөртэй өрөөнд эхнэр, хүүхдээ асарч, ээж нь эмчилгээ, нярай охин нь шарлалтын аппаратад орж байжээ.

2023 оны есдүгээр сарын 26-ны өдөр ээжийг нь эмчилгээнд орсон хойгуур нярайг сувилагч фотон буюу шарлалтын аппаратад оруулахаар авч явсан. Дундуур нь хүүхэд чинь уйлаад байна гэхээр нь очиход хөхөө хөхөхгүй байсан учраас тэвэрч, тайвшруулсан. Шарлалтын аппаратны эмчилгээ дуусаад охиныг аав, ээж дээр нь авч ирэхдээ хамар дээр нь жин тавьчихсан, аппаратдаа салст нь хөөгөөд байна гэж хэлсэн. Харин аав, ээжийнх нь анзаарснаар бага зэрэг хавдартай байсан гэв.  Энэ цагаас эхлээд охин уйлагнаж, хөхөө хөхөж чадахгүй, зовиурлаж эхэлсэн төдийгүй хэл нь ягаан өнгөтэй болж, хамраас нь тамедины уусмал мэт өнгөтэй шингэн гарч эхэлжээ.

Тухайн үед ээлжтэй байсан сувилагчид хүүхдийн байдлаа хэлээд үзүүлье гэхэд зүгээр, аппаратдаа ингэж байгаа гээд тусламж үзүүлээгүй байна.

Энэ өдрийн 19:20 цагт эгч нь эргэлтээр ирэхэд охины ээж хүүхэд маань нэг л сонин болчихлоо, сувилагчид хэлэхээр тоохгүй байна гэхээр нь сувилагчийг дуудаж уулзсан. Ингэхдээ “Энэ хүүхэд гэмтэл, харвалт өгөөгүй биз. Анх төрөхдөө сэргэлэн орчиндоо идэвхтэй хэвийн байсан. Одоо харц нь хүртэл өөр болчихсон байна. Хамраас нь яагаад ийм зүйл гараад байна. Анхаараад өгөөч” гэхэд “Салиа нь гарч байгаа байх. Аав, ээжээр нь дусаалга авахуулсан, тэрийг дусаана. Аппаратад орохоор салст хөөдөг” гэж хэлсэн байна.

Ингээд нярайн ээж шөнийн 02 цагт ээж рүүгээ ярихдаа аппарат залгачихсан байна, хамгийн дээд талд нь 45 гэсэн тоо байна. Сувилагчаас асуухад амьсгалын тоо гэж хэллээ гэсэн, улмаар өглөөний 08 цагт сэхээнд орчихлоо гээд дуудсан. Ар гэрийнхэн нь ч эмнэлэг дээр ирж, хүүхэд 08:45 цагт өөд болжээ.

Ар гэрийнхэн яагаад гомдолтой байгаагаа дараах үндэслэлээр тайлбарлав.

1. Аппаратад ороод зовиурлаж эхлэхэд ямар ч арга хэмжээ аваагүй. Сувилагч нь зүгээр хэмээн эмчид үзүүлж өгөх боломжийг бүрдүүлээгүй.  
2. Шүүх эмнэлгийн урьдчилсан дүгнэлт уушгины үрэвсэлтэй гэж гарсан. Уушгины үрэвсэлтэй байсан бол нярайн эмч чагнаад мэдэх боломжтой. Түүнчлэн үнэхээр тийм байсан бол аав, ээжид хэлээд эмчилгээ хийх байсан ч огт тийм зүйл болоогүй.
3. Задлан шинжилгээнд оруулахад хөндлөнгөөс хүн оруулья гэхэд Шүүх эмнэлэг нь өөрөө тухайн эмнэлэгт хөндлөнгийн шинжээч болдог тул шаардлагагүй гэж тайлбарласан. Гэвч нас барсан шалтгааны эхний дүгнэлт “хэл нь ягаарсан, хамраас нь өнгөтэй шингэн гарсан, нүдний харц хөдөлгөөн өөрчлөгдсөн...” гэх мэт шинж тэмдгээс илрээгүй, уушгины үрэвсэл гэснийг хүлээн зөвшөөрөхгүй.
4. 02 цагт зүрхний цохилт болсон байхад анзаараагүй. Амьсгалын тоо гэж хэлсэн гэх мэтээр бүхий зүйл дээр хариуцлагагүй хандсан.

Мөн “Энэ төрөх эмнэлгийг хариуцлагагүй хандсанаас манай гэр бүлд ийм харамсалтай явдал тохиолдлоо. Төрөөд л аав, ээж нь видео дуудлагаа охиноо харуулсан. Бид нар хэдэн гэрээрээ сэргэлэн охин төржээ гээд баярлаж байсан. Гэтэл тэр ээжээс нь салгаж авч аппаратад оруулсны дараа хүүхэд огт өөр болчихсон. Тухайн үед юу болсныг эмнэлэг, ээж нь эмчид үзүүлье гэхэд хэрэггүй зүгээр гээд тусламж үзүүлээгүй сувилагч, тэр өдөр жижүүртэй байсан эмч энэ бүхэнд тайлбар мэдээлэл өгөх хэрэгтэй” гэж хэлсэн юм.

Бид тухайн тохиолдлын талаар мэдээлэл авахаар  Нийслэлийн хоёрдугаар төрөх эмнэлэгтэй холбогдсон ч мэдээлэл авч чадсангүй. Захирлын өрөө, хүлээн авах, эмнэлзүй эрхэлсэн захирал, нярайг төрүүлсэн эмч зэрэг дугаарууд руу залгасан ч суурин дугаарууд нь хариу өгөхгүй, гар утас дуудлагыг авсан ч эхний байдлаар мэдээллийг танилцуулахад утсаа таслах, тийм хүн байдаггүй гэх мэт хариултыг өгч байна.

Хамгийн сүүлд нарийн бичиг гэсэн дугаар руу гурван удаа ярьсны эцэст “Манай эмнэлэг энэ талаар мэдээлэл өгөх боломжгүй” гэсэн хариулт сонссон юм. 

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй