Хүүхдийн асуудал, нийгмийн зэрлэгшлээ төрийн бодлогын хэмжээнд ярьцгаая, ҮАБЗ-ийн гишүүд ээ

Долоо хоногийн дотор гурван хүүхэд тагтнаас унаж, 12 настай охин алга болж, нэг хүүг эрэн хайсан хэдий ч цогцос нь олдож, хоёр хүүхэд машинд дайруулан амиа алдаж, хичээл эхэлснээс хойш 38 хүүхэд зам тээврийн осолд орлоо.

Нийгэм тэр чигээрээ түнэр харанхуйд живж буй гэлтэй эмзэглэл дагуулсан энэ өдрүүдэд улс төрийн хүрээнд хотын даргаа огцруулж, хоёр сайд шинээр томилох операц өрнөв. Зэрэгцүүлээд эрх баригчид сонгуульд зориулсан төсвөө УИХ-д өргөн барьж, түүнийг нь хэрсүү нүдээр хянах олон нийтийн болон хэвлэл мэдээллийн байгууллагын хяналтын механизм ч орхигдлоо.

Засгийн газрын бүтцэд хүүхэд хамгаалах чиг үүргийг Нийгмийн хамгаалал, хөдөлмөрийн яам толгойлдог. Сайд Х.Булгантуяа энэ өдрүүдэд нэг ч хүүхдийн асуудлаар ганц үг ганхийсэнгүй.

Яамны харьяанд Гэр бүл, хүүхэд залуучуудын газар нэртэй агентлаг ажиллах бөгөөд 21 аймаг, 9 дүүрэгт эднийх нэгжүүд ажилладаг. Сумын төвүүдэд халамжийн ажилтан, сургуульд нийгмийн ажилтан зэрэг хүрээгээр хүүхдээ хамгаалахчаа аядаж, асуудал гарвал ийшээ "ховлох"-оос өөр аргагүй шахам сууцгааж байна.

Нэг хүүхэд алга болохоор улсаараа нэг камергүй амьдарч буйгаа санана.Эрэн хайх ажиллагаанд Онцгой байдлынхан нь дайчлагдаад баахан самрах ч ихэвчлэн эндсэн байдалтай, хүүхдүүдээ олно. Тэгээд хэсэг шогшроод, тэгсхийгээд мартана. Ингээд ахин хүүхэд...гэхчлэн эмзэглэл төрүүлсэн мэдээллүүд сүүлдээ энгийншиж, "Хүүхэд алга болжээ" гээд зүгээр л мэдээлэгдэж байдаг боллоо.

Олон нийт нь харин нэг хүү эндэхээр "Хойт эцгийн гар харуулахгүй, хуна" гэж уймарцгаана. "Эмэгтэй гишүүд дуугарсангүй" гэж уурлана. Парламентад сууж буй МАН-ын голдуу эмэгтэй гишүүд хүний эрх, хүүхдийн асуудалд ер сэтгэл эмзэглэхээргүй. Бүдүүн тойм, өөрийнх нь мандат эсэн мэнд хадгалагдахад л их анхаардаг, "бэртэгчин" улсууд. Тэднээс ер юу ч хүлээлтгүй.

Ковидын үед хөдөөгийн нэгэн суманд төрсөн гурван үрээ буудаж хөнөөгөөд, өөрийнхөө амийг хохироосон аймшигтай кэйс гарч байв. Хөл хорио, ковидын нөхцөл байдал дэлхийн хүн амд сэтгэлзүйн шинэ эринг тулгаж, түүнийг туулан гарахын тулд нас насныхан өөр дээрээ асар сайн ажиллах шаардлага үүссэн.

Цаашлаад ажил олгогчид, сэтгэлзүйчид, нийгмийн уур амьсгалыг чиглүүлэн хөтлөгчид, бодлого гаргагчид ковидын дараах нийгмийн болоод биет хүний шинэ сэтгэлзүйн нөхцөл байдалд тааруулсан, түүнд зохицсон бодлого шийдвэр гаргах шаардлагатай тулгарсаар байна.

Нийгэм, цаг үеийн шинжтэй энэ урсгалаа манай улс тэр чигт нь сул хаяад, бүх үүд хаалгаа сайтар түгжиж, У.Хүрэлсүхийн хэлснээр "Улаан ном"-д бичигдэх хэмжээнд битүү суусан. Өнөө цагийн хүн ардынх нь эл их зэрлэгшил, гэмт хэргийн өдөөлт, үзэн ядалт бүхэн өмнөх жилүүдийн их энерцээр улам л нэмэгдэхээр харагдаж буй.

Засгийн газрын бүтцээ тэлээд л яамтай, яамгүй сайд нар төрүүлээд л байдаг. Парламентын гишүүдийн тоогоо нэмж, 126-уулаа саарал ордонд шахцалдан суухаар бэлтгээд л байдаг. Төрийн тэргүүнээ зургаан жилээр сонгож, инститүцийнх нь хувьд харьцангуй томруулаад л байдаг.

Тэглээ гээд долоо хоног тутам хүүхдүүд унаж, эндэж, алга болж, зэрлэг бүдүүлэг нийгмийнхээ, төлөвшөөгүй томчуудынхаа золиос болсоор байхад засаглалын эрх мэдлийг томруулаад, өргөжүүлээд байгаагийн хэрэг гарах уу. Хүүхдүүд ийн эндэж буйд салбарын сайд нь нэг орилоод шийдчихгүй. УИХ-ын хэдэн эмэгтэй гишүүд хэвлэлийн хурал хийгээд ч нэмэргүй.

Алсуур, цаг хугацаа зарцуулах төрийн бодлого гаргаж, нийгмээ эмчлэх, хүн ардаа төлөвшүүлэх, тэднийг тайвшруулах, хүүхдийн асуудлыг хариуцлагаар индексжүүлэх бодитой, урт хугацааны ажил, төслүүд хэрэгжүүлэх хэрэгтэй байна. ҮАБЗ-ийн гишүүд хүүхдийн асуудлаа, зэрлэгшсэн нийгмийнхээ энэ уур амьсгалыг хэлэлцээсэй, анхааралдаа авч, арга замууд гаргаасай.

Энэ мэдээнд өгөх таны үнэлгээ

Хуваалцаарай Жиргээрэй