"Интермед"-д хэвтэж, хориход хангамжаар тасардаггүй гэх Б.Ганхуягийн биед хордлогын тууралт гарсан уу

ЭСРЭГЦЭЛ: Үсээ цэмцийтэл засуулдаг байсан Б.Ганхуяг одоо эрүүл мэндийн үйлчилгээ авч чадахгүй, дордож байна-

Нэг. ШШГЕГ-ын Урьдчилан хорих ангид есөн сар хоригдохдоо Б.Ганхуяг үсээ цэмцийтэл засуулаад шүүх хурлын урьдчилсан хэлэлцүүлэгтээ орж ирж байв. Монгол Улс дахь хорих ангиудад үсчин тухайлан ажилладаг ч хэрэг нь шүүгдэхээр хүлээгдэж буй Урьдчилсан хорих ангид үсчин байхгүй байхад шүү дээ. Өнгөрсөн зун "Интермед" хувийн эмнэлэгт хэвтэн эмчлүүлсэн байдаг.

Хоёр. Гэтэл өчигдрийн /2023.10.30/ шүүх хуралдааны үеэрээ тэрбээр эрүүл мэндийн байдал эрс доройтсон. Хоёрдугаар шатлалын эмнэлэг юу ч хийхгүй байна. Гуравдугаар шатлалын эмнэлэгт үзүүлэх, хэвтэн эмчлүүлэх шаардлагатай байгаа тухайгаа шүүх танхимд асар олон удаа учирлан гуйлаа.

Тэрбээр "Есөн сараас хойш миний биеийн байдал сайнгүй байгаа. Хамаг биеэр "юм" туурсан. Өмнө нь идээ гараад байсан. Одоо идээ нь шимэгдэж гарахаа больсон ч, хоёр хөлөөр явахад хүндрэлтэй болж байна. Мөн нуруу, бүх биеэр тууралт гарсан. Сүүлийн үед би дотуур өмд өмсөхөө больсон. Цус нь шүүрээд байгаа учир. Эмч нарт нь үзүүлээд л байна. Үс туг тугаар унаж байна. Гуравдугаар шатлалын эмнэлэг байсан ч хэлэх хэцүү. Маш сайн шинжилгээ хийлгэх шаардлагатай байна” гэв.

-АР ГЭРИЙН ХАРДЛАГА: Том гэрч тул устгах ажиллагаа явуулж байна-

Б.Ганхуягийн эгч "Арьсны өвчин гэдэг маш аюултай. Есдүгээр сарын 10-наас хойш гэнэт арьсны өвчлөлтэй болсон нь сэжигтэй байна. Өнгөрсөн жилийн арванхоёрдугаар сараас хойш миний дүүд эрүүл мэндийн ямар ч асуудал гараагүй. Гэтэл гэнэт яагаад хордлого шиг тууралт гарч байгааг ойлгохгүй байна"

Б.Ганхуягийн хүргэн ах "Есдүгээр сарын 12-ны Б.Ганхуяг маш ноцтой мэдэгдэл хийсэн. Түүний дараа биен огцом муудаж, хордлогод орж, бөөлжиж, даралт нь унасан. Өнөөдрийг хүртэл хордлоготой байна. Б.Ганхуяг маш том гэрч. Эрх мэдэлтнүүд булхай луйвраа далдлахын тулд гэрчийг устгах үйл ажиллагаа явуулж байна гэж манай гэр бүл үзэж байна" гэлээ.

Ар гэрийнхнийх нь зүгээс түүнийг хордуулах үйл ажиллагаа явагдаж байгаа гэж хардаж буйгаа нуулгүй хэлэв.

-ЗӨРҮҮТЭЙ БАЙР СУУРЬ | Б.Ганхуяг: 5 хоног рингер л хийсэн / ШШГЕГ: 14 хоног хэвтүүлж, олон шинжилгээ авсан-

Б.Ганхуяг шүүх хуралдааны үеэр:

“Цусны шинжилгээ авсан. Гэвч шинжилгээний хариуг харуулаагүй. "Хэвийн гарсан" гэдэг л зүйл хэлсэн. Хоёрдугаар шатлалын эмнэлэг үнэхээр болохгүй байна. Тав хоног хэвтүүлсэн. Чадах зүйл нь рингер хийж, хордлого л тайлах”

ШШГЕГ-ынхан хэвлэлд тодруулга өгөхдөө:

“2023 оны есдүгээр сарын 26-ны өдөр түүнийг биохими, дархлал судлал, цусны ерөнхий, шээсний ерөнхий, цээжний зураг, хэвлийн эхо шинжилгээнд хамруулсан. Тус ангийн эмнэлэгт 14 хоног хэвтэн эмчлүүлж, эмнэлгийн тусламж үйлчилгээ авсан" хэмээсэн байна.

"Нүүрсний хулгай" хэргийн хамгийн гол тоглогч, бүх зангилааны эзэн нь Б.Ганхуяг. "Б.Ганхуягийг ЭТТ-н мөнгийг хуваарилдаг байхад түүнтэй сүжирсэн бүхэн хоригдох хугацаанд нь анхаарч, халамжилж байгаа. Хэд хэдэн удаа "MCS"-ийн харьяа эмнэлэгт эмчлүүлсэн, хорих ангид тусгай хангамжтай хэвтдэг" гэгдэж байв. Энэ бол есдүгээр сарын байдлаарх мэдээлэл.

Гэвчиг хордлогын шинжтэй гэнэтийн тууралт гарч, эрүүл мэнд нь есдүгээр сарын 20-ноос хойш эрс доройтож эхэлсэн тухай хэлсэн нь анхаарал татаж буй юм. Үүнээс Б.Ганхуягийн биед үнэхээр хордлогын тууралт үүссэн үү, цаашлаад ШШГЕГ-ын харъяа урьдчилан хорих ангид түүнийг хордуулах боломжтой юу гэдэг асуулт үүсэж байна.

Энэ мэдээнд өгөх таны үнэлгээ

Хуваалцаарай Жиргээрэй