"Оюу толгой"-н 7.2 тэрбумаар “Говийн Өгөөж” ХХК-ийн барьсан сургууль, цэцэрлэг нурах эрсдэлд хүрчээ

Таван жилийн өмнө "Говийн оюу хөгжлийг дэмжих сан"-гийн 100 хувийн хөрөнгө оруулалтаар Ханбогд суманд 640 хүүхдийн суудалтай сургууль, 200 хүүхдийн цэцэрлэг барьсан байна. "Оюу толгой" компанийн 7.2 тэрбум төгрөгийн санхүүжилтээр Өмнөговь аймгийн "Говийн өгөөж" ХХК барьсан. Харамсалтай нь энэ сургууль, цэцэрлэгт цууралт үүсэж эхэлжээ.

Өнгөрсөн жил буюу 2022 онд сургуулийн шал нь нурж, ажилчид өөрсдөө засч янзлаж байжээ.

29 анги танхимтай сургууль, найман ангитай цэцэрлэгийн барилгыг барьж гүйцэтгэх өртөг 6.1 тэрбум, тоног төхөөрөмж, менежментийн зардал 1.1 тэрбум төгрөг болсон байна.

Цууралт өгсөн барилгын аюулгүй байдлын талаар нутгийн иргэд барилга хариуцсан инженерээс асуухад "Тухайн барилгыг аюулгүй, үйл ажиллагааг хэвийн үргэлжлүүлэх боломжтой гэж" мэдээлжээ.

“Говийн оюу хөгжлийг дэмжих сан”

“Оюу толгой” компани орон нутгийн тогтвортой хөгжлийг дэмжин тус сангаар дамжуулан Ханбогд, Манлай, Баян-Овоо, Даланзадгад сумуудад жил бүр таван сая ам доллартой тэнцэх төгрөгийн санхүүжилтийг олгодог байна.

640 хүүхдийн сургууль, 200 хүүхдийн цэцэрлэгийн барьсан компанийн тухайд:

Уг барилгыг барьж, гүйцэтгэсэн "Говийн Өгөөж" ХХК нь өмнө нь хэд хэдэн тендерт шалгарч байжээ.

Тухайлбал, Говьсүмбэр аймгийн Шивээговь суманд 320 хүүхдийн сургуулийн барилга, Цаг уурын барилгын их засварын ажил, ЗДТГ-ын барилгын засвар, гадна тохижилт, дулааны шугамын холболтын ажлуудыг хийж гүйцэтгэжээ.

2019 онд ЗДТГ-ын барилгын засвар, гадна тохижилт, дулааны шугамын холболтын ажил хийгдсний дараа гадна засварын үүдний хэсэг урссан байна.

"Говийн Өгөөж" ХХК нь: 2005 оны арванхоёрдугаар сарын 09-ний өдөр үүсгэн байгуулагдсан гэж бүртгүүлжээ. Тус компанийн хамтран эзэмшигчээр "Говийн Өгөөж" групп, БНХАУ-ын иргэн Эзх Компани Сун Юань нар бүртгэлтэй байна. Гүйцэтгэх захирал нь Алтанцэцэгийн Нарандэлгэр аж.

Shilengov.mn сайтаас хайж үзэхэд, "Говийн Өгөөж" ХХК нь Өмнөговь аймгийн Даланзадгад суманд таван газар эзэмшдэг тухай мэдээлэл гарч ирж байна. 2016.03.03-нд дөрвөн газраа авсан бөгөөд Худалдаа, нийтийн үйлчилгээний газар, төв, цогцолборын зориулалтаар 578м2, 455м2, 426м2, 255м2 гэхчлэн нийт 1,714м2 газар авчээ. Мөн 2006.11.15-нд ХАА-н машин, механизмын хашаа, гаражаар 2,049м2 газар авсан байна.

Т.НАНДИН-ЭРДЭНЭ

Энэ мэдээнд өгөх таны үнэлгээ

Хуваалцаарай Жиргээрэй