461-р ангийн эмч: Б.Ганхуяг 5-9 удаа эмнэлэгт хэвтэж, шинжилгээ өгсөн, бие нь хэвийн байгаа

"Эрдэнэс тавантолгой" ХК-ийн гүйцэтгэх захирлаар ажиллаж байхдаа саатуулагдаж, урьдчилан хорих ангид жил гаруй цагдан хоригдож буй Б.Ганхуягийн эрүүл мэндийн асуудалд ноцтой асуудал үүссэн талаар ар гэр нь удаа дараа мэдээлж буй. Өөрөөр хэлбэл Б.Ганхуягийн гэр бүлийнхэн дүүгээ, ахыгаа хүнцэл гэх бодисоор хордуулсан энэ нь аажмаар нөлөөлж биеийн байдал нь муудаж байгаад анхаарал хандуулаач хэмээн хэвлэлийн хурал хийж, холбогдох газруудад хандсаар байгаа.

Тэгвэл энэ асуудлаар ШШГЕГ-аас тайлбар мэдээлэл өглөө.

ШШГЕГ "Нийгэмд тэнцвэртэй мэдээлэл хүргэх үүднээс бид нар албан ёсны мэдээлэл өгч байна. Өнөөдөр 461 дүгээр ангид 800 гаруй хоригдогч байна. Тэд бүгдээрээ нэг гал тогооноос хоол ундаа хэрэглэдэг. Үндсэндээ энд 800 хүний эрүүл мэнд, аюулгүй байдал яригдаж байгаа учраас та бүхэнд албан ёсны мэдээллийг өгье гэж бодсон юм. Б.Ганхуягийн хувьд хүнцэл гэж яриад байгаа. Энэ нь хүний биед тодорхой хэмжээгээр зайлшгүй байдаг химийн элемент" .

-Б.Ганхуяг шинжилгээний хариу одоогийн байдлаар ямар нэг эмгэг өөрчлөлтгүй гарч байгаа-

461-р ангийн эмч "Б.Ганхуяг анх 2022 оны 12 дугаар сарын 07-нд цагдан хоригдсон. Үзсэн жижүүр эмчийн тэмдэглэлд биеийн эрүүл мэнд тогтвортой, амин үзүүлэлт хэвийн, хэсэг газрын үзүүлэлтээр бол хоёр хөлийн шилбээр хуучин харшлын сорвитой гэж хүлээж авсан тэмдэглэл үзлэг байдаг. Б.Ганхуягийг хоригдсон цагаас нь эхлээд хорих ангийн эмнэлгийн хяналтад явж байгаа. Эмнэлэгт гурван удаа хэвтсэн. Хорих 401 дүгээр ангийн нэгдсэн эмнэлгийн эмнэлэг хяналтын комиссын шийдвэрээр лавлагаа шатлалын эмнэлэгт 5 дугаар сард "Интер мед" эмнэлэгт, 11 дүгээр сард "Сонгдо" эмнэлэгт хэвтэн эмчлүүлсэн. Хоригдож байх хугацаандаа байнгын өдөр тутмын хяналтын үзлэг хийж байсан. Зургаан удаа лабораторийн шинжилгээнд, гурван удаа багажийн шинжилгээнд хамрагдсан. Одоогийн байдлаар эмгэг өөрчлөлт илрээгүй. Өнөөдрийн байдлаар Б.Ганхуягийн биед илрэх илэрхий зовиур байхгүй, амин үзүүлэлтүүд нь тогтвортой, шинжилгээнээс гарсан өөрчлөлт байхгүй.

Ерөнхий хордлогын шинж тэмдэг хүний биед илрэхдээ бөөлжинө, гүйлгэнэ, бие сульдана, ядарна, булчин суларна. Энэ хүнд тийм шинж тэмдэг илрээгүй байна. Амин үзүүлэлтүүд хэлбэлзээгүй байна. Шинжилгээгээр хордлогын шинж тэмдэг илрээгүй. 10 дугаар сард хордлого өгөөд хөл гараар нь тууралт гарсан гэх мэдээлэл гарсан. Үүнтэй холбоотой тайлбар мэдээлэл өгөхөд бид нар Арьс судлалын үндэсний төвөөс эмч ирж үзүүлсэн. Эдийн шинжилгээ авсан. Энэ хариу нь энгийн хайрст гэж гарсан. Өнөө өглөө үзэхэд амин үзүүлэлтүүд нь хэвийн байсан. Хордлогын шинж тэмдэг илрээгүй" гэв.

Мэдээллийн үеэр хоригдогч Б.Ганхуягийн ах, эгч нарын зүгээс "Бид 3 дугаар шатлалын магадлагаа бариад явж байна. Танайхаас нэг шатлал илүү эмнэлгийн магадлагаа. Та нар бодит мэдээлэл өгөөч" гэх асуулт, хүсэлтийг тавьсан юм.

-Б.Ганхуягийн шинжилгээний хариу дахь хүнцлийн хэмжээ хэвийн үзүүлэлт-

Эмнэлгийн хэлтсийн дарга, хурандаа Ч.Лхамсүрэн "Хүнцэл гэдэг хүнд металлын элемент. Олон улсад болон манай монгол улсад стандарт тогтоосон байдаг. Ундны усанд олон улсад 0.05 мг/л хэмжээтэй, монгол улсад 0.01 мг/л хэмжээтэй байдаг. Нэг литр усанд ийм хэмжээтэй байна гэсэн үг. Хүнсний бүтээгдэхүүн үр тариа, мах махан бүтээгдэхүүн, жимс хүнсний ногоо, сүү сүүн бүтээгдэхүүн, далайн бүтээгдэхүүнд стандарт хэмжээ байдаг. Хүний биед байдаг, хэтрэхээрээ хордлого, хор ч болдог. Хүний биед хордлого учруулах хэмжээ нь 0.01-0.05 грамм, үхэлд хүргэх хэмжээ нь 0.06-2 гр байдаг.

Хүнцлийг далайн бүтээгдэхүүн, вино дарс, навчин тамхи хэрэглэдэг хүмүүс илүү их авдаг. Мөн харшил, арьсны өвчин, үрэвслийн өвчний үед хэрэглэсэн эм, тосон түрхлэг зэргээс авчихсан байдаг юм.

Лавлагаа шатлалын эмнэлгээс хийсэн шинжилгээний хариуг дамжуулаад авлаа. Энэ дээр хүнцлийг үс, цус, шээснээс авсан байна. Цусанд 9.29 мг/ л гарсан байна. Энэ эрүүл ахуй хор судлалын лабораторийн шинжилгээн дээр лавлах хэмжээг ард нь бичиж өгөөгүй байна. Ямар ч шинжилгээний ард лавлах хэмжээг тавьж өгдөг. Тэгэхээр үүнийг мэргэжлийн бус хүмүүс хэд байгааг нь хэлж чадахгүй. 9.29 мг/л бол хэвийн гэсэн үг" гэв.

Мөн эмчлэгч эмч нь "Анх ирэхдээ харшлын тууралт, сорвитой ирсэн. Асуумжаар өөрөө цэрэгт байхдаа харшилтай болсон. Сэдрэх үедээ сэдрээд, намжих үедээ намждаг гэж хэлсэн". Эдийн шинжилгээ нь архаг суурьтай энгийн харшил гэж гарсан. Одоогийн байдлаар харшлын сорви анх ирсэн шигээ л байгаа. Өөрөө хлорфенамин тогтмол уудаг гэсэн. Тэрийгээ ууж байгаа" гэсэн юм.

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй