Гэсгээлт 43 хоног

Өнөөдрөөс хотын иргэд дугаарын хязгаарлалтад өнжөөд нэг орно. Ийм байдлаар 43 хоног буюу ирэх оны хоёрдугаар сарын 1-ний өдөр хүртэл машинтай, машингүйн хооронд цутрах нь ээ.

Утга нь, "Сургуулийн хүүхэд тань амарчих тул та тэсгим хүйтнээр машин унаад байх шаардлагагүй" гэсэн тулгалтыг хотын захиргаанаас иргэдэд шууд хийж буй хэлбэр юм. Ахлах болон дунд ангийн сурагчдыг хичээлд нь зөөдөг гэдгийг ч хотын удирдлагууд ер нь мартсан бололтой.

Бас нэг хоржоонтой асуудал нь, энэ 43 хоногт цэцэрлэг цахимд орчинд шилжихгүй. Тэгэхээр нэг өнжөөд л машинаа унах эрхийн хязгаарлалтад орсон эцэг эхчүүд бяцхан үрсээ үүрч дүүрсээр гэрээсээ явган гарах нь ээ. Нийгмийн байдал үүн дээр ихээхэн ууртай хандвал эрх баригчид зөвлөлдөөд, цалинтай чөлөө олгох хэлбэрээр цэцэрлгэт зохицуулалт хийж мэдэх юм. Тэр талаар холбогдох яамныхан эдүгээ зөвлөлдөж байна.

Хүйтний эрч чангарч буй энэ өдрүүдэд замын хоёр талаар битүү явган зорчигчид алхах болсон. Цан хүүрэг болсон эл иргэдийн алхалт энэ 43 хоногт улам олширч, халтирч унах нь унаж, гэмтэх нь гэмтэж, гэртээ харьцгаах сонголттой тулгарч байна.

Э.Бат-Үүлийг хотын даргаар ажиллаж байх үед буюу одоогоос 10 жилийн өмнө дугаарын хязгаарлалтыг эхлүүлж байв. Тийн бид 10 жилийн дараа ч үүнийг нь хэрэгжүүлж л сууна. Агаарын бохирдол бууруулах, түгжрэлийг сааруулах чиглэлд өч төчнөөн мөнгө төсвөөс зарцуулж, төсөл хөтөлбөрүүд хэрэгжүүлэх ч өмнөхөөсөө улам дордсоор байгаа юм.

Одоогийн буй нөхцөл нь, хот байнгын гамшгийн байдалд байж, захиргааны шинжтэй механик арга хэмжээг иргэддээ хүчээр тулгах нь ихэссээр байна. Автобаазаа сайжруулах нэрээр өч төчнөөн тэрбумыг салхинд хийсгэж, нэг хэсэг нөхөд ажлаа хийгээгүйн өр төлөөсийг хотын иргэд тэсгим хүйтнээр 43 хоног дугаар хязгаарлалтад орж "хариуцлага хүлээж" байх жишээтэй.

Хүн амынх нь 47 хувь дөрвөн уулын дунд багширалдан сууж, эндээсээ 24 УИХ-ын гишүүн парламентад тухлуулж, "Бидний асуудлыг шийдээд өгөөч ээ" гэж илгээх ч бодит үр дүн үгүй. "Энэ л ажил хийж чадна" гээд байсхийгээд л нэг хотын дарга сольдог. Өнөөх нь гарч ирээд л иргэд рүү чиглэсэн захиргааны шинжтэй арга хэмжээ авахаа мэдэгддэг. Ийм циклд хот ороод удав.

Дэлхийн дахинаа аялахад хамгийн эрсдэлтэй, агаарын бохирдол, түгжрэл ихтэй хотоор Улаанбаатар нэрлэгдсээр удав. Цаашдаа үүнийгээ богино хугацаанд эмчилж, нэг их сайхан хот болчих төсөөлөл ч ойрын жилүүдэд байхгүй. Тэгэхээр хотын захиргаанаас иргэдээ гэсгээн цээрлүүлэх механик арга хэмжээнүүд авахаа цөөлнө гэдэг хүлээлт ч өөрөө боломжгүй юм.

Монгол хүний хаана ч дасан зохицож амьдардаг, асар өөдрөг зан чанартай. Тийм чадвараараа л хотын иргэдийг амьдар гэж хэсэгтээ тулгасаар байх нь ээ. Ингээд гэсгээлт 43 хоногтоо орцгооё. Хүйтний эрч чангарч буй энэ өдрүүдэд дулаан автомашиндаа зорчиж яваа хэсэг нь цан хүүрэгт дарагдан алхаж буй иргэдээ цөөн бусгаар тээвэрлэн, зам нэгдэцгээхийг нэгэндээ уриалах байна.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй