БНХАУ-ын кино продюсер Хан И: Монголын замын түгжрэл намайг гайхшруулсан

Энэ жил анх удаа "Хархорум" кино наадам зохион байгуулагдаж, шилдгүүдээ шалгаруулсан билээ. Тэгвэл бид тус кино наадмын зочин БНХАУ-ын кино продюсер Хан И-тэй ярилцсан юм.

Тэрээр хэд хэдэн олон улсын кино наадмын шагналт кино продюсер бөгөөд олон улсын хамтын уран бүтээл, стратегид тулгуурласан маркетинг болон БНХАУ-ын хараат бус бие даасан кино бүтээлүүдийг түгээх чиглэлээр мэргэшсэн аж.

"Сайн сахиусан тэнгэрүүд", "Хятадын хүнд жин", "Гэртээ харих сүүлийн галт тэрэг" зэрэг алдартай баримтат кинонуудын продюсероор ажиллаж, найруулагчаар ажилласан анхны бүтээл “In My Eyes" кино нь 2018 оны Шанхайн олон улсын кино наадамд оролцож байжээ. Түүнчлэн Хан И нь Канадын Карлтон их сургуульд сэтгүүлзүйн чиглэлээр магистрын зэрэг хамгаалсан. 

Тэрээр манай улсад анх удаагаа ирсэн сэтгэгдлээ бидэнд хуваалцлаа.

-Монголд анх ирээд замын түгжрэлийг маш их гайхсан, ийм түгжрэл байдаг юм уу гэж бодогдсон-

-Монголд ирсэн сэтгэгдэл ямар байна вэ, та өмнө нь манай улсыг ямар гэж төсөөлдөг байсан бэ?

-Техник технологи хөгжсөн учир интернетээс хайгаад л Монголын тухай мэдээлэл авчихдаг. Яагаад ч юм Монгол улс гэхээр хамгийн түрүүнд морь, үзэсгэлэнт байгаль толгойд буудаг. Өргөн уудам талд давхиж яваа морьд амгалан тайван байдлыг билэгддэг юм шиг санагддаг.

Гэхдээ Монголд ирээд замын түгжрэлийг нь маш их гайхсан. Гуравхан саяулаа өргөн уудам талд амьдардаг хэрнээ яаж ингэж түгжирдэг юм бэ гэж бодогдсон. Цөөхөн хүн амтай, дээрээс нь газар нутгийн хэмжээ нь их шүү дээ. Тийм байхад яаж ингэж түгжирч амьдардаг юм бэ. Олон цаг зам дээр түгжрэх надад их хүнд байсан. Зам дээр түгжирч байгаа хүмүүс гэр бүлдээ бас өөртөө хэрхэн цаг зав гаргадаг бол гэсэн бодол төрсөн.

-Монголчууд кино урлагаараа дамжуулан түгжрэлээ бууруулах ямар нэгэн гарц олох ч юм бил үү-

-"Хархорум" кино наадмын талаарх сэтгэгдэл?

-Надад маш их таалагдсан. Соёлын яамны сайд Ч.Номин бидэнтэй тусгайлан уулзаж энэхүү кино наадмын талаар болон соёлын яам кино урлагаа хэрхэн дэмжиж ажилладаг тухайгаа бидэнд танилцуулсан юм. Кино урлагаа дэмждэг улс байгаад маш их талархаж байна.

Бид хүнд хэлэхийг хүссэн ч хэлж чадахгүй зүйлсээ цаасан дээр бичдэг, яг түүнтэй ижил нийгэмд нөлөөлөхийг хүссэн сэдвээрээ уран бүтээл туурвидаг. Тиймээс Монголчууд кино урлагаараа дамжуулж түгжрэлээ бууруулах ямар нэгэн гарц олох ч юм билүү.

-Монгол улс автозамын түгжрэлээс бусдаар маш сайн хөгжиж байгаа харж байна -

-Хоёр улсын кино урлагын хамтын ажиллагааны талаар?

-БНХАУ болон Монгол улсын цаашдаа кино урлагаар холбогдож хамтарч ажиллах боломжтой гэж боддог. Хоёр улсын хувьд хөрш зэргэлдээ улсууд учир туршлага солилцож, цаашлаад хамтын уран бүтээл гаргах боломж дүүрэн гэж бодож байна. Монгол улс автозамын түгжрэлээс бусдаар маш сайн хөгжиж байгаа гэж харж байна.

-Ярилцсанд баярлалаа.

Өөрийн сэтгэгдлээ илэрхийл

Share Tweet