"Eguur" агентлаг таван нас хүрлээ

"Eguur" агентлаг өнөөдөр таван нас хүрч байна.

Монголын цахим мэдээллийн хэрэгслүүдийн эгнээнд нэгдэж, "Баримттай мэдээлнэ" уриан дор бид үүд хаалгаа нээсэн нь 2019 оны нэгдүгээр сарын 28 юм.

“Eguur” агентлагийг 2019.01.28-ны өдөр сэтгүүлч Ж.Мядагбадам үүсгэн байгуулсан. Бид уламжлалт текстэн хэлбэрийг сууриа болгож, орчин үеийн хэлбэр хийцүүдийг цаг тутам тогтмолжуулан, "нутагшуулах"-аар хөдөлмөрлөсөн таван жилд алдаагаа засаж, улам илүү сайжрахын төлөө зорьж ажилласан билээ.

Нийтлэлийн бодлогоос:

Eguur.mn сайтыг мэдээллийн сайт нь чөлөөт ардчилсан нийгмийн гол үнэт чанаруудын нэг болох иргэдийн мэдээлэл авах, хайх, түгээх эрхийг хүндэтгэж, нийтлэлийн бодлогоо хараат бус, бие даасан байдлаар хэрэгжүүлнэ. Нийтлэлийн бодлогын хувьд аливаа нам, улс төрийн хүчин болон төрийн хяналтаас ангид байдлаар сэтгүүл зүйн мэргэжлийн үйл ажиллагаа явуулна.  

Редакц нь үндэсний эрх ашиг, нийгмийн үнэт зүйл, хүний эрх, шударга ёсны төлөө дуу хоолойгоо өргөж, нийгэмд эерэг мэдээллийг түгээж, хууль бус үйлдлийн эсрэг сөрөн зогсож, иргэний үзэл бодлоо илэрхийлэх эрхийг ханган ажиллахад анхаарна. Аж ахуйн нэгж, төрийн байгууллага, хувь иргэнтэй бизнесийн зарчмаар хамтран ажиллах нь нээлттэй. Энэ нь редакцын бодлогод гаднаас оролцох боломжоос ангид байна.

Бид өнгөрсөн таван жилийн хугацаанд 71 мянга 431 мэдээ, материал бэлдэж, давхардаагүй тоогоор 99 сая 164 хандалт авчээ. Үүний 29 сая 213 мянга буюу 29.5 хувь нь сошиал орчноор дамжаагүй, сайтын үндсэн платформ руу шууд хандсан үзүүлэлт юм.  

Бид цаашид улам хариуцлагатай, нухацтай, олон төрөлт контентыг төрөлжүүлэн төлөвшүүлэхээр хичээж, гадаад хэл дээр мэдээ, материалаа түгээх ажлыг эхлүүлэн, шинэ тутам технологийн арга хэрэгслүүдийг нутагшуулах зорилго тавин ажиллаж байна.

Харин цоо шинэ 2024 оныг бид,

• Эрхлэгч Ж.Мядагбадам
• Агуулгын редактор М.Тэнгис, мэдээний редактор Б.Отгонбаяр
• Улс төрийн албаны дарга П.Урнаа, сэтгүүлч Д.Мөнхбат, Э.Үүрийнцолмон, Ц.Энхжаргал, Т.Нандин-Эрдэнэ, Ц.Наранцацрал.
• Орчуулагч Б.Буяндорж
• Зураглаач, эвлүүлэгч, гэрэл зурагчин Б.Эрдэнэбаяр, О.Улсболд, Б.Мягмарбаяр
• Хуульч, дата судлаач Б.Мандах, нягтлан Т.Гэрэлтуяа
• Админ С.Боргил нарын 16 хүний бүрэлдэхүүнтэй эхлүүлээд байна.

Таван жилийн турш бидэнтэй хамт байсан уншигч та бүхэнд баярлалаа!

Энэ мэдээнд өгөх таны үнэлгээ

Хуваалцаарай Жиргээрэй