МАН: Хэрэгт холбогдогсдод сануулав / АН: Л.Гантөмөрийг эсэргүүцэгчдийн эсрэг хамгаалалт гаргав

Өнгөрөгч бямба гарагт /2024.03.23/ МАН Бага хурлаа, АН Үндэсний бодлогын хороогоо хуралдуулж, мөрийн хөтөлбөрөө хэлэлцэн эцэслэлээ. Улмаар ням гарагт Үндэсний аудитын газарт хүргүүлсэн юм. Хоёр намын хаалттай хуралдааны хөшигний ард юу өрнөв.

-МАН-ын удирдлагууд “Хэрэгт нэр холбогдсон л бол нэр дэвшүүлэхгүй” гэж сануулжээ-

Монгол ардын намын Бага хурал 10.00 цагт товлогдсон ч, 11.30 цаг хүрч эхэлсэн. Хэрүүл уруулгүй, дуулиан шуугиан багатай, жигтэйхэн эв нэгдэлтэй хурал болсон тухай дуулдав. МАН мөрийн хөтөлбөрөө ч, нэр дэвшигчдээ ч хэлэлцсэн байна.

Одоогийн УИХ-ын гишүүд болох Ж.Эрдэнэбат, Ц.Мөнхцэцэг, М.Оюунчимэг, Ж.Бат-Эрдэнэ, Б.Дэлгэрсайхан, Ц.Сандаг-Очир нараас эхэлсэн хууччуул нэр дэвших хүсэлтээ намдаа өгцгөөжээ. Бүр анхан шатны шүүхээр ял сонссон Б.Энх-Амгалан, хэрэг нь шүүх рүү шилжсэн Н.Наранбаатар нар ч нэр дэвшихээ санаархалтайгаа нуусангүй.

Гэвч хурал доторх уур амьсгал тэдний хүслээс өөр. Намын дарга, генсек хоёр нь авлига, албан тушаалын байтугай хэрэгт нэр холбогдсон хүн бүрийг дэвшүүлэхгүй гэдэг үгээр сануулга өгчээ. Тодруулбал,

Намын дарга Л.Оюун-Эрдэнэ “Авлигатай тэмцэх ажлаа үргэлжлүүлнэ. Хэрэгт нэр холбогдсон хүн бүрийг хүнийг нэр дэвшүүлэхгүй” гэсэн байр суурьтай байгаагаа илэрхийлжээ.

Намын генсек Д.Амарбаясгалан: МАН сонгуульд нэр дэвшигчийг дэвшүүлэхдээ хөрөнгөтэй, хөрөнгөгүй, эрх мэдэлтэй, мэдэлгүй гэж ялгахгүй. Авлига, албан тушаалын гэмт хэрэгт холбогдож байгаагүй, улс төрийн болон намын ёс зүйн дүрмийг зөрчөөгүй, боловсрол, дадлага туршлага, багаар ажиллах зарчим, тойргийн иргэдийн дэмжлэгтэй байх зэргийг харгалзана” гэжээ.

Мөрийн хөтөлбөр боловсруулах ажлын хэсгийн ахлагчаар Ерөнхий сайдын зөвлөх А.Ариунзаяа ажилласан. Ажлын хэсэгт дэд сайд асан О.Батнайрамдал, Ерөнхийлөгчийн хүргэн Б.Пүрэвдагва, ХХААХҮ-ийн дэд сайд М.Ганхүлэг нарын залуус багтаж.

Тус нам мөрийн хөтөлбөрийнхөө гол амин сүнсийг бүсчилсэн хөгжил болоод эдийн засгийн өсөлтийг айл бүрийн хаалгаар оруулахад анхаарсан гэж тодорхойлж. 2028 онд нэг хүнд ногдох ДНБ-ийг хоёр дахин нэмэгдүүлж 10 мянган ам.долларт хүрнэ гэж төсөөлжээ.

Нийт 40 гаруй мянган иргэн, 38 мэргэжлийн холбоодод нэгдсэн 500 гаруй байгууллага, аж ахуйн нэгжээс ирсэн салбар бүрийн шинэчлэлийн асуудлыг тусгасан аж.

-АН-ынхан хатуу хамгаалалт дор хагас өдөр хуралдав-

Ардчилсан нам Т.Ганболдын “Corporate” зочид буудалд Үндэсний бодлогын хороогоо хуралдуулав. Эхлээд тус намын Улстөрийн зөвлөл хуралдаж, үдээс хойш 15.00 цагт эхэлсэн.

Юун түрүүнд хэвлэлд асар хаалттай болов. Ядаж нэг давхарт нь орж зогсоод орсон, гарсан гишүүдээс байр суурийг нь сонсох ч боломжгүй, хамгаалалт гаргасан байлаа. Эв түнжингүй байдал үүсэх, хэрүүл уруул гарахаас болгоомжилсон хэрэг гэж харав. Баянгол, Чингэлтэй, Хан-Уул дүүргийн залуучууд үүдэнд нь зогсоод “Л.Гантөмөр өргөдлөө өг” гэсэн бичигтэй лоозон барьж гарч ирснээр батлагдсан. Тэд “Завсарласан хуралдаа орох гэсэн боловч оруулахгүй байна” гэж хэсэг бужигнасан юм.

Энэ удаагийн хурлаар зөвхөн мөрийн хөтөлбөрөө хэлэлцсэн бөгөөд энэ долоо хоногт дахин хуралдаж, нэр дэвшигчдийн асуудлаа ярихаар төлөвлөжээ. ҮБХ-ны 504 гишүүнээс 300 гаруй нь ирж, 60 гаруй хувийн ирц бүрдүүлж. Ерөнхийлөгч асан Х.Баттулга, Ц.Элбэгдорж, АН-ын дарга асан С.Эрдэнэ, УИХ-ын гишүүн Н.Алтанхуяг нар ирж оролцсонгүй. Харин өөрсдийн биет төлөөлөгчдөөрөө дамжуулан үгээ дайцгаажээ. Жишээ нь, Ерөнхийлөгч асан Х.Баттулга Нийслэлийн Ардчилсан намын дарга Т.Батцогтоор, С.Эрдэнэ А.Цэрэнбатаар, Ц.Элбэгдорж О.Чулуунбилэгээр гэхчлэн.

АН-ын мөрийн хөтөлбөр боловсруулах ажлын хэсгийг Н.Алтанхуягийн хүргэн Г.Дэнзэн буюу АН-ын Сургалт судалгааны газрын дарга нь хариуцсан гэгдэж байв. Нөгөө талаас Х.Баттулгын тэргүүлдэг МоАХ фракцаас АН-ын мөрийн хөтөлбөрийг боловсруулж, энэ сарын 21-нд хэлэлцүүлж хүртэл амжсан. Мөн АН-ын дарга Л.Гантөмөр намынхаа 2024 оны сонгуулийн мөрийн хөтөлбөрийг МАН-ын дарга Л.Оюун-Эрдэнийн “Алсын хараа-2050”-тай нийцүүлэн боловсруулах чиглэл өгснөөр гишүүдээ бухимдуулсан.

Ингэж гурвалжин, дөрвөлжин болсны эцэст ямартай ч, “Бүтэн Ардчилал” үндэсний хэмжээний аяныхаа үр дүнгээр олон нийт, мэргэжлийн холбоодоос авсан саналаа мөрийн хөтөлбөр болгон нэгтгэн боловсруулсан аж. Нийт 79 мянган гишүүн, 39 салбарын мэргэжлийн холбоод, төрийн бус байгууллагуудын саналыг тусгасан гэв.

Ардчилсан намын тэргүүн дэд дарга С.Баярцогт, “Үзэл бодлоо чөлөөтэй илэрхийлэх, хэвлэн нийтлэх, шашин шүтэх гэх мэт эрхүүд нь хангалттай байгаа ч эдийн засгийн эрх чөлөөгөө бүрэн эдлээгүйгээс ардчиллын үр өгөөжийг бүрэн хүртэж чадахгүй байна. Иймд эдийн засгийн либералчлах бодлогыг барьж, ажил хийж байгаа хүн нь илүү сайхан амьдрах, хувийн хэвшил хөгжлийн түүчээ болно гэсэн суурь зарчим дээр суурилна” гэжээ.

Харин УИХ-ын гишүүн Ж.Батсуурь “Авлигыг зогсооё, дарангуйллыг зогсооё. Авлигын суурь нь өөрөө Төрийн өмчит компаниуд болчхоод байна. Тиймээс Төрийн өмчит компаниудыг олон нийтийн мэдэлд оруулъя” гэжээ.

АН мөрийн хөтөлбөртөө, Стратегийн 9 заалт, 9 бүлэг бүхий “Эрчимт хөгжлийн 9:90:900 хөтөлбөр” гэж тусгажээ. Зогссон хөгжил, царцсан амьдралаа сэргээж, цөхөрсөн олноо сэрээж, хөгжил дэвшилд түүчээлэн хүргэх, заавал хийх 90 ажилтай. Нэг бүрчлэн задраад, ажил болох 900 гаргалгаатай. Мөн тэд “Бусад намын мөрийн хөтөлбөрүүдээс ард иргэдэд очих өгөөж илүү. Өмнөх мөрийн хөтөлбөрөөс хол илүү боллоо” гэж дүгнэцгээжээ.

Н.БЭХНЭМЭХ

Энэ мэдээнд өгөх таны үнэлгээ

Хуваалцаарай Жиргээрэй