Ши Жиньпин гадаад хөрөнгө оруулагчдыг ятгахаар Америк захирлуудтай уулзлаа
Сүүлийн хэдэн сар БНХАУ-д эдийн засгийн өсөлт удааширч, хууль эрх зүйн зохицуулалт өөрчлөгдөн, үндэсний аюулгүй байдлын хэд хэдэн хууль батлагдсаны улмаас гадаадаас шууд орж ирэх хөрөнгө оруулалт буурсан.
Тэгвэл БНХАУ-ын Ерөнхийлөгч Ши Жиньпин гадаад хөрөнгө оруулагчдыг ятган сэнхрүүлэхийн тулд лхагва гарагт /2024.03.27/ арав гаруй Америк компанийн захирал, эрдэмтэн судлаачдыг хүлээн авч уулзсан байна.
Түүний хүлээн авч уулзсан хүмүүсийн дунд “Qualcomm”-ийн гүйцэтгэх захирал Кристиано Амон, “FedEx”-ийн гүйцэтгэх захирал Раж Субраманиам, “Blackstone Group”-ийн гүйцэтгэх захирал Стивен Шварцман нэр байжээ.
Ши Жиньпин тэдэнд хандаж АНУ-ын бизнесүүд БНХАУ-д үргэлжлүүлэн хөрөнгө оруулахыг урьж, зах зээлийг гадаад фирмүүдэд нээлттэй болгох шинэчлэл хийхээ амласан юм.
Уулзалтын талаар Хятадын Гадаад хэргийн яамнаас нийтэлсэн мэдээллээс харвал Ши Жиньпин “БНХАУ-ын өсөлтийн хэтийн төлөв гэрэл гэгээтэй, үүнд бид итгэлтэй байна” гэж хэлжээ.
Мөн Ши АНУ, БНХАУ-ын хооронд илүү сайн ирээдүй бий болгохыг уриалж “Эдийн засаг, худалдаа, хөдөө аж ахуй гэх мэт уламжлалт салбар ч бай эсвэл уур амьсгалын өөрчлөлт, хиймэл оюун ухаан зэрэг шинээр гарч буй салбарт ч АНУ, БНХАУ бие биеийнхээ хөгжлийг дэмжих хэрэгтэй” хэмээсэн байна.
Эх сурвалж: CNN
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.