Энэтхэг улсын Уттар Прадеш мужид мягмар гарагт /2024.07.02/ болсон шашны мөргөлийн үеэр шахагдаж нас барсан хүний тоо 121-т хүрсэн байна.
Тус цуглааныг зохион байгуулагч 80 мянган хүн оролцуулах зөвшөөрөл авсан ч 250 мянган хүн хүрэлцэн ирсэн аж. Тэд Бхоле Баба нэртэй шашны зүтгэлтнийг харахаар ирсэн цугласан юм.
Мөргөлийн сүүлд олон мянган сүсэгтнүүд түүний хөлд хүрэх гэж мөн гишгэсэн шорооноос нь авах гэж оролдсоны улмаас үймээн үүсэж 121 хүн шахагдаж амь үрэгджээ.
Бабагийн өмгөөлөгч А.П.Сингх мэдэгдэл хийхдээ Баба хэзээ ч хөлд нь хүрэх эсвэл гишгэсэн шорооноос нь авахыг хүмүүст хэлээгүй гэсэн байна.
Харин өөр шалтгааны улмаас үймээн самуун үүссэн байх магадлалтай гэж хэлсэн юм.
Гэсэн хэдий ч цагдаагийн албанаас Бабагийн оршин сууж буй газрыг тогтоохоор ажиллаж эхэлсэн байна. Үймээний улмаас бэртсэн хүмүүсийг эмчилж буй эмнэлгийн ажилтан ихэнх хүмүүс амьсгал нь боогдсоны улмаас нас барсан гэж хэлжээ.
121 хүн амиа алдсанаас 112 нь эмэгтэй, долоо нь хүүхэд байсан юм. Тэднээс гадна 31 хүн үймээний улмаас бэртсэн байна.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.