ШШГЕГ-аас хариуцлага нэхье: 21 настай талийгаачийн өмнө хоригдол хэрчүүлж нас барсан хэрэг ч дарагджээ

21 настай хүү О 461-р хорих ангид хоригдож байх хугацаандаа амь насаа алдсан хээг долдугаар сарын 23-ны өдөр гарсан.

Хүү хорих ангид дөрвөн сарын турш хоригдсон бөгөөд хуулийн байгууллагын алба хаагчдад зодуулж, гэмтэл авсны улмаас УГТӨ-т хүргэгдээд удаагүй байхдаа ийн амь насаа алдсан гэж ар гэр нь үзэж буй.

Мөн хүүг анхнаасаа үндэслэлгүй баривчилсан, хэрэг хүлээлгэхээр эрүүдэн шүүсэн хэмээн төрсөн эгч нь олон нийтэд мэдээлсэн. Талийгаачийг гар утасны хулгайн хэргээр ийн хоригдож байсан гэсэн юм.

Харин өнөөдөр ЦЕГ-ын Урьдчилан сэргийлэх газрын хэлтсийн дарга, хошууч Г.Мөнхбаяр мэдээлэл хийхдээ,

"О нь долоон холбогдогчтой, таван төрлийн 53 хэргийн хүрээнд 10 үйлдэлд яллагдагчаар татагдсан байсан. Эмнэлэгт нойр булчирхайн цочмог үрэвсэл оноштой ирсэн. Нас барсан шалтгааныг дахин магадалж, эрүүдэн шүүсэн гэх мэдээллийн хүрээнд холбогдох цагдаагийн алба хаагчдыг шалгаж байна" хэмээсэн билээ.

Бид талийгаачийн эгчтэй утсаар холбогдлоо.

-Талийгаачийг 10 үйлдэлд яллагдагчаар татагдсан байсан гэж мэдээллээ. Энэ тал дээр мэдээлэлтэй байсан уу?

-Манай дүүг АТГ-т хандсаны дараа энэ 10 хэрэг шинээр үүссэн.

-Ямар 10 үйлдэл гэдэг талаар дэлгэрэнгүй мэдээлэл бий юу?

-Бидэнд энэ талаар ямар ч мэдээлэл өгөөгүй. Долоон холбогдогчтой гэчхээд нөгөө зугааг нь одоо хүртэл олоогүй байгаа шүү дээ.

-Хүүг бас судсандаа мансууруулах төрлийн бодис тарьж, хэрэглэдэг байсан гэх мэт мэдээллийг хуулийн байгууллагын эх сурвалж өгөөд байгаа юм?

-Үүнийг эрс үгүйсгэнэ. Тэгж ярьж байгаа бол баримт нотолгоогоо гаргаж тавих хэрэгтэй.

-Та бүхэн дахиж хэвлэлийн бага хурал хийх үү. Цаашид яах төлөвлөгөөтэй байгаа вэ?

-Өнөө орой 20.00 цагаас ХЗДХ-ийн сайд О.Алтангэрэл биднийг хүлээж авч уулзахаар болсон. Уулзалтаар асуудал хэрхэхийг мэдэхгүй. Бидний хувьд буруутай алба хаагчдыг хариуцлага хүлээгээсэй л гэж хүсэж байгаа шүү дээ. Бидэнд өөр олон баримт нотолгоо бий. Дахин хэвлэлийн бага хурал зарлана.

Мөн талийгаачийн эгч Д хэвлэлд өгсөн ярилцлагадаа "Миний дүүгийн хамт явж байсан, зүс таних хүмүүс гар утас хулгайлсан юм билээ. Ингээд Баянгол дүүргийн цагдаагийн хэлтсээс дуудаж, бусад хүмүүсээ олж ир, таниул гэж дарамталсан. Дарамт, эрүүдэн шүүлт учруулсан учраас дүү маань АТГ-т хандсан. АТГ шалгаж, цагдаа нарыг эрүүдэн шүүлт хийснийг тогтоосон. Гэтэл АТГ-т хандсаны дараа дүүг маань шууд ганц худагт хорьж, түүнээс хойш байнга зодож, дарамталж байсан" хэмээсэн юм.

Талийгаачийн ар гэрийн зүгээс хэргийг хөнгөн ангилалд хамаарах тул гадуур шалгах боломжтой хэмээн холбогдох хүсэлтийг гаргасан ч тоогоогүй, Баянгол дүүргийн цагдаагийн газрын мөрдөгч нь "Та нар хөлөө хүрэх газар хүртэл яв, харна аа" гэж хариулсан гэгдэж буй.

Өдгөө талийгаачийн ямар хэрэгт холбогдоод байсан нь биш, хорих ангид амь насаа алдсан нь л хамгийн их анхаарал татаж, нийгмийн бухимдлыг хүргэж байна.

Гэм буруутай нь шүүхээр шийдэгдээгүй иргэн хорих ангид тодорхой эрх эдэлнэ. Гэтэл амь хохирох ноцтой нөхцөл үүсэж байхад хорих ангийн алба хаагчид яагаад арга хэмжээ аваагүй, анзаараагүй нь сонин. Тэр бүү хэл бие нь муудаж, эмнэлэгт хүргэгдэхэд ар гэрт нь хэлээгүй. УГТЭ-ийн эмч нар л хамгийн анх мэдээг дуулгасан байна.

ШШГЕГ-ын хариуцлагагүй алдаа үүгээр нэмэгдэж буй.

2024 оны УИХ-ын сонгуулийн сурталчилгаат хугацааны үеэр ШШГЕГ-ын дарга Б.Нандинболор орон нутагт онцын шалтгаангүй ажиллахдаа намын суртал ухуулга бүхий агуулга ярьж, уриалж явсан гэх мэдээллийн мөрөөр бид өмнө нь нийтлэл бэлтгэж байв.

Б.Нандинболорыг ийн орон нутагт ажиллаж байх үеэр буюу зургадугаар сарын 21-нд Амгалан дахь 421-р хорих ангид ял шийтгэл эдэлж байсан хүн үйлдвэрийн осолд орж нас барсан. Түүнийг “Хэрэмт цамхаг” УТҮГ-д ажиллуулж байв. Улмаар хэрчигч төхөөрөмжид өртөж, харамсалтайгаар амиа алдсан. Энэ хэргийг олон нийтээс нуун дарагдуулах зорилгоор ар гэртэй нь ойлголцсон гэх ч мэдээлэл түгсэн.

Талийгаач хүү О-гийн холбогдсон хэрэг тусдаа, харин хоригдож байх хугацаанд нь хүний эрхийн зөрчил үүсэх эрсдэл бий болгосон бол энэ ШШГЕГ-ын буруу юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй