“Зориг” гэж ЗГ-ын хөтөлбөрөө нэрлэсэн Л.Оюун-Эрдэнэ С.Зоригийн хэргийг хэзээ шийдэх вэ

Л.Оюун-Эрдэнийн хувьд С.Зориг агсны амь насаа алдсан хэргийг сөхөж, сонгуульдсан нь үнэн. Одоо түүний тэргүүлсэн МАН олонх болж, АН ба ХҮН намтай хамтарсан Засгийн газар байгуулж, ажилдаа ороод байна.

Сонгууль дуусаж, ажил эхэлсэн. Энэ хамтарсан Засгийн газарт “Наадмын дараа намар” гэж сануулах илүүц. Харин С.Зоригийн хэргийг нэгэнтээ сөхснийг, Ерөнхийлөгч асан Ц.Элбэгдоржтой идэвхийлэн “үзэлцсэн” нь хэдхэн хоног, сарын өмнийг сануулахад илүү болохгүй.

Хамгийн сүүлд эрүүдэн шүүлгэж, С.Зоригийг хөнөөсөн хэрэгт буруутгагдсан Т.Чимгээ, Б.Содномдаржаа нарыг цагаатгах ажлын хэсгийг байгуулсан. Яг сонгуулийн үеэр Ц.Амгаланбаатараас хүртэл шоронд ярилцлага авч, арилжааны телевизүүдээр цацсан. Хүн амины хэрэгтэй ялтангаас тэгж ярилцлага авах боломж эрх баригчдад л олдоно. Ер нь нийгмийг зарим талаар бухимдуулсан. Ялтан зурагтаар гаргахдаа улс төр нь тулж иржээ гэж Л.Оюун-Эрдэнэ шүүмжлүүлсэн.

Л.Оюун-Эрдэнэ УИХ-ын сонгуульд нэр дэвшиж, ялалт байгуулсан хүний хувиар арай чиг мөрийн хөтөлбөртөө улайм цайм “С.Зоригийн хэргийг илрүүлнэ” гээд тусгачхаагүй. Гэхдээ олон жил, олон сонгуульд гишгүүр болж ирсэн энэ хэрэг одоо л нэг тийш эргэх нь гэсэн итгэлийг ард түмэнд төрүүлсэн нь худлаа биш. Өөрөөр хэлбэл энэ итгэл. Ийм итгэл зарим үед мөрийн хөтөлбөрийн хэрэгжилтээс чухал байдаг. Тэгэхээр тэр итгэл, хүлээлтийг алдвал цөөнгүй утгаар Л.Оюун-Эрдэнийн улс төр сэвтэнэ.

Эх сурвалжуудын мэдээллээр, саяхан Л.Оюун-Эрдэнэ ЦЕГ-ын дарга Т.Сүхболдод С.Зоригийн хэргийг мөрдөн шалгах ажиллагааг эрчимжүүлэх үүрэг өгсөн байна. Хэргийг задалж, дахин шинээр, эхнээс нь шалгаж эхэлсэн нь бол бараг хоёр жилийн өмнөөс юм. Дээр нь, одоо С.Зоригийн хэрэгтэй холбоотой материалууд бүхэлдээ улсын нууцаас гарсан. Энэ Х.Нямбаатарыг ХЗДХ-ийн сайд байх үед. Улсын нууцаас гарна гэдэг интернэт, Фэйсбүүкэд тавина гэсэн үг биш. Ерөнхий сайд ч танилцаж чаддаггүй байсан бол одоо чадна гэдэг хууль зүйн утгатай. Тэгж танилцсан болохоор сэжүүр атгажээ, нэг биш нэжгээд өнцөг олж харжээ, тийм учраас итгэл төгс энэ хэргийг сонгуулийн өмнө сөхөж, талийгаачийн гэргий Булганы ярилцлага тэргүүтэй хэд хэдэн контент бэлтгэж цацлаа гэж харахад хүрсэн.

Одоо Л.Оюун-Эрдэнийн хамтарсан Засгийн газрын үйл ажиллагааны хөтөлбөр “Хурдтай хөгжлийн төлөө Зориг” гэж нэрлэгдээд байна. Энд С.Зориг агсны нэр багтжээ. Л.Оюун-Эрдэнэ УИХ-ын сонгуулийн дараа ч төрийн ордонд, парламентын танхимын индрээс С.Зориг агсны үгээс давтан давтан эш татсаар байв.

Ингэж тэр хамтарсан Засгийн газрын хөтөлбөртөө хүртэл “Зориг” гэдэг нэрийг шигтгэснээр прагматик хийгээд үзэл санааны бүх түвшиндээ энэ чиглэлд үргэлжлүүлэн анхаарна, АН ба ХҮН намыг ч үүндээ нэгтгэсэн гэдэг мессежийг өгч байна.

Гэхдээ энэ лоозон хэлбэрээр явах уу. Эсвэл хэргийг илрүүлж, шийднэ гэсэн үг үү. Эс бол хоёулаа юу гэдэг анхаарал татаж байна. С.Зориг агсны нэрийг хэчнээн дурдаж, лоозондлоо ч, тэгж улс орны шинжтэй томоохон ажлуудаа явууллаа ч хэрэг илрээгүй, шийдэгдээгүй хэвээр үлдвэл “Зориг” гэдэг үг, нэр багтсан бүх яриа, бүх ажил үзэл санааны хувьд нурах үндэстэй.

Мэдээж Ерөнхий сайдын чиг үүрэгт гэмт хэрэг хянан шийдвэрлэх агуулга байхгүй. Хэзээд байж болохгүй. Тэр утгаар хүн амины хэрэг сөхөж, улс төр хийх Ерөнхий сайд хүний хувьд зохимжтой байгаагүй. Гэхдээ эрх баригч намын дарга, шинэ цагийн өнгийг тодорхойлолцох улстөрчийн хувьд нэгэнтээ анхаарсан нь өөрөө бас “зориг” байсан.

Цаг хугацаа хэрэгтэйг олон нийт ойлгоно.

Гэхдээ мартахгүй.

М.ТЭНГИС

Энэ мэдээнд өгөх таны үнэлгээ

Хуваалцаарай Жиргээрэй