В.Путиний айлчлалын араас Хань Жөн Х Богдын агуулгаар Ши Жиньпинийг төлөөлөн ирэх үү

БНХАУ-ын дэд дарга Хань Жөн өнөө шөнө Монголд айлчлан ирнэ. Түүнийг Монгол Улсын Засгийн газар урьжээ.

Өмнөхөн нь ОХУ-ын Ерөнхийлөгч Владимир Путин таван жил тутам дахь уламжлалт айлчлалаа хийгээд буцлаа. БНХАУ-ын хувьд ч манай улстай дипломат харилцаа тогтоосны 75, Ши Жиньпин хамгийн анх Монголд айлчилсны 10 жилийн ой тохиож байгаа юм. Өөрөөр хэлбэл энэ жил хойд, урд хоёр хөршийн удирдагчид хүрэлцэн ирэх өндөр хэмжээний хүлээлттэй байсан.

Жилийн өмнөөс Владимир Путин, Ши Жиньпин нарын Монгол дахь айлчлалыг зохион байгуулах ажлыг төрийн түвшинд ихээхэн бэлтгэсэн. Харин энэ удаа Ши Жиньпин биш, түүний оронд БНХАУ-ын дэд дарга ирэхээр болоод байна.

Хань Жөн нь дэсээр Ши Жиньпиний дараа бичигдэж, түүнийг төлөөлдөг

Дэсээрээ Хань Жөн яг Ши Жиньпиний дараа бичигдэнэ. Ши Жиньпин өөрөө дэд дарга байх үедээ 2007 онд Монголд ирж байсан удаатай. Хань Жөн дэд дарга болоод жил гаруйн хугацаа өнгөрчээ. Түүнийг Ши Жиньпиний дараа яригдах БНХАУ-ын улс төрд нөлөө бүхий хүн гэж үздэг.

Тэрбээр өнгөрсөн жил гуравдугаар Чарльз хаан болон Камилла нарын титэм өргөх ёслолд улсынхаа төрийн тэргүүн Ши-г төлөөлж очсон. Мөн НҮБ-ын Ерөнхий ассамблейн чуулганы ерөнхий мэтгэлцээнд оролцсон ба энэ жил Владимир Путинийг БНХАУ-д айлчлах үеэр уулзжээ.

Үүнээс Ши Жиньпиний “бие төлөөлөгч” Монголд ирж байна хэмээн ойлгох бололцоо үүснэ.

Ши Жиньпиний биеийн байдал ямар байгаа вэ

Гэхдээ яагаад Ши Жиньпин өөрөө ирсэнгүй вэ гэдэг асуулт тавигдаж байна.

Өмнө дурдсанчлан, төрийн өндөрлөгүүд түүнийг 2024 онд урих чиглэлд идэвхийлэн ажилласан. Ер айлчлал хийхээр болсон гэдэг мэдээлэл ч эх сурвалжуудын түвшинд яригдаж байлаа.

Харин зунаас хойш Ши Жиньпиний биеийн байдал тавгүйтсэн гэх сураг ажиг олон улсын хэвлэл мэдээллийн хэрэгслээр түгсэн юм. Долдугаар сард гэхэд гуравдугаар чуулганы үеэр Ши Жиньпин цус харвасан гэгдсэн. Гэхдээ энэ албан бус мэдээлэл байв.

Түүний хувьд 2021 онд тархины аневризм гэх өвчнөөр оношлогдсон удаатай.

Одоогоор түүний биеийн байдал ямар байгаа нь тодорхойгүй. Өчигдөрхөн Гвинейн ерөнхийлөгчийг БНХАУ-д айлчлах үеэр хүлээн авч уулзсан байна. Эдгээр өдрүүдэд Африк-Хятадын эдийн засгийн форум болсон бөгөөд, Ши Жиньпин өөрийн биеэр оролцжээ.

Албан бус таамаг, сураг ажгаар түүний эрүүл мэнд идэвхийлэн муудах болсон, олон нийтэд үзүүлдэг зураг бичлэгийг хиймэл оюун ухаанаар зохиомжлон засаж байна гэгдсээр байгаа юм.

Ямартай ч энэ удаа Засгийн газрын урилгаар БНХАУ-ын дэд дарга Хань Жөн ирж байгаа нь ямар хэмжээний ач холбогдолтой айлчлал болох нь анхаарал татлаа.

Дэд даргын айлчлалаар эдийн засаг, бүтээн байгуулалт ярилцах уу

Дэд даргын түвшний уулзалтаар аливаа төрийн өндөр дээд хэмжээний санамж бичиг үзэглэхгүй байх магадлалтай. Гэхдээ нэгэнт энэхүү айлчлалд манай Засгийн газар өндөр анхаарал хандуулж байна.

ОХУ-ын Ерөнхийлөгч Владимир Путиний айлчлалаар эрчим хүч, газрын тосны бүтээгдэхүүний асуудлаар томоохон хэмжээний ойлголцолд хүрч, санамж бичиг байгуулаад байгаа. Залгаад урд хөршийн дэд дарга ирснээр манай Засгийн газар эдийн засаг, бүтээн байгуулалтын деталь сэдвээр голчлон ярилцах чигтэй.

Засгийн газарт МАН-аас гадна АН, ХҮН нам багтсанаараа онцлог. Энэ Засгийн газар үүрэг гүйцэтгэх хугацаандаа хийж хэрэгжүүлэх үйл ажиллагааны хөтөлбөрөө баталсан. Мөн 14 мега төсөл хэрэгжүүлнэ гэж үүндээ тусгасан байгаа.

Иймд БНХАУ-тай худалдааны эргэлтийг нэмэгдүүлэх, бүтээн байгуулалтын томоохон төслүүдэд хамтран ажиллах, эдийн засгийн хамтын ажиллагааг шинэ түвшинд гаргах асуудлаар хэлэлцэх нь бидэнд ашигтай тусна.

ОХУ, БНХАУ-ын харилцаа тийм сайнгүй байгаа. ОХУ-ын зүгээс геополитикийн нөхцөл байдалдаа БНХАУ-ыг дэмжсэн байр суурь илэрхийлээсэй хүсдэг ч тэгэхгүй байна. Мөн хийн хоолойн бүтээн байгуулалтад БНХАУ-ын талаас дорвитой түлхэц үзүүлэхгүй уджээ.

Иймд Монгол Улс нэг талаар ОХУ, БНХАУ-ын ойлголцлын цэг болох бололцоотой. Зарим талаар саяхан айлчлаад буцсан Владимир Путин бидэнд БНХАУ-ын талд үг дайсан уу, хийн хоолойн асуудлаар ойлголцолд хүрэхэд туслахыг хүссэн үү гэх таамаг өрнөж байна.

Хань Жөн Владимир Путинтэй уулзаад Монголд ирнэ

Ташрамд, Хань Жөн ердөө өчигдөр ОХУ-д айлчилж, Владимир Путинтэй уулзсан нь анхаарал татаж байна.

ОХУ-д зохион байгуулагдсан Өрнөдийн эдийн засгийн форумд Хань Жөн оролцжээ. Энэ үеэрээ Владимир Путинтэй уулзан, хоёр орны найрсаг хамтын ажиллагааг баталгаажууллаа гэж олон улсын хэвлэлд мэдээлсэн байна. Ингэхдээ тодорхой асуудлаар байр сууриа солилцоогүй аж.

Өөрөөр хэлбэл Владимир Путин Монголоос буцаад Хань Жөнтэй уулзаж, маргааш нь Хань Жөн Монголд ирж байна. Тэгэхээр зарим талаар түүний энэ удаагийн айлчлал манай хойд, урд хоёр хөршийн нэгдсэн ойлголцлын хүрээнд өрнөж байх магадлалтай байгаа юм.

Х богдын асуудалд Ши Жиньпин таатай бус хэвээр байна

БНХАУ-ын Гадаад харилцааны сайд Ван И манайд хоёр жил тутам айлчилдаг. Үүнийг эс тооцвол өөр төрийн өндөр дээд хэмжээний айлчлал хийгдэхгүй удлаа.

Ноднин манай Засгийн газар БНХАУ-д айлчилж, эдийн засгийн хөгжилд түлхэц үзүүлэх хэд хэдэн чиглэлд ойлголцолд хүрсэн амжилттай байгаа юм.

Харин хоёр орны соёл, шашны бодлогын асуудал эгзэгтэй хэвээр байна. Тухайлбал, Х богд тодорсон, өдгөө олны өмнө ил гарах болсныг БНХАУ-ын тал огтхон ч таатай хүлээж авахгүй байгаа. Х богдын тухайд мэдрэмжтэй ажиллаж чадаагүй асуудлаар БНХАУ-аас Монголд суух Бүрэн эрхт элчин сайд асан Цай Вэньруйг татсан гэгдсэн.

Хэрэв Ши Жиньпин Ерөнхийлөгчийн урилгаар, өөрийн биеэр ирсэн бол шашны асуудал заавал сөхөгдөх байв. Нэг талаараа өөрийн биеэр ирнэ гэдэг X Богдыг хүлээн зөвшөөрсөнтэй агаар нэг болно.

Харин Засгийн газрын урилгаар ирж буй дэд дарга Хань Жөн энэ удаад эдийн засаг, бүтээн байгуулалтын сэдвээр л ярилцах гол чиг харагдаж байгаа. Нэг үгээр, Ши Жиньпиний ирээгүй шалтгаан үүнд буюу, шашны асуудлаар тодорхой байр суурь илэрхийлэхийг хүсэхгүй байгаатай холбоотой байж мэдэх юм.

Хань Жөнийг бямба гарагийн 10.00 цагаас Сүхбаатарын талбайд угтаж авна.

М.ТЭНГИС

Өөрийн сэтгэгдлээ илэрхийл

Share Tweet