Хэнтийд 12 настай охин удаа дараагийн оролдлогоор амиа хорлосон хэрэг гарлаа

Хэнтий аймагт энэ сарын 19-ний 19.00 цагийн үед 12 настай охин ЕБС-ийн дотуур байранд амиа егүүтгэсэн байдалтайгаар олдсон тухай бид өмнө нь мэдээлсэн. Тухайн үед хүүхдийн амиа хорлолттой холбоотой хэрэг тул мэргэжлийн ёс зүйн үүднээс охины тухай дэлгэрэнгүй мэдээлэл, байршил болон бусад баримтыг нууцлан хүргэж байв.

Харин тухайн хэрэгтэй холбоотой шинэ баримт, тус сургуулийн удирдлагын ёс зүйгүй байдал, үл хайхрах хүчирхийлэл гэх мэт үнэн төрхийг илчлэх эх сурвалж холбогдсон учир бид тухайн хэргийг эргэн харж, нэхэн сурвалжлах нөхцөл бүрдсэн юм. 

Охин Хэнтий аймгийн Цэнхэрмандал сумын ЕБС-ийн долоодугаар ангийн сурагч байсан. Энэ жил 12 нас хүрсэн бөгөөд аав, ээж нь бага байхад нь хоёр тийш болж аав нь өөр амьдрал зохиож, ээж нь хотод ажил эрхэлдэг байсан. Иймд охин нагац эмээгийндээ амьдарч, ойр ойр ээж нь эргэж ирдэг байсан юм. Хэдийгээр тусдаа амьдрах боловч аав, ээж нь охиныгоо хайраар дутааж байгаагүй” хэмээн ойрын эх сурвалж бидэнд ярив.

Охины эмээ сумын төвөөс ойролцоогоор 3 км-ийн зайд байрлах хоолны газар ажил эрхэлдэг. Заримдаа оройтох тохиолдол гарах үед охинд унтаж байгаарай хэмээн захих боловч “айж байна” гэсээр ганцаар гүйгээд ирдэг байжээ. Өмнөх жил нэг удаа сар хүрэхгүй хугацаанд сургуулийн дотуур байранд охиныг суулгасан, харин энэ жил мөн л адил охиныг харах хүнгүйдээд түр оруулсан нь энэ байжээ. Гэтэл дотуур байранд ороод ердөө зургаа хоноод л өөрийнхөө амийг егүүтгэсэн байна.

-Сургуулийн удирдлага: Өмнө нь эмээгийнхээ гэрт хоёр ч удаа ингэж айлгаад амжсан гэсэн-

Бид тус хэргийн талаар сургуулийн удирдлагатай холбогдон асуухад “Би охинтой нэг удаа уулзаж ярилцаж байсан. Гэр бүлийн салалттай холбоотой сэтгэл зүйн хямрал ажиглагдсан. Мөн охины эмээ архины хамааралтай гэсэн. 

Гэхдээ охин хичээлдээ сайн, бусадтайгаа нийцтэй тийм үйлдэл хийнэ гэж хэнд ч анзаарагдахааргүй харагдаж байсан. Тухайн хэрэг гарахаас цагийн өмнө оройн хоолны үеэр тааралдахад “инээмсэглэн мэндлээд” зөрсөн хүүхэд шүү дээ. 

Охины хойноос бид маш их харамсаж байна. Ээж нь яг өмнөх өдөр нь манай энд ирээд явсан. Удахгүй охиноо авна гэж байсан юм л даа. Гэтэл ийм хэрэг болчихлоо. Өмнө нь эмээгийнхээ гэрт хоёр ч удаа ингэж айлгаад амжсан гэдэг. Манай байранд бол ийм үйлдэл гаргаж байсангүй.

Задлан шинжилгээгээр амиа хорлолт болох нь тогтоогдсон. Мөн түүний жил гаруйн хугацаанд хөтөлж байсан тэмдэглэлийн дэвтэрт ганцаардаж байгаа тухайгаа, аавыгаа шинэ гэр бүл зохиосонд гуниглаж буйгаа бичсэн байсан. Ер нь манай дотуур байранд буй хүүхдүүд сэтгэл зүйн хувьд асуудалтай харагддаг. Ихэвчлэн гэр нь хөдөө байдаг, гэр бүлийн хувьд зөрчилтэй гэх мэт. Эдгээр хүүхдүүд мэдээж гэр бүлээ санах, гуниглах нь олон тохиолддог.

Талийгаач охины ээж нь ирж уулзаад манай сургуулийнханд ч ямар ч гомдолгүй хэмээн хэлсэн. Цагдаагийнхан тухайн хэрэгтэй холбоотой шалгалтыг манай байгууллага дээр хэдэн өдөр хийсэн тул бид сурагчдаа гэрт буцаагаад байсан юм. Харин одоогоор хүүхдүүдээ буцаан авч сургалтаа хэвийн үргэлжлүүлэх тал дээр ажиллаж байна. Сурагчид, эцэг эхчүүд болон багш нар хэвийн харилцаатай байгаа. Охины дурсгалд зориулан нэг танхимаа тохижуулах төлөвлөгөөтэй байна” хэмээсэн юм. 

Гэтэл сургуулийн удирдлагын бидэнд ярьсанчлан хэвийн, тогтуун биш байгаа тухай мэдээлэл манай редакцад ирсэн юм. Бид эх сурвалжид үүсэх эрсдэлийг тооцож нэрийг нууцлан мэдээлж байна.

-Эх сурвалж: Тэр үйлдэл тухайн өдрийн эхний оролдлого биш, хүүхдүүд мэдсэн байхад томчууд анзаараагүй байсан-

“Сургуулийн удирдлагын ярьсан тайлбарыг танай нийтлэлээс уншлаа. Яагаад ингэж худлаа ярих болов гэсэн бодол төрөөд бодит байдлыг хэлэхгүй бол болохгүй нь. 

Талийгаач охиныг хоёр настай байхад нь аав ээж нь салцгаасан. Өнгөрсөн 10 жилийн хугацаанд ойр байдлаас харсан миний зүгээс гэр бүл салалттай холбоотой амиа хорлолт гэж хэлж чадахгүй. Өөр хүчин зүйл байсан нь гарцаагүй. 

Миний мэдэхээр саяхнаас охин толь халаасалж явах болсон. Толио гаргаж өөрийгөө хараад “би яаж хөөрхөн болох вэ” гэх асуултыг үргэлж асууна. Яг л түүнийг хэн нэгэн “хөөрхөн биш” гээд хэлчихсэн юм шиг л. Сургуулийн орчинд үе тэнгийн дээрэлхэлт, зөрчилтэй хүүхдүүд байдгийг нуух юун. Тэд биенээ дээрэлхэж, бүлэглэн зодож, үгээр доромжлох бол наад захын асуудал. Гэтэл үүнийг сургуулийн захирал нэгэнд нь бурууг тохож нэг загнаад л орхиж харагддаг. Угтаа үндсээр нь засах шаардлагатай. ЕБС бүрд сэтгэл зүйч байлгах тухай ярьж л байдаг. Гэтэл аймгийн төвд тухайн орон тоо бүрдээгүйг харахад сумын бидэнд бол алсын мөрөөдөл болчихлоо.

Есдүгээр сарын 19-ний 19.00 цагт охин амиа бүрэлгэсэн. Гэхдээ тэр үйлдэл тухайн өдрийн эхний оролдлого биш байсан. Учир юу вэ гэвэл тухайн өдөр нь тийм үйлдэл хийсэн гэдгийг нь дотуур байрны бүх хүүхдүүд харсан. Тэр бүү хэл сургуулийн зарим хүүхдүүд ч анзаарсан байна лээ. Тэр жаахан охин улаан эрээн хүзүүтэй бүхэл өдөржингөө явахад томчуудын нэг нь мэдээгүй нь харамсалтай. Ямар аймгийн том цогцолбор сургууль биш дээ. Алга дарам газар оршиж, гарах орох бүрийдээ тааралддаг хэдэн хүүхдээ анзаарч чадсангүй тэд.

Томчууд анхаараагүй гэдгийг батлах ганцхан зүйл хэлье. Тэр хэргийг хамгийн анх хичээлээ давтахаар очсон найз нь мэдэж, томчуудад дуулгасан. Тухайн хүүхэд угаас охиныг өдөр амиа хорлохыг завдсаныг нь харсан учраас л ойр ойр “хичээлээ давтах уу” гээд л очоод байсан гэсэн. Тухайн хүүхэд одоогоор хөдөө гэрээсээ ирээгүй л байна. 

“Охины тэмдэглэл олдсон, гэр бүлийн байдлаас болсон гэж бичсэн гэх” мөн л худлаа. Тухайн хэргийн газраас охины эд зүйлс дотор дэвтэр байсан нь үнэн. Гэхдээ тэр дэвтрийг битүүмжлээд цагдаагийнхан аваад явсан. Түүнийг нээж юун тухай бичсэн болохыг сургуулийн захиралд мэдэх, унших эрх байхгүй биз дээ. Зүгээр л сургуулиасаа тэр хэргийг холдуулж, сул тал буюу гэр бүлийн салалт руу чиглүүлж байна.

Дараагийн нэг худал зүйл бол багш, сурагчид, эцэг эхчүүдийн харилцаа хэвийн гэх. Яаж бүхэл бүтэн хүн сургуулийн орчинд амиа алдчихсан байхад нам гүм байх билээ дээ. Энд дээр дооргүй л бужигнаж байна. Гэтэл хамгийн ихээр хүүхдүүдийн сэтгэл зүйгээр наадаж байгаа хүн “бүгд хэвийн” гээд хэлчхэж. 

-Сэтгэл зүйгээр наадаж байна гэлээ, яаж?

-Охины ойр тойрны хүүхдүүд, ангийн хүүхдүүдээс цагдаагийнхан мэдүүлэг авч буй. Гэтэл саяхан хэдэн хүүхдийг захирал өрөөндөө дуудаж охины хэрэгт буруутган загнасан байсан. Үүгээр ч зогсохгүй тухайн хүүхдүүдийн цагдаад өгөх мэдүүлгийг үг үсэггүй цээжлүүлэн явуулж буйг сонслоо. Ингэснээр хэргийг улам үнэнээс холдуулж, өөрсдөө хариуцлагаас бултаж байгаа нь илхэн.

Мөн охиныг анх дотуур байранд орохоор ирэхэд нь олон хүүхэдтэй өрөөнд оруулсан ч ээжийг нь явсан дариуд ганцааранг нь нэг өрөөнд оруулсан нь хачирхалтай. Хэдийгээр хэдхэн хонуулаад авах байсан ч шилжилтийн насны охиныг ганцааранг нь нэг өрөөнд суулгаж л байдаг.

Үүнээс гадна тухайн өдрийн дотуур байрны жижүүр мэргэжлийн бус, гадуур хумс буддаг хүн байдаг юм. Манай нутгийнхан тэр жижүүр эмэгтэйг “Хүний хумс будаад явж байгаад хүүхэд анзаарсангүй” хэмээн ам дамнан ярьж байна.

Ер нь хариуцлагаас хэн ч битгий зугтаасай, тухайн хэргийн үнэн зөв тодроосой гэсэн дээ өөрийн харж мэдэрч буй бүхнээ хуваалцлаа. Энэ асуудлыг шийдвэрлэх түвшнийхэн анзаараасай хэмээн хүсэж байна” хэмээсэн юм.

-Хэрэв тус өдрийн хичээлд суухдаа ямар нэгэн байдлаар мэдэгдсэн бол зохих арга хэмжээг авах л байсан-

Охины ангийн багштай холбогдлоо “Тухайн өдөр охин бусад үеийнхтэйгээ адилхан сэргэлэн цовоо байдалтайгаар л хичээлдээ суусан. Манай хичээл өглөөний ээлжид ордог юм л даа. Гэтэл орой нь тийм хэрэг болсон тухай сонсоод балмагдсан. Хэрэв тус өдрийн хичээлд суухдаа ямар нэгэн байдлаар мэдэгдсэн бол зохих арга хэмжээг авах л байсан. Яг ямар хүчин зүйлээс болж охин тийм нөхцөл байдалд хүрсэн тухай хэлж мэдэхгүй байна” хэмээв.

Харин тухайн өдрийн дотуур байрны жижүүртэй холбогдож хэргийн тухай тодруулахад бидэнд мэдээлэл өгөхөөс эрс татгалзсан юм.

-Хүүхдийн амиа хорлолттой холбоотой тул дэлгэрэнгүй мэдээлэл өгөх боломжгүй- 

Бид цааш тухайн хэргийн талаар ЦЕГ-аас тодруулахад "Тус аймагт энэ сарын 19-ний 20.00 цагийн үед 12 настай хүүхэд дотуур байрандаа амиа алдсан тухай бүртгэгдсэн байна. Гэхдээ тухайн хэрэг хүүхдийн амиа хорлолттой холбоотой тул дэлгэрэнгүй мэдээлэл өгөх боломжгүй" хэмээсэн юм.

Хамгийн сүүлд…

Талийгаач охин цахим хаягтаа "Бүгдэд нь хайртай шүү. Хүний богинохон амьдралд биеэ хайрлая. Уучлаарай" гэж бичсэн нь түүний хамгийн сүүлчийн үг байжээ.

О.УНДРАЛ

Энэ мэдээнд өгөх таны үнэлгээ

Хуваалцаарай Жиргээрэй