Грекийн Хираклион хотод жюү жицүгийн дэлхийн аварга шалгаруулах тэмцээн үргэлжилж байна. Тус тэмцээнд оролцож буй Монголын баг тамирчид одоогийн байдлаар хоёр хүрэл, нэг мөнгөн медаль хүртээд байна.Тодруулбал, эмэгтэйчүүдийн 57 кг-ын жинд “Гаруда” академийн тамирчин, ДАШТ-д оролцож буй Монголын шигшээ багийн ахлагч Г.Монголжин хэсгийн барилдаанд Израйл, Панам, Шведийн тамирчныг ээлж дараалан буулгаж авсан ч хэсгийн аваргын төлөөх барилдаанд Унгарын бөхөд ялагджээ.
Улмаар хүрэл медалийн төлөө нутаг нэгт тамирчин Э. Шүрэнцэцэгийг ялсан байна. Ингэснээр тэр жюү жицүгийн ДАШТ-ээс медаль хүртсэн Монголын тав дахь тамирчин болов. Түүнээс өмнө 2015 онд М.Баярмаа, Ц.Батцэцэг, 2023 онд М.Сугар, Б.Хулан нар хүрэл медаль хүртэж байсан юм.
Түүнчлэн холимог багийн барилдаанд Монголын баг анх удаа хүрэл медалийн тавцанд зогслоо. Энэ төрөлд Израйлын баг түрүүлж, Герман мөнгө, Монгол, Франц хүрэл медаль хүртсэн байна. Үүнээс гадна контакт төрлийн эмэгтэйчүүдийн +70 кг-ын жинд “Жамп” академийн тамирчин Б.Хонгорзул мөнгөн медалиар энгэрээ мялаажээ.
М.АГАР
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.