Б.Жавхлан: Ерөнхийлөгчийн хоригийг хүлээж авбал 2.1 их наядаар төсвөө танах чиглэлтэй байна

Сангийн сайд Б.Жавхлан 2025 оны төсвийн тухай хуульд Монгол Улсын Ерөнхийлөгч У.Хүрэлсүх бүхэлд нь хориг тавьсантай холбогдуулан, сэтгүүлчдэд мэдээлэл өгөхдөө дараах тайлбарыг өглөө.

2025 оны төсвийн тэнцвэржүүлсэн орлого 33.9 их наяд, нийт зардал 35.8 их наяд төгрөг байхаар баталсан юм.

Сангийн сайдын зүгээс "УИХ Ерөнхийлөгчийн хоригийг хүлээж авах эсэхээ хэлэлцэнэ. Урьдчилсан таамгаар бол УИХ хүлээж авах уу гэж бодож байна. Засгийн газрын зүгээс ч тэр төсвийг алдагдалгүй батлах зорилтынхоо хүрээнд боловсруулах чиглэл барина гэдгээ сая хуралдаанаар ярилаа.

Засгийн газар 2024-2028 оны мөрийн хөтөлбөрөө баталсан. Дэд бүтцийн зардалд суурилж, жижиг зардлуудыг нэлээд танах замаар төсвөө боловсруулсан. Ирэх оны төсөв төсвийн тусгай шаардлагаа хангаж, 2 хувийн алдагдалтай батлагдсан. Ковидын үед 8.4 хувьтай байсан алдагдлаа бол бууруулсан.

Тэгэхээр төсвөө бүр алдагдалгүй болгоё гэвэл нэлээд их зардлаа танаж таарна. Боловсролын шинэчлэл зэрэг хуулийн хүрээнд төсвийн зардал нэлээд өссөн. Тэгэхээр уг хуулийн хүрээний зардлуудаа эргэж танана гэсэн үг. Соёлын яамны ваучер зэрэг бол төсөвт айхтар жин дарахгүй" гэсэн байр суурийг илэрхийлэв.

Сэтгүүлчдийн асуултад дараах хариултыг өглөө.

-Яг ямар таналтууд хийхээр Засгийн газар ажиллаж байна вэ?

-Ирэх жилийн төсөв 5.3 их наядаар өссөн. Үүнийг 1.7 их наяд нь хөрөнгө оруулалт, үлдсэн нь салбарын хуулиудад орсон өөрчлөлтийн хүрээнд шууд нэмэгдсэн зардал байгаа. Эдгээрээ л эргэж харна гэсэн үг. Өөрөөр хэлбэл, салбаруудын өсөх амбицуудыг дарах шаардлага үүсч байна.

-Сайд нарын багцаас хэрхэн хасах вэ?

-Төсвийн захиран зарцуулах эрхийг 34 нэгж эдэлдэг. Зардлуудаа эрэмбэлээд, нарийвчилж харна.

-Төсвөөс яг хичнээн их наядыг танах урьдчилсан тооцоо байгаа вэ?

-Ийм нөхцөлд тогтсон үндсэн зарчим байдаг. Ер нь бол хөрөнгө оруулалтаасаа эхэлж танана. Шинээр хийх 1.7 их наядаа танаад, төрийн урсгал зардлаа хэмнэх асуудал руу орно. Нийт 2.1 их наяд орчим хэмнэлтийг үүсгэнэ.

-Сошиал дээр шүүмжлэл дагуулсан Ч.Номин сайдын ваучерыг жишээ нь хасах уу?

-Ер нь хасагдаж таарна.

-Алт, зэсийн үнийг эргэж харах уу?

-Тэнцвэржүүлсэн үнээрээ л авна. Төсөвт зэсийг 75000 ам.доллараар авсан. Дэлхийн зах зээл дээр 10.000 ам.доллар байна. Зөрүү нь 2500 ам.доллар байгаа.

-Төсвийн айнгын хороо ажлаа муу хийлээ, дарга Ц.Даваасүрэн нь хэт улстөржлөө гэсэн шүүмжлэл явсан?

-Засгийн газрын зүгээс УИХ-ын төсөв дээр ажиллсан байдлаар ямар нэгэн санал шүүмжлэл хэлмээргүй байна. УИХ хоригийг хэрхэн шийднэ, түүнд нийцүүлэн засгийн газар холбогдох тохируулгыг хийх юм. УИХ-аар төсвөө тодотгох тогтоолын төслөө өмнө нь баталсан байсан хэдий ч Ерөнхийлөгчийн хориг орж ирж байна. Тэгэхээр хоригийг УИХ-аар эхлээд хэлэлцэнэ гэсэн үг. Өнгөрсөн наймдугаар сард төсвийн тодотгол хийсэн. Үндсэндээ бараг гурван төсвийг зэрэгцүүлж боох, бэлтгэх ажлууд өрнөсөн.

Ерөнхийлөгчийн 2025 оны төсөвт бүхэлд нь тавьсан хоригийн талаарх мэдээлэл:

Энэ мэдээнд өгөх таны үнэлгээ

Хуваалцаарай Жиргээрэй