Л.Энх-Амгалан огцор!

Сошиалд хэдийнэ зохион байгуулалтад орсон гэлтэй постууд хөвөрч эхэлснээр хаврын морин уралдааныг сэргээнэ гэдэгт Засгийн газар урьдчилаад тохирчихсон дүр зураг уншигдаж байв.

Морьтонгууд жагсаж, шууд дараа долоо хоногт нь тэдний шаардлагыг Засгийн газар хэлэлцэхээр болсон нь үүнийг улам бататгаж байсан. Тэгвэл, сценарь дагуу өнөөдөр хавар морь уралдах эрх зүйн зохицуулалтыг нээчихлээ.

Уг нь Засгийн газрын 2019 оны 57-р тогтоолоор жил бүрийн арваннэгдүгээр сарын 1-нээс тавдугаар сарын 1-ний хооронд ямар нэг морин уралдаан зохион байгуулахыг хориглосон.

Өнөөдөр тогтоол дахь энэ заалтыг хүчингүй болгожээ.

Яг Засгийн газрын гаргасан шийдвэрийн нэр болохоор “Аймаг, сумын ИТХ аливаа урлаг, спорт, соёлын арга хэмжээг өөрсдөө мэдэж зохион байгуулна” гэдэг. Ингэснээр аймаг, орон нутаг аль цагт морь уралдуулахаа Засгийн газраас үл хамаарч шийдэж болох зохицуулалт орж байгаа юм.

Улмаар гуя дагуулж хүзүү гэгчээр, дээр дурдсан 57-р тогтоолыг уялдуулан хүчингүй болгох аж.

Гэр бүл, хөдөлмөр, нийгмийн хамгааллын сайд Л.Энх-Амгалан энэ талаар танилцуулахдаа “Ингээд шийдчихээр яах аргагүй 57-р тогтоолдоо гар хүрнэ” гэж жишимгүй тайлбарлаж байна.

Мэдээж тэр “Хүүхдийн эрхийг хамгаалах ёстой” гэж дуугарахаа мартаагүй.

Тийм учраас нэг ба хоёрдугаар сард уралдаан зохион байгуулахгүй байх. Хавар морь уралдуулбал гуравдугаар сарын 1-нээс хойш хийх. Унаач хүүхдийн нас 12-оос дээш байх. Тэдний аюулгүй байдал, хувцас хэрэглэлийн стандартыг хангаж ажиллах. Хэрэв нэг, хоёрдугаар сард морь уралдуулсан бол эрүүгийн хариуцлага хүлээдэг байх нь зүйтэй гэж хэллээ. Гэхдээ эдгээрийн хувьд шийдвэр биш, зөвхөн ЗӨВЛӨМЖ гэлээ.

Цаашлаад гэр бүл, нийгмийн хамгааллын асуудал эрхэлсэн сайд тэрбээр,

“Ер нь тэгээд хаврын морин уралдаан Хятадын, Өвөрмонголын соёл болох юм уу? Бид соёл уламжлал тээдэг ард түмэн” гэснээ, “Өвөл уралдахаар унаач хүүхдийн хувьд тэвчишгүй хөдөлмөр гэж үздэг мөртлөө зун уралдахаар тэвчих хөдөлмөр гэчихдэг. Энэ бол дабль стандарт. Тийм юм бол зун уралдахыг нь ч болиулчих хэрэгтэй. Би өөрөө малын захад өссөн, морь унаж байсан хүн” хэмээлээ.

Л.Энх-Амгалан өмнө нь Боловсрол, шинжлэх ухааны сайдаар ажилласан. Хүүхэдтэй, хүүхдийн боловсролын асуудалтай нүүр тулж, хариуцсан. Сонгуулийн дараа Засгийн газрын бүрэлдэхүүн солигдоход салбараа сольж, Гэр бүл, хөдөлмөр, нийгмийн хамгааллын яам дээр очсон.

Үүний цаана зөвхөн уяач нарын ашиг сонирхол бий. Гэтэл хахир цагаар морь уралдахад хүүхдийн эрх олон талаар зөрчигддөг, бүр амь насаар хохирдог нь бодит үнэн, шүүхээр шийдвэрлэгдсэн асуудал. Гэтэл хүүхдийн эрхийг хамгаалж ажиллах ёстой сайд нь өв соёл ярилаа. Морин уралдаан ярилаа. Ингээд бүр хавар морь уралддаг болох асуудалд толгой мэдэн оролцлоо.

Түүний өмнө салбар хариуцсан сайд асан, УИХ-ын гишүүн Н.Ариунзаяагийн хувьд “Хүүхдийн эрхийг хамгаалах ёстой сайд нь ингэж ярих ч гэж дээ” хэмээн байр сууриа илэрхийлжээ.

Ийм шийдвэр гаргаж, эдгээр зүйлийг жишимгүй ярьж буйгаас нь харвал Л.Энх-Амгалан хүүхдийн эрхийг хамгаалахгүй юм байна. Товчхондоо, салбартаа эзэн болохгүй юм байна. Лоббигоор тохирсон Засгийн газрын нэгдмэл байр суурийг сөрж зогсож чадахгүй нь нэгэнт тодорхой болчихлоо. Тэгэхээр түүнээс юу хүлээх вэ. Хариуцсан салбараа хамгаалж чадахгүй, улс төрийн эрх ашгаа нэгт тавьдаг Л.Энх-Амгалан огцор! Дуртай юм бол соёл уламжлал, спорт хариуцсан салбараа л тодорхойлж ажилла!

М.ТЭНГИС

Энэ мэдээнд өгөх таны үнэлгээ

Хуваалцаарай Жиргээрэй