Тойм: Л.Оюун-Эрдэнийн тааварлашгүй шийдвэрүүд, түүний ардах "Женко"-д Ерөнхийлөгч үг дайв

Өнгөрсөн долоо хоногт улс төрийн хүрээнд болсон нэг сонирхолтой үзэгдэл бол Чөлөөндөө гарсан цагдаагийн хурандаа, Мөрдөн байцаах газрын дарга, Цагдаагийн сургуулийн тэнхмийн эрхлэгч зэрэг төрийн чухал алба хашиж байсан, С.Зоригийн хэргийн мөрдөн байцаагчаар ажиллаж байсан З.Төрмандахыг ТЕГ-аас саатуулан шалгав. Өдгөө "MCS"-ийн нэр дор ажиллаж яваа хурандааг баривчилсан явдал нь Ерөнхий сайд Л.Оюун-Эрдэнэ Тавантолгойн бүлэг ордын ашигт малтмалын тусгай зөвшөөрлийг хувийн хэвшлийн аж ахуй нэгжид олгосон асуудлаар УИХ, Засгийн газрын өмнө гаргасан шийдвэрт дүн шинжилгээ хийж танилцуулж боловсруулах үүрэг бүхий Ажлын хэсэг байгуулах захирамж гаргасаны маргааш шахуу өрнөсөн үйл явдал. Өөрөөр хэлбэл Л.Оюун-Эрдэнэ MCS тойрсон асуудал руу улам гүнзгий орно гэдгээ харуулж буй нь энэ.

ЗГХЭГ-ын дарга Н.Учрал олон нийтэд мэдээлэл хийхдээ, "Төр стратегийн ордууд дээр хувь тогтооно. Үндэсний баялгийн сангийн хуулийг хэрэгжүүлнэ" гэсэн нь Л.Оюун-Эрдэнийн яг одоогийн буцашгүй шийдвэрүүдийг Засгийн газар танхимаараа дэмжиж байгаа гэдгээ ч нотлов.

Үүнийг нь анзаарсан Ерөнхийлөгч У.Хүрэлсүх ч энэ удаад дуугүй байсангүй.

Ерөнхийлөгч У.Хүрэлсүх өнгөрсөн пүрэв гарагт /2025.02.20/ “Цагаан алт” үндэсний хөдөлгөөн-Төр, хувийн хэвшлийн зөвлөлдөх уулзалтад оролцох үеэрээ ширүүхэн үг шидэв.

Ингэхдээ "Ардчилсан улсын онцлог бол болж бүтэж байгаагаа ярьдаггүй, болохгүй байгаагаа ярьдаг. Гэхдээ монгол хүн мөн бол эх орноо битгий муулж бай. Бид зарим талаар аль ч орны амжуулж чадаагүй зүйлийг энэ 30 жилд хийж, хөгжиж чадсан. Бүх зүйлийг төрөөс өгөхгүй. Халамжаас хөдөлмөрт шилжих ёстой. Олборлолтоос боловсруулалт руу шилжих ёстой. Халамж хайр зөвхөн зорилтот бүлэгт очих ёстой. Баялаг бүтээгчдээ үргэлж дэмжинэ. Хүн бүр хөдөлмөрлөх ёстой. Тэгж байж улс орон хөгжинө" гэв.

Гэхдээ Ерөнхийлөгчийн энэ үгс шууд утгаараа Ерөнхий сайдын тааварлашгүй үйлдлүүдэд мессеж өгсөн нь илт. Хувийн хэвшлүүдийг "намнах", стратегийн ордууд дээр төр хувиа тогтооно гэсэн Засгийн газрын өөрөөр хэлбэл "залуучуудынх" нь амбиц ерөнхийлөгчид таалагдсангүй.

Ерөнхий сайдын томилгооноос Х.Баттулгын хүсэл сонирхол харагдах болов

Засгийн газар энэ долоо хоногт “Төрд хамгийн хэрэггүй хүн” гэх томьёололтой УИХ-ын гишүүн асан Ж.Батзанданг Засгийн газрын Бүрэн эрхт төлөөлөгчөөр томилов. Үүнтэй бараг зэрэгцээд Ерөнхий сайд дэргэдэх Эдийн засгийн хөгжлийн зөвлөлийн гүйцэтгэх захирлаар Сү.Батболдын хүн гэгддэг Улс төрийн хууччуулын нэг Д.Зоригтыг томилов.

Улс төрд нэр хүндгүй. Арга барил нь ч ил. Улиг болсон улс төрийн хууччуулаар Ерөнхий сайд өөрийгөө хүрээлүүлж, тааварлашгүй бүрэлдэхүүнийг бүрдүүлж буй нь ихээхэн анхаарал татаж байна.

Л.Оюун-Эрдэнэд мега төслүүдийн том хүслийнх нь наана улс төрийн олон талт санал, дарамтуудыг тэр ийн албан тушаалаар шингээж байж болох. Эсвэл хэн нэгэн ч ойроос нөлөөлж байж магадгүй. Харин үүний хариултыг Ерөнхийлөгч хэлэв.

Оны дараанаас л "Засгийн газраа унагая" гэсэн акцууд хөвөрч, энэ акц цаашид ч Л.Оюун-Эрдэнийг тойрохгүй, дайрна.

Гэхдээ түүний улс төрийн сүүлийн үеийн шийдвэрүүд болоод томилгоонуудаас Х.Баттулгын улс төрийн ашиг сонирхлууд цухалзаж байгаа нь үнэн. Тиймдээ ч ерөнхийлөгч Л.Оюун-Эрдэнийн нэг талд хэтэрхий жин дарж байгаа дээр түүнийг ил шүүмжлэв.

Нефтийн үйлдвэр бариулах Ерөнхийлөгчийн амбицыг Х.Баттулгаар нугачуулж, хөөсрүүлж байна хэмээн танхимаас загнах, зандрахын сацуу дайсан үг нь үнэндээ улс төрийн хожоо эрж, хумсаа нууж яваа УИХ-ын гишүүн Х.Баттулгад хандсан үг байв.

Д.ЖАРГАЛМАА

Энэ мэдээнд өгөх таны үнэлгээ

Хуваалцаарай Жиргээрэй