Нагац ах нь нэр дэвшсэн Ховдын МАН-ын хорооны даргын сунгааг С.Бямбацогт "будилуулжээ"

Ховд аймгийн МАН-ын хорооны даргын сунгаа будилаантжээ. Батлан хамгаалахын сайд С.Бямбацогт нар будлиантуулсан гэдэг мэдээлэл цахим орчинд хөвөрч эхлээд байна.

Тодруулбал, өнгөрөгч бямба гарагт /2025.02.22/ Ховд аймгийн МАН-ын 41 дүгээр Бага хурал болжээ.

Хуралд, УИХ-ын гишүүн Э.Болормаа, С.Бямбацогт, З.Мэндсайхан, МАН-ын нарийн бичгийн дарга Н.Энхбаатар, Хяналтын Ерөнхий хорооны дэд дарга бөгөөд Ёс зүйн хорооны дарга Б.Баттүшиг, Хяналтын Ерөнхий хорооны гишүүн Б.Батзаяа, Ховд аймгийн МАН-ын Хяналтын хорооны зургаан гишүүн болон МАН-ын Цахим хөгжил, инновацын газрын ажилтнууд очиж оролцсон байна.

Ховд аймгийн МАН-ын даргын сонгуульд Д.Авирмэд, Э. Алтан-Од, М.Ганзориг, Т.Жаргалсайхан нар нэрээ дэвшүүлж, мөрийн хөтөлбөрөө танилцуулан өрсөлдсөн аж.

Хуралдааны явцад хэд хэдэн будилаан үүссэнийг МАН-ын хорооноос мэдэгджээ.

• Буянт сумын засаг дарга Д.Энхболд Буянт сумын намын гишүүн Д.Мөнхболдоор хуурамч буюу дахин хувилж, хэвлэсэн Д.Энхболд гэсэн мандатаар санал өгүүлсэн, /Цагдаагийн байгууллагад шалгуулахаар гомдол гаргажээ/
• Аймгийн хяналтын хорооны гишүүд хяналтын тооллого хийх үйл явцыг заалнаас үймээн шуугиан тарьж хийлгээгүй,
• Бага хурлын төлөөлөгч Т.Баатарзориг болон УИХ-ын гишүүн С.Бямбацогт нар Бага хурлыг шөнө 04 цагт болон 2025.02.23-ны 11 цагт ирц бүрэлдээгүй байхад хуралдуулж, хууль зөрчсөн гэжээ.

Эцэст нь Ховд аймгийн МАН-ын 41-р хуралдаанаас ямар нэгэн албан ёсны шийдвэр гараагүй аж.

Нэр дэвшигч М.Ганзориг нь УИХ-ын гишүүн С.Бямбацогтын нагац ах гэгдэж байна. Тэрбээр, "Ховдын өргөө" ХХК-ийн захирал бөгөөд Ховд аймгийн МАН-ын хорооны даргаар ажиллаж байсан нэгэн аж.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй