"Тэнүүн Огоо"-гоос ₮10.3 тэрбумыг авсан "Эм Эс И Партнерс" ХХК эргүүлээд ₮14 тэрбумыг нэхэмжилсэнд А.Ганхуяг гайхав

"Ногоон автобус" автортой А.Ганхуяг нарын 24 хүнд холбогдох /ЭХ-ийн 22.1-1, 17.3-2.2, 22.12-1/ хэргийн шүүх хуралдаан өдрөө үргэлжилж байна.

Өчигдрийн хуралдааны үеэр "Тэнүүн Огоо" ХХК-ийн захирал А.Ганхуяг мэдүүлэгтээ "Эм Эс И Партнерс" цүнхний компани бөгөөд Б.Цолмон далдуур удирддаг" гэж онцолжээ.

-Шүүгч: "Эм Эс И Партнерс" ХХК 14 тэрбум төгрөгийг иргэний нэхэмжлэлээр нэхэмжилсэн. Үүнийг та хүлээн зөвшөөрч байна уу?

-А.Ганхуяг би наадахыг чинь бодоод л сууж байлаа. Гайхаж байна. Ямар үндэслэлээр, яаж манайхаас нэхэмжлэв. Нэг л юмыг сайн ойлголоо. Төрийн өмчийн компанийг ийм л хүмүүс удирддаг юм байна. Юу гэсэн үг юм бэ. Санхүүгийн активаа мэдэхгүй. ИТХ-д гурван удаа сонгогдсон хүн ийм юм яриад сууж байгааг бодохоор.

-Шүүгч: Ийм сахилга баттай компанитай та яагаад гэрээ байгуулсан юм бэ?

-Миний ганц итгэл үнэмшил байсан. Далдуур удирдсан Б.Цолмон гэж гараад ирнэ гэж бодоогүй, мэдээгүй. Одоо л ойлгож байна. Тухайн үедээ энэ компани хоёр л гишүүнтэй буюу Ц.Болортуяа өөрөө, нөгөө нь Ганхөлөг гэж ойлгож байсан. Компанийнх нь дүрмийн сан 1 сая төгрөг л байсан.

Хохирогч Б.Цолмонгийн ярьж байгаагаас "Үнэхээр цүнхний компани гэж энэ юм байна" гэж бодлоо

Гэх асуулт хариулт өрнөв.

2024 оны тавдугаар сард "Ногоон автобусны цавчаа"-гаар УИХ-ын Хянан шалгах түр хорооны нээлттэй сонсгол явуулсан.

Тухайн үед шинжээчийн мэдээлэлд "2023 оны гуравдугаар сарын 9-нөөс есдүгээр сарын 29-нийг хүртэл нийтдээ 272.2 тэрбум төгрөгөөс 134.6 тэрбум төгрөгийг “Тэнүүн-Огоо” компанид олгосон байна. Улсын төсвөөс санхүүжсэн 134.6 тэрбум төгрөгөөс “Тэнүүн-Огоо” компани нь гадаадын нийлүүлэгч компаниудад 111 тэрбум төгрөгийг шилжүүлсэн байдаг. Nanjin golden dragon компани руу 10.3 тэрбум төгрөгийг "Эм Эс И Партнерс" ХХК-аар дамжуулж шилжүүлжээ. "Эм Эс И Партнерс" ХХК нь "Тэнүүн-Огоо" компанитай харилцан хамааралтай нэгдсэн сонирхолтой этгээдүүд байсан нь нотлох баримтаар харагдаж байна" гэж дурдагдсан билээ.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй